ބައިޑަން، ހަމުގެ ކެންސަރުގެ ސަރޖަރީއެއް ކޮށްފި

އެމެރިކާގެ ކުރީގެ ރައީސް ޖޯ ބައިޑަން، ހަމުގެ ކެންސަރުގެ ސަރޖަރީއެއް ކޮށްފައިވާ ކަމަށް، ބައިޑަންގެ ތަރުޖަމާނު ހާމަ ކޮށްފި އެވެ.

ބައިޑަންގެ ތަރުޖަމާނު ހުކުރު ދުވަހު އެކަން ހާމަކޮށްފައިވާއިރު، އެ ސަރޖަރީ އަކީ "މޯސް ސަރޖަރީ"ގެ ނަމުން މަޝްހޫރު، އާންމުކޮށް ހަމުގެ ކެންސަރަށް ފަރުވާ ކުރުމަށް ކުރިއަށް ގެންދާ ޕްރޮސީޖަރ އެކެވެ.

އުމުރުން މިހާރު 82 އަހަރުވެފައިވާ ބައިޑަން އަށް ޕްރޮސްޓޭޓް ކެންސަރު ޖެހިފައިވާކަން މިއަހަރުގެ ޖުލައި މަހު ވަނީ ފާހަގަވެފަ އެވެ. ބައިޑަންގެ ޞިއްޙީ ޓީމުން ބުނެފައިވާ ގޮތުގައި، އެއީ އެގްރެސިވް ބާވަތެއްގެ ކެންސަރެއް ނަމަވެސް، ހޯމޯން ސެންސިިވް ކެންސަރަަކަށް ވުމުން ފަރުވާ އިން ރަނގަޅު ކުރެވޭނެ ކަމަށް ލަފާ ކުރެވޭ ކަމަށެވެ.

އެމެރިކާގެ ރައީސް ކަމުގެ މަގާމުގައި ބައިޑަން ހުންނެވިއިރު، 2023 ވަނަ އަހަރު އޭނާ ހެއްދެވި އާންމު މެޑިކަލް ޗެކަޕަށް ފަހު، އޭނާގެ ހަމުން ވަނީ ލީޝަނެއް ނަގައިފަ އެވެ. އެއީ ބޭސަލް ސެލް ކާސިނޯމާ ކަމުގައި އޭރު ވަނީ ދެނެގަނެވިފަ އެވެ.

ބައިޑަންގެ ޞިއްޙީ ޙާލަތާ މެދު ކަންބޮޑުވުން ތަކެއް ކުރިން ވެސް ވަނީ އުފެދިފަ އެވެ. އެގޮތުން ރައީސް ކަމުގައި ބައިޑަން ހުންނެވިއިރު، ޞިއްޙީ ގޮތުން އޭނާ ހުންނެވީ ރައީސް ކަމުގެ މަސްއޫލިއްޔަތު އަދާ ކުރެވޭ ޙާލަތެއްގައި ނޫން ކަމަށް ބުނެ، ގިނަ ބަޔަކު ވަނީ އެ ވާހަކަތައް ދައްކައިފަ އެވެ.

މިދިޔަ އަހަރު އޮތް އެމެރިކާގެ ރިޔާސީ އިންތިޚާބުގައި ބައިޑަން ވަނީ ދެ ވަނަ ދައުރަކަށް ވާދަ ކުރައްވަން ނިންމަވައިފަ އެވެ. ޑިމޮކްރަޓްސް ޕާޓީގެ ރިޔާސީ ޓިކެޓު ބައިޑަން އަށް ލިބިވަޑައިގެންނެވިއިރު، ރިޔާސީ ބަހުސްގެ ފުރަތަމަ ބުރުގައި ބައިޑަންގެ ފަރާތުން ފެނުނު ދަށް ޕަރފޮމެންސްއާ ގުޅިގެން ވެސް ފާޑު ކިޔުން އަމާޒުވި އެވެ. ބައިޑަންއާ ވާދަ ކުރެއްވި މިހާރުގެ ރައީސް ޑޮނަލްޑް ޓްރަމްޕްއާ އެކު އޮތް ބަހުސް އަށް ފަހު، ބައިޑަންގެ ޤާބިލު ކަމާ މެދު އިތުރު ސުވާލު ތަކެއް އުފެދުނެވެ.

ބައިޑަން ނިސްބަތްވެ ވަޑައިގަންނަވާ ޑިމޮކްރެޓްސް ޕާޓީގެ ތެރޭގައި ވެސް ޚިޔާލު ތަފާތުވުން ތަކެއް އުފެދިގެން އައިއިރު، އޭގެ ދެ ހަފުތާ ފަހުން ބައިޑަން ވަނީ ރިޔާސީ ރޭހުން ވަކިވާން ނިންމަވައިފަ އެވެ. ރިޔާސީ ޓިކެޓު ބައިޑަން ދޫކޮށްލެވުމާ އެކު، ޑިމޮކްރެޓްސް ޕާޓީގެ ފަރާތުން އިންތިޚާބުގައި ވާދަ ކުރެއްވީ ބައިޑަންގެ ނައިބު ރައީސް ކަމަލާ ހެރިސް އެވެ.

އެމެރިކާގެ ކުރީގެ ރައީސް ބަރަކް އޮބާމާގެ ދެ ދައުރުގައި ވެސް ނައިބު ރައީސް އަކަށް ހުންނެވި ބައިޑަން، އެމެރިކާގެ ރައީސް ކަމަށް އިންތިޚާބުވީ 2020 ވަނަ އަހަރު އެވެ. އެ އިންތިޚާބުގައި އޭނާ ވަނީ ޑޮނަލްޑް ޓްރަމްޕްގެ މައްޗަށް ކުރި ހޯއްދަވައިފަ އެވެ. އެއާއެކު ބައިޑަން ވެގެން ދިޔައީ އެމެެރިކާގެ އެންމެ ދުވަސްވީ ރައީސް އަށެވެ. ނަމަވެސް، 2024 ވަނަ އަހަރު އޮތް އެމެރިކާގެ ރިޔާސީ އިންތިޚާބު، އުމުރުން 79 އަހަރުގެ ޓްރަމްޕް ކާމިޔާބު ކުރެއްވުމާ އެކު، އެ ރެކޯޑު މިހާރު އޮތީ ޓްރަމްޕްގެ އަތްޕުޅު ގައެވެ.

ރިޔާސީ ދައުރު ނިމުނު ފަހުން ވެސް، ބައިޑަންގެ ޙަރަކާތްތައް ދޭތެރެ އަކުން ފެނިގެންދެ އެވެ. ޚާއްސަކޮށް ބައިޑަން ގެންދަވަނީ ޓްރަމްޕްގެ ދެ ވަނަ ދައުރުގައި ނިންމަވަމުން ގެންދަވާ ކަންކަމާ މެދު ފާޑު ވިދާޅުވަމުންނެވެ. އެގޮތުން މިއަހަރުގެ އޭޕްރީލް މަހުގެ ތެރޭގައި ބައިޑަން ދެއްވި ޚިތާބެއްގައި ވަނީ، ޓްރަމްޕްގެ ސަރުކާރުން ސޯޝަލް ސެކިއުރިޓީ އެޑްމިނިސްޓްރޭޝަން އަށް ގެންނަން ހުށަހަޅާފައިވާ ބަޖެޓު އުނިކުރުންތަކާ ދެކޮޅަށް ވާހަކަ ދައްކަވައިފަ އެވެ.