މީޑިއާ ކޮންޓްރޯލް ކުރާ ބިލު ބޭރުކޮށްލުމަށް ބައިނަލްއަގުވާމީ ޖަމިއްޔާތަކުން ސަރުކާރަށް ގޮވާލައިފި

ރާއްޖޭގެ މީޑިއާ އަދި ބްރޯޑްކާސްޓިންގ ރެގިއުލޭޝަން ބިލަކީ ނޫސްވެރިކަމުގެ މިނިވަންކަމަށް ނުރައްކާތެރި ބިލެއް ކަމަށް ބުނެ، ހިއުމަން ރައިޓްސް ވޮޗް އާއި އައި.އެފް.ޖޭ އާއި ސީ.ޕީ.ޖޭ ފަދަ ބޮޑެތި ބައިނަލްއަޤްވާމީ ޖަމިއްޔާތަކުން ރައީސް މުޢިއްޒަށް ސިޓީއެއް ފޮނުވައިފި އެވެ.

މި ސިޓީގައި ބަޔާންކޮށްފައިވާ ގޮތުގައި، މެންބަރު އަބްދުލް ހަންނާން އަބޫބަކުރު ހުށަހަޅުއްވާފައިވާ މި ބިލަކީ ވަގުތުން ވަގުތަށް އަނބުރާ ގެންދަންޖެހޭ ބިލެކެވެ. މި ބިލުގެ ސަބަބުން އުފެދޭ މީޑިއާ އެންޑް ބްރޯޑްކާސްޓިންގ ކޮމިޝަނަށް ނޫސްވެރިންނާއި މީޑިއާ އައުޓްލެޓްތަކަށް ބޮޑެތި ޖޫރިމަނާ ކުރުމުގެ ބާރު ލިބިގެންދާނެއެވެ.

ކޮމިޝަނަށް ލިބިދޭ ބާރުތަކުގެ ތެރޭގައި ނޫސްތަކުގެ ވެބްސައިޓްތައް ބްލޮކްކުރުމާއި، ބްރޯޑްކާސްޓް ހުއްޓުވުމާއި، ނޫސްވެރިންނަށް 5،000 އިން 25،000 ރުފިޔާއާ ހަމައަށް އަދި މީޑިއާ އައުޓްލެޓްތަކަށް 100،000 ރުފިޔާއާ ހަމައަށް ޖޫރިމަނާ ކުރުމުގެ ބާރު ލިބިދެ އެވެ.

7 މެންބަރުންގެ މައްޗަށް އެކުލެވޭ މި ކޮމިޝަނުގެ 3 މެންބަރުންނާއި ކޮމިޝަނުގެ ރައީސް އައްޔަންކުރާނީ ރައީސުލްޖުމްހޫރިއްޔާއެވެ. މޯލްޑިވްސް ޖަރނަލިސްޓް އެސޯސިއޭޝަން (އެމް.ޖޭ.އޭ) އިން ވަނީ މި ބިލާ ދެކޮޅަށް އިހްތިޖާޖްކޮށް، ބިލު ބޭރުކޮށްލުމަށް ގޮވާލައިފަ އެވެ.

ޤާނޫނުއަސާސީގެ 28 ވަނަ މާއްދާގައި ކަށަވަރުކޮށްދީފައިވާ ނޫސްވެރިކަމުގެ މިނިވަންކަމާއި، 27 ވަނަ މާއްދާގައި ކަށަވަރުކޮށްދީފައިވާ ޚިޔާލުފާޅުކުރުމުގެ މިނިވަންކަން ހިމާޔަތްކުރުމަށް ގޮވާލާ މި ބަޔާނުގައި، މީޑިއާ ރެގިއުލޭޓްކުރުމުގެ ކުރިން ދާއިރާގެ ފަރާތްތަކާ މަޝްވަރާކުރުމުގެ މުހިންމުކަން ފާހަގަކޮށްފައިވެ އެވެ.

ވެރިކަންކުރާ ޕީއެންސީއަށް ނިސްބަތްވާ ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމްގެ އެހީތެރިކަމާއެކު ތުޅާދޫ ދާއިރާގެ މެންބަރު އަބްދުއްހަންނާން އަބޫބަކުރު ހުށަހެޅުއްވި މި ބިލާ ދެކޮޅަށް ރާއްޖޭގެ މީޑިއާތަކުންވެސް ދަނީ އަޑު އުފުލައި އިހުތިޖާޖު ކުރަަމުންނެވެ.

މި ސިޓީގައި ސޮއިކޮށްފައިވާ ޖަމްޢިއްޔާތަކުގެ ތެރޭގައި ހިއުމަން ރައިޓްސް ވޮޗް، އިންޓަނޭޝަނަލް ފެޑެރޭޝަން އޮފް ޖާނަލިސްޓްސް، މޯލްޑިވްސް ޖާނަލިސްޓްސް އެސޯސިއޭޝަން އަދި އޭޝިއާގެ އެކި ގައުމުތަކުގެ ނޫސްވެރިންގެ ޖަމްޢިއްޔާތައް ހިމެނެއެވެ.