ވެރިކަމާ ހަވާލުވެވަޑައިގަތުމަށް ފަހު މުއިއްޒު ގެންދަވަނީ އިންސާނީ ހައްގުތައް ނިގުޅައިގަންނަމުން: ހިއުމަން ރައިޓްސް ވޮޗް
29 އޯގަސްޓު 2025 | ހުކުރު 18:12ރައީސް މުއިއްޒު ވެރިކަމާ ހަވާލުވުމަށްފަހު އިންސާނީ ހައްގުތައް ނިގުޅައިގަންނަމުން އެބަދޭ
ރައީސް ޑރ މުހައްމަދު މުއިއްޒު: މީޑިއާގެ މިނިވަންކަން ނިގުޅައިގަތުމަށް ރައީސް މުއިއްޒު މަސައްކަތް ކުރައްވާ ކަމަށް ވިދާޅުވި
ވެރިކަމާ ހަވާލުވެވަޑައިގަތުމަށް ފަހު ރައީސް ޑރ. މުހައްމަދު މުއިއްޒު ގެންދަވަނީ އިންސާނީ ހައްގުތައް ނިގުޅައިގަންނަމުން ކަމަށް އިންސާނީ ހައްގުތަކަށް ވަކާލާތުކުރާ ބައިނަލްއަގުވާމީ ޖަމިއްޔާ ހިއުމަން ރައިޓްސް ވޮޗުން މިއަދު ބުނެފިއެވެ.
ހިއުމަން ރައިޓްސް ވޮޗުން އެފަދައިން ބުނީ ރާއްޖޭގެ މިނިވަން މީޑިއާ ކޮންޓްރޯލް ކުރުމަށް މި ސަރުކާރުން މަސައްކަތް ކުރަމުން ގެންދިއުމާއި ގުޅިގެން ނެރުނު ނަޔާނެއްގަ އެވެ.
ހުކުރު ދުވަހު ނެރުނު ބަޔާނުގައި ވަނީ، މީޑިއާތައް ކޮންޓްރޯލްކުރުމަށް ސަރުކާރަށް މަގުފަހިވާ ގޮތަށް ރައްޔިތުންގެ މަޖިލީހަށް ހުށަހަޅާފައިވާ ބިލާއި، ލޯކަލް ކައުންސިލްތަކުގެ ބައެއް ބާރުތައް ހަނިވާގޮތަށް އިދާރީ ދާއިރާތައް ހިންގުމުގެ ގާނޫނަށް ގެނައި އިސްލާހުތައް އަނބުރާ ގެންދަން ގޮވާލައިފައެވެ.
އެ ޖަމިއްޔާއިން ބުނީ، ވެރިކަމާ ހަވާލުވެވަޑައިގަތުމަށް ފަހު ރައީސް ޑރ. މުހައްމަދު މުއިއްޒު ގެންދަވަނީ އިންސާނީ ހައްގުތައް ނިގުޅައިގަންނަމުން ކަމަށާއި އެގޮތުން އެންމެ ފުރަތަމ ވެސް ހަމަލާ އަމާޒުވީ މީޑިއާތަކަށް ކަމަށެވެ.
މީޑިއާ ކޮންޓްރޯލްކުރުމަށް ހުށަހެޅި ބިލާއި ކައުންސިލްތަކުގެ ބާރުތައް ހަނިވާ ގޮތަށް ސަރުކާރުން ގާނޫނު އިސްލާހުކުރުމުގެ ސަބަބުން، 2008ވަނަ އަހަރު ފާސްކުރި ފެހި ޤާނޫނުއަސާސީގެ ކުރިން އޮތް ހާލަތަށް ރާއްޖެ ސޮއްސާލުމުގެ ބިރު އެބައޮތް ކަމަށް އެ ޖަމްޢިއްޔާއިން ވަނީ ބުނެފަ އެވެ.
މިކަމާ ގުޅިގެން ހިއުމަން ރައިޓްސް ވޮޗްގެ އޭޝިއާ ބައްރުގެ ޑިރެކްޓަރު އިލެއިން ޕިއާސަން ވިދާޅުވީ، 2023ވަނަ އަހަރު ވެރިކަމާ ހަވާލުވެވަޑައިގަތުމަށް ފަހު، ރައީސް މުއިއްޒު، އިންސާނީ ހައްގުތައް ނިގުޅައިގަންނަމުން އަންނަ ކަމަށާއި، އެގޮތުން ރައީސް އެންމެ ފުރަތަމަ ދިމާކުރެއްވީ މީޑިއާތަކުގެ މިނިވަންކަމަށް ކަމަށެވެ.
ރައީސުލްޖުމްހޫރިއްޔާ މުހައްމަދު މުއިއްޒު 2023، ގައި ވެރިކަމާ ހަވާލުވެވަޑައިގެންނެވުމަށްފަހު ގެންދަވަނީ އިންސާނީ ހައްގުތައް ނިގުޅައިގަންނަމުން، އެންމެ ފުރަތަމަ ނިގުޅައިގަންނަ ހައްގަކަށް މިވީ ނޫސްވެރިކަމުގެ މިނިވަންކަންހިއުމަން ރައިޓްސް ވޮޗްގެ އޭޝިއާ ބައްރުގެ ޑިރެކްޓަރު އިލެއިން ޕިއާސަން
ހިއުމަން ރައިޓްސް ވޮޗުން ވަނީ މަސްތުވާތަކެތި ޓްރެފިކް ކުރާ މީހުންނަށް މަރުގެ އަދަބު ދޭން ސަރުކާރުން ކުރަމުން ގެންދާ މަސައްކަތާއި ލޯކަލް ކައުންސިލްތަކުގެ އިދާރީ ބާރުތައް ހަނިކުރަން ފާސްކުރި ގާނޫނާ ގުޅިގެން ވެސް ކަންބޮޑުވުން ފާޅުކޮށްފަ އެވެ.
