ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ) ސަމިޓުގައި ބައިވެރިވެވަޑައިގަތުމަށް ރައީސް ޑރ. މުހައްމަދު މުއިއްޒު ޗައިނާ އަށް ފުރާވަޑައިގެންފި އެވެ.
މި ދަތުރުފުޅުގައި ރައީސް މުއިއްޒު، ޗައިނާގެ ރައީސް ޝީ ޖިންޕިންގ އާއި ބައްދަލުކުރައްވަން ހަމަޖެހިފައި ވެއެވެ. އަދި މީގެ އިތުރުން، އެސް.ސީ.އޯ ގެ މެންބަރު ޤައުމުތަކުގެ އިސްވެރިންނާވެސް ބައްދަލުކުރައްވާނެއެވެ. މިސަމިޓުގެ މަތީ ފަންތީގެ ބައްދަލުވުންތަކުގައި ރައީސް މުއިއްޒު ބައިވެރިވެވަޑައިގަންނަވާނެ ކަމަށް ރައީސް އޮފީހުން މައުލޫމާތު ދީފައިވެއެވެ.
އެސްސީއޯ ޕްލަސް ބައްދަލުވުމުގައި ރައީސް މުއިއްޒު ދެއްވާ ޚާއްސަ ބަޔާނުގައި، މޫސުމަށް އަންނަ ބަދަލުތަކާއި، އިޤްތިޞާދީ ގޮންޖެހުންތަކާއި، ޖިއޯޕޮލިޓިކަލް ނުތަނަވަސްކަން ފަދަ މައްސަލަތަކަށް ހައްލު ހޯދުމުގައި ބައިނަލްއަޤުވާމީ އެއްބާރުލުމުގެ މުހިންމުކަމުގެ މައްޗަށް އަލިއަޅުއްވާލައްވާނެ ކަމަށް ވަނީ ރައީސް އޮފީހުން ވަނީ ހާމަކުރައްވާފައެވެ.
އެސްސީއޯ އަކީ 2001 ވަނަ އަހަރު އުފެދުނު، ޔޫރޭޝިޔާ ސަރަޙައްދުގެ މުހިންމު ޖަމުޢިއްޔާއެކެވެ. މި ޖަމުޢިއްޔާ އުފެއްދި 6 ޤައުމުގެ ތެރޭގައި ޗައިނާ، ރަޝިޔާ، ކަޒަކްސްތާން، ކިރްގިސްތާން، ތަޖިކިސްތާން އަދި އުޒްބެކިސްތާން ހިމެނެއެވެ. މިހާރު މި ޖަމުޢިއްޔާގައި 10 މެންބަރު ޤައުމު ހިމެނޭއިރު، މިއީ ޖިއޯގްރަފީ އާއި އާބާދީގެ ނިސްބަތުން ދުނިޔޭގެ އެންމެ ބޮޑު ސަރަޙައްދީ ޖަމުޢިއްޔާއެވެ.
ދިވެހިރާއްޖެއަކީ އެސް.ސީ.އޯ ގެ ޑަޔަލޮގް ޕާޓްނަރެއްގެ ހައިސިއްޔަތުން ހަރަކާތްތެރިވާ ޤައުމެކެވެ. މި ގޮތުން، ސިޔާސީ، އިޤްތިޞާދީ އަދި ދިފާޢީ ދާއިރާތަކުން ޖަމުޢިއްޔާގެ މެންބަރު ޤައުމުތަކާއެކު ގުޅުން ބަދަހިކުރުމަށް ރާއްޖެއިން މަސައްކަތްކުރަމުން ގެންދެއެވެ.