ބެލްޖިއަމް އިން އދ. ގެ ޖެނެރަލް އެސެމްބްލީ ގައި ފަލަސްތީނު ދައުލަތެއްގެ ގޮތުގައި ބަލައިގަންނާނެ ކަމަށް އެ ޤައުމުގެ ފޮރިން މިނިސްޓަރ މެކްސިމް ޕްރެވޯ އަންގާރަ ދުވަހު ވިދާޅުވެއްޖެއެވެ.

މިއީ އޮސްޓްރޭލިއާ، އިނގިރޭސިވިލާތް، ކެނެޑާ އަދި ފްރާންސް ފަދަ ޤައުމުތަކުން ފަލަސްތީނު ދައުލަތް ބަލައިގަންނާނެ ކަމަށް އިއުލާނު ކޮށްފައި ވަނިކޮށް އެ ލިސްޓަށް އިތުރުވި ޔޫރަޕިއަން ޔޫނިއަންގެ ގައުމެކެވެ.

ފަލަސްތީނު ދައުލަތެއްގެ ގޮތުގައި ބަލައިގަތުމަށް ބެލްޖިއަމް އިން ނިންމުމާއެކު އިސްރާއީލަށް އިތުރު ބައިނަލްއަޤްވާމީ ޕްރެޝަރު ކުރިމަތިވާނެ ކަމަށް ބެލެވެއެވެ.

ޣައްޒާގައި ހިންގަމުންދާ ހަނގުރާމައާ ގުޅިގެން އިސްރާއީލަށް ދުނިޔޭގެ ފާޑުކިޔުންތައް އިތުރުވަމުންދާ ދަނޑިވަޅެއްގައި، މި މަހު އދ. ގައި ބޭއްވޭ ސަމިޓު ގައި ފަލަސްތީނު ދައުލަތެއް ރަސްމީކޮށް ބަލައިގަތުމަށް ގިނަ ގައުމުތަކަކުން ނިންމަމުން ގެންދާތީ އިސްރާއީލުން ވަނީ ރުޅި ގަދަވެފައެވެ.

ދެ ދައުލަތުގެ ހައްލަކަށް މަގުފަހި ކުރުމަށް، ފަލަސްތީނު ދައުލަތެއް އިސްރާއީލް އާ އެކުގައި ސުލްހަވެރިކަމާއެކު ދެމި އޮތުމަށް މަގުފަހިކުރާނެ ކަމަށް ބެލޭ ނިއުޔޯކް ޑިކްލަރޭޝަން ގައި ސޮއިކުރާ ފަރާތްތަކާ ބެލްޖިއަމް އިން ގުޅޭނެކަމަށް ޕްރެވޯ އެކްސްގައި ޕޯސްޓް ކުރެއްވިއެވެ.

"ފަލަސްތީނުގައި، ޚާއްޞަކޮށް ޣައްޒާގައި ހިނގަމުންދާ އިންސާނީ ބިރުވެރިކަމާއި، ބައިނަލްއަޤްވާމީ ޤާނޫނާ ޚިލާފަށް އިސްރާއީލުން ހިންގާ އަނިޔާވެރި ކަމަށް ދޭ ރައްދެއްގެ ގޮތުން" މި ނިންމުން ނިންމީ ކަމަށް ޕްރެވޯ އިތުރުކުރެއްވިއެވެ.

ބެލްޖިއަމްގެ މި ނިންމުމަކީ އިސްރާއީލުގެ އާބާދީ އިތުރުކުރުމާއި އެ ސަރަޙައްދުތަކުގައި އަސްކަރީ ހަރަކާތްތައް ހިންގުމާ ދެކޮޅަށް ވެސް ދޭ ސިޔާސީ ސިގްނަލެއް ކަމަށް ބެލެވެއެވެ.

އެމެރިކާގެ ރައީސް ޑޮނަލްޑް ޓްރަމްޕް ވަނީ ކެނެޑާ އިން ފަލަސްތީނު ދައުލަތަކަށް ތާއީދު ކުރާކަން ހާމަ ކުރުމުން ފާޑުވިދާޅުވެފައެވެ.

އޭގެ އިތުރުން އެމެރިކާގެ ޚާރިޖީ ވަޒީރު ރުބިއޯ ވިދާޅުވެފައި ވަނީ ފްރާންސްގެ ނިންމުމަކީ ރިސްކް ބޮޑު ނިންމުމެއް ކަމަށެވެ.

ހޮނިހިރު ދުވަހު ކޯޕެންހޭގަންގައި ބޭއްވުނު ބައްދަލުވުމެއްގައި ޔޫރަޕިއަން ޔޫނިއަންގެ ފޮރިން މިނިސްޓަރުން ޣައްޒާގެ ހަނގުރާމަ އާ ގުޅޭގޮތުން ވަރަށް ބޮޑަށް ދެބައިވެފައިވާކަން ފާހަގަ ކުރެވުނެވެ. ބައެއް މިނިސްޓަރުން ގޮވާލެއްވީ، އިސްރާއީލަށް ވަރުގަދަ އިޤްތިޞާދީ ފިޔަވަޅުތަކެއް އެޅުމަށެވެ. އަނެއްބައި މިނިސްޓަރުން މިފަދަ ފިޔަވަޅުތަކަކާ ވަރަށް ބޮޑަށް ދެކޮޅުހައްދަވާފައި ވެއެވެ.

ފަލަސްތީނު ރައްޔިތުން އަބަދުވެސް ބޭނުން ވަނީ އިސްރާއީލުން ހިފާފައިވާ ވެސްޓް ބޭންކާއި ޣައްޒާގައި، އިރުމަތީ ޖެރޫސަލަމް އެތަނުގެ ވެރިރަށް ކަމުގައި ހިމެނޭ ދައުލަތެއް ޤާއިމު ކުރުމެވެ.

އެމެރިކާ އިން ބުނަނީ މިފަދަ ދައުލަތެއް ޤާއިމު ކުރެވޭނީ އިސްރާއީލާއި ފަލަސްތީނުގެ ސީދާ މަޝްވަރާތަކެއްގެ ތެރެއިން އެކަނި ކަމުގައެވެ.

ޔޫރަޕިއަން ޔޫނިއަންގެ މެންބަރެއް ކަމަށްވާ ބެލްޖިއަމް އިން މި ނިންމުން ނިންމީ އިސްރާއީލުގެ ސަރުކާރާއި ހަމާސް އަށް ޕްރެޝަރު އިތުރު ކުރުމަށް ކަމަށް ޕްރެވޯ ވިދާޅުވިއެވެ.

ހުޅަނގުގެ ގިނަ ގައުމުތަކަކުން އދ. ގެ އާންމު މަޖިލީހުގައި ފަލަސްތީނު ދައުލަތް ބަލައިގަތުން އިއުލާނު ކުރާނެ ކަމަށް ބުނެފައި ވާއިރު، އެމެރިކާ އިން ވަނީ ސެޕްޓެމްބަރުގައި އދ. ގައި ބޭއްވޭ ސަމިޓަށް ފަލަސްތީނު އޮތޯރިޓީގެ ރައީސް މަޙްމޫދު އައްބާސް ނިއުޔޯކަށް ދަތުރުކުރުން މަނާ ކުރާނެ ކަމަށް ހުކުރު ދުވަހު ބުނެފައެވެ.