މީޑިއާ ކޮންޓްރޯލް ކުރާ ބިލު ލަސްނުކޮށް އަވަހަށް ފާސްކުރުން މުހިންމު ކަމަށް މެމްބަރު ސިނާން ވެސް ވިދާޅުވެއްޖެ
މީޑިއާ ކޮންޓްރޯލް ކުރާ ބިލު ވީހާވެސް އަވަހަށް ފާސްކުރުމަކީ މުހިންމުކަމެއް ކަމަށް މެންބަރު ސިނާން ވިދާޅުވި
ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރު މުހައްމަދު ސިނާން: ރައްޔިތުންގެ މަޖިލީހަށް މިހާރު ހުށަހަޅުއްވާފައި އޮތް "މިީޑިއާ ކޮންޓްރޯލް ކުރާ ބިލު" އަވަހަށް ފާސްކުރުން މުހިންމުކަމަށް ވިދާޅުވި
ރައްޔިތުންގެ މަޖިލީހަށް މިހާރު ހުށަހަޅުއްވާފައި އޮތް "މިީޑިއާ ކޮންޓްރޯލް ކުރާ ބިލު" ވީހާވެސް އަވަހަށް ފާސްކުރުމަކީ މުހިންމު ކަމެއް ކަމަށް ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރު މުހައްމަދު ސިނާން ވިދާޅުވެއްޖެ އެވެ.
ސިނާން މިފަދައިން ވިދާޅުވީ މިޑިއާ ކޮންޓްރޯލް ކުރާ ބިލާއި ގުޅޭގޮތުން "އެކްސް" ގައި ކުރެއްވި ޕޯސްޓެއްގައި އެވެ.
މީޑިއާ ކޮންޓްރޯލް ކުރާ ބިލާއި ދެކޮޅަށް ވަކާލާތުކޮށް އަޑުއުފުލަމުންގެންދާ ފަރާތްތަކަށް ވަރަށް ބޮޑަށް ފާޑުވިދާޅުވަމުން ސިނާނު ކުރި ޕޯސްޓުގައި ވަނީ ނޫސްވެރިކަމުގެ ނަމުގައި ފަހަތުގައި ފިލައި ތިބޭ ސިޔާސީ އެކްޓިވިސްޓުން މަސައްކަތް ކުރަނީ މިނިވަންކަމަކީ މީހުންނަށް ފުރައްސާރަކޮށް، އަބުރާއި ޢިއްޒަތަށް އުނިކަން ގެނެސް، އަދި ދޮގު ފެތުރުމުގެ ހައްގު ކަމުގައި ދައްކަން ކަމަށް ވިދާޅުވެފަ އެވެ.
އޭނާ ވިދާޅުވީ ޒިންމާދާރުކަމެއް ނެތް މިނިވަންކަމަކީ އެއްގޮތަކަށްވެސް މިނިވަންކަމެއް ނޫން ކަމަށާއި އެއީ ހަމަ ހަމަނުޖެހުމެއް ކަމަށެވެ. އަދި އެ މިނިވަންކަމުން އާންމު ރައްޔިތުންނާއި ޢާއިލާތައް ބުހުތާނު ދޮގު ހަދާ މީހުންގެ ކިބައިން ރައްކާތެރިކަން ނެތްގޮތަށް ދޫކޮށްލެވެނީ ކަމަށް ވެސް އޭނާ ވިދާޅުވި އެވެ.
ނޫސްވެރިކަމުގެ ނަމުގައި ފަހަތުގައި ފިލައި ތިބޭ ސިޔާސީ އެކްޓިވިސްޓުން މަސައްކަތް ކުރަނީ މިނިވަންކަމަކީ މީހުންނަށް ފުރައްސާރަކޮށް، އަބުރާއި ޢިއްޒަތަށް އުނިކަން ގެނެސް، އަދި ދޮގު ފެތުރުމުގެ ހައްގު ކަމުގައި ދައްކަން. ޒިންމާދާރުކަމެއް ނެތް މިނިވަންކަމަކީ އެއްގޮތަކަށްވެސް މިނިވަންކަމެއް ނޫނެވެ, އެއީ ހަމަ ހަމަނުޖެހުމެވެ. އަދި އެއިން އާންމު ރައްޔިތުންނާއި ޢާއިލާތައް ބުހުތާނު ދޮގު ހަދާ މީހުންގެ ކިބައިން ރައްކާތެރިކަން ނެތްގޮތަށް ދޫކޮށްލެވެނީއެވެ.ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރު މުހައްމަދު ސިނާން
މީގެ އިތުރުން ސިނާން ވިދާޅުވީ ދުނިޔޭގެ އެކި ކަންކޮޅުތަކުގައި، ޒިންމާދާރު ޑިމޮކްރެސީތަކުން ޢާންމުން ބުހުތާނު ދޮގު ހަބަރު އަދި ލިޔުންތަކުން ބަދުނާމުކުރުމުން ސަލާމަތްކޮށް، ޙަޤީޤަތް ހާމަކުރުވާ ހިމާޔަތްކުރުމަށް މީޑިއާ ޤާނޫނުތައް ތަޢާރަފުކޮށްފައިވާ ކަމަށެވެ.
އަދި މިހާރު މަޖިލީހަށް ހުށަހަޅާފައި އޮތް މީޑިއާ ބިލަކީ ވެސް މި އުސޫލުގެ މަތިން އެކުލަވާލެވިފައިވާ ބިލެއް ކަމަށާއި މި ބިލު ފަރުމާކުރެވިފައިވަނީ އާންމުންގެ ޤަދަރާއި ކަރާމާތް ހިމާޔަތްކުރުމަށާއި، ޢާއިލާތައް ނުބައި ނުލަފާ ދޮގުތަކުން ސަލާމަތްކުރުމުގެ އިތުރުން ނޫސްވެރިކަމުގެ ޚިދުމަތް ތެދުވެރިކަމާއި އިންސާފުވެރިކަމާއެކު ރައްޔިތުންނަށް ފޯރުކޮށްދިނުން ކަށަވަރުކުރުމަށް ވެސް އޭނާ ބުނެފައިވެ އެވެ.
ދުނިޔޭގެ އެކި ކަންކޮޅުތަކުގައި، ޒިންމާދާރު ޑިމޮކްރެސީތަކުން ވަނީ ޢާންމުން ބުހުތާނު ދޮގު ހަބަރު އަދި ލިޔުންތަކުން ބަދުނާމުކުރުމުން ސަލާމަތްކޮށް، ޙަޤީޤަތް ހާމަކުރުވާ ހިމާޔަތްކުރުމަށް މީޑިއާ ޤާނޫނުތައް ތަޢާރަފުކޮށްފައެވެ. މީޑިއާ ބިލު ވެސް މި އުސޫލުގެ މަތިން އެކުލަވާލެވިފައިވާ އެއްޗެކެވެ. މި ބިލު ފަރުމާކުރެވިފައިވަނީ އާންމުންގެ ޤަދަރާއި ކަރާމާތް ހިމާޔަތްކުރުމަށާއި، ޢާއިލާތައް ނުބައި ނުލަފާ ދޮގުތަކުން ސަލާމަތްކުރުމަށާއި، އަދި ނޫސްވެރިކަމުގެ ޚިދުމަތް ތެދުވެރިކަމާއި އިންސާފުވެރިކަމާއެކު ރައްޔިތުންނަށް ފޯރުކޮށްދިނުން ކަށަވަރުކުރުމަށެވެ.ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރު މުހައްމަދު ސިނާން
މީގެ އިތުރުން މެމްބަރު ސިނާން ވިދާޅުވީ މިީޑިއާ ބިލުން އެއްވެސް ނޫސްވެރިއެއްގެ އަޑެއް ކަނޑުވާނުލާނެ ކަމަށާއި އެއީ އެހެން ޑިމޮކްރެސީތަކުގައި ލިބިދޭ ހައްގުތައް ދިވެހިންނަށްވެސް ލިބިދިނުމަށް ހުށަހެޅޭ ބިލެއް ކަމަށެވެ.
އަދި މި ބިލު ލަސްނުކޮށް ފާސްކުރުމަކީ މުޖުތަމަޢު ހިމާޔަތްކޮށް، ޑިމޮކްރަސީ ރައްކާތެރިކޮށް، އަދި ދިވެހި ރައްޔިތުންގެ މުސްތަޤްބަލު ޔަޤީންކުރުމަށް ކޮންމެހެން މުހިންމު ކަމެއް ކަމަށް ވެސް އޭނާ ވިދާޅުވެފައި ވެއެވެ.
ޕީއެންސީއަށް ނިސްބަތްވާ މެމްބަރު ސިނާނު މިފަދައިން ވިދާޅުވެފައިވާއިރު، ޕީއެންސީ އަށް ނިސްބަތްވާ ފޭދޫ އުތުރު ދާއިރާގެ މެންބަރު އިސްމާއީލް ނިޒާރު ވެސް ވަނީ މީޑިއާ ބިލު އަވަހަށް ފާސްކުރުމަށް ގޮވާލައްވާފަ އެވެ. އޭނާ އެފަދައިން ގޮވާލެއްވީ ރައްޔިތުން މަޖިލީހުގެ މެންބަރުންގެ މާލީ ބަޔާންތަކުން ޚަބަރު ގެނެސްދޭތީ ހިތްހަމަޖެހި ވަޑައިނުގަތުމުން އެކަމާއި ގުޅިގެން އެކްސްގައި ކުރެއްވި ޕޯސްޓެއްގައި އެވެ.
ނަމަވެސް ގިނަ ބައެއްގެ ފާޑުކިޔުންތައް އަމާޒުވުމުން، ފަހުން މެންބަރު ނިޒާރު ވަނީ އެޕޯސްޓު ސޯޝަލް މީޑިއާއިން ޑިލީޓް ކޮށްލައްވާފައެވެ.
މީޑިއާގެ މިނިވަންކަން ކޮންޓްރޯލް ކުރާ ބިލު ފާސް ކުރުމަށް މަޖިލީހުގެ ޕީއެންސީ މެންބަރުންނާއި، ސަރުކާރުގެ އިސްބޭފުޅުން ދަނީ ގޮވާލަމުންނެވެ.
އެހެންނަމަވެސް އެބިލާ ދެކޮޅަށް ގިނަ އަދަދެއްގެ ނޫސްވެރިން އަޑު އުފުލަމުންދާއިރު، ބިލު ބޭރުކޮށްލުމަށް ގޮވާލާ 151 ނޫސްވެރިން ސޮއިކޮށް މަޖިލީހުގެ އިތުރުން ރައީސް އޮފީހަށް ވަނީ ޕެޓިޝަނެއް ހުށަހަޅާފައެވެ.
