ގިނަ އަދަދެއްގެ ނޫސްވެރިން ޖަލަށް ލާނެ ކަން ދޭހަވާ މޭރުމަކުން ފަލާހު ވާހަކަ ދައްކަވައިފި!

ގިނަ އަދަދެއްގެ ނޫސްވެރިން ޖަލަށް ލާނެ ކަން ދޭހަވާ މޭރުމަކުން ސަރުކާރު ހިންގާ ޕާޓި ޕީއެންސީގެ ޕީޖީ ލީޑަރު އިބްރާ ފަލާހު ވާހަކަ ދައްކަވައިފި އެވެ.

"އެކްސް" ގައި ކުރި ޕޯސްޓެއްގައި ފަލާހު ވިދާޅުވީ، އޭނާގެ މައްސަލަ ބެލުމުގެ ގާނޫނީ ލަފަޔަކަށް އެދި ޕްރޮސިކިއުޓަރ ޖެނެރަލްގެ އޮފީހަށް ހުށަހަޅާފައި ވާކަމަށް ފުލުހުން ނިންމި ނިންމުމަކީ ވަރަށް ރަނގަޅު ނިންމުމެއް ކަމަށެވެ. ފަލާހު ޖަލުގައި އުޅޭނަމަ އެތާގެ ރަހުމަތްތެރިންނަށް ވާނީ އެމްޑީޕީގެ ވެރިކަންކުރި ރައީސުންނާ އެމްޑީޕީގެ ގިނައަދަދެއްގެ މަޖިލީސް މެމްބަރުން ކަމަށް ފަލާހު ވިދާޅުވި އެވެ. އަދި ޖަލުގައި އެއްމެގިނަވާނީ ނޫސްވެރިން ކަން ދޭހަވާ މޭރުމަކުން ފަލާހު ވަނީ ވާހަކަ ދައްކަވާފައެވެ.

Advertisement

ފަލާހު ވިދާޅުވީ މީހަކު މަރަން ބުނެފައެއް ނޯންނާނެ ކަމަށާއި އުލުބެއިންދުން ފަލާހުމެން ހިސާބުގައި ބޭނުންކުރަނީ ބަސްނާހާ މީހުން ބިމަށްވުރެ މަތީތާކަށް އެރުވުމަށް ކަމަށެވެ. އެހެން ނަމަވެސް ދިވެހި ބަހުގެ ރަދީފުގައި އުލުބޭންދުން މާނަކޮށްފައިވަނީ، މާ އިހު ޒަމާނުގައި މީހުން މަރަން ހަދާގޮތެއް ކަމުގައި ބުނެވޭ ގޮތެއް ކަމަށެވެ.

އުލުބޭންދުން: މާ އިހު ޒަމާނުގައި މީހުން މަރަން ހަދާގޮތެއް ކަމުގައި ބުނެވޭ ގޮތެއް. އުލުބައިންދާ އިރު ހަދާގޮތެއް ކަމަށް ބުނަނީ ތޫނުކޮށްފައި ހުންނަ ދަގަނޑު އުލެއްގައި މީހާ ބައިންދަނީއެވެ. ބޭންދީމާ އެ އޫ ފުރަގަސް ފަރާތުން ވަދެގެންގޮސް ބޮލުން ނުކުންނަނީއެވެ.

ދިވެހި ބަހުގެ ރަދީފް

ދިވެހި ބަހުގެ ރަދީފުގައި "އުލުބޭންދުން" މާނަ

މީގެ އިތުރުން ފަލާހު ވިދާޅުވީ، ކުރިއަށް އޮތް މަދު ދުވަސްކޮޅުތެރޭގައި، މަތީގައިވާ ރައްޓެހިންނާ ބައްދަލުވާނެކަމަށް އުއްމީދުކުރާ ކަމަށެވެ. ރަދީފުގައިވާ މާނައަށް ބެލުމުން ދޭހަވަނީ އަނިޔާވެރިގޮތުގައި މަރުގެ އަދަބުދޭން ޖެހޭ ކަމަށެވެ. ފަލާހު އެހެން ވިދާޅުވި މައްސަލަ، ނޫސްވެރިންގެ ޖަމިއްޔާ އެމްޖޭއޭއިން ވަނީ ފުލުހަށް ހުށަހަޅައިފައެވެ.

މި ކަމާ ގުޅޭގޮތުން ހުކުރު ދުވަހު ފުލުހުން ބުނީ ފަލާހު، މަޖިލީހުގެ ތަޅުމުގައި ދައްކަވައިފައިވާ ވާހަކައަކާ ގުޅިގެން އެމްޖޭއޭއިން ހުށަހަޅާފައިވާ މައްސަލައެއް ތަހުގީގު ކުރުމާމެދު ގާނޫނީ ލަފައަކަށް އެދި، އިއްޔެ ޕްރޮސެކިއުޓަރ ޖެނެރަލްގެ އޮފީހަށް ހުށަހަޅައިފައިވާ ކަމަށެވެ.

ފަލާހުގެ މައްސަލަ ފުލުހަށް ހުށަހެޅި ދިވެހި ނޫސްވެރިންގެ ޖަމިއްޔާ (އެމްޖޭއޭ) އިން ބުނީ އިސްލާމްދީނުގެ މައިގަނޑު އަސާސްތަކުގެ ތެރޭގައި އެއްވެސް މީހަކަށް އަނިޔާވެރިނުވުން ހިމެނޭއިރު، ފަލާހް ދެއްކެވި ވާހަކައަކީ އިސްލާމްދީނުގެ އަސްލުތަކާވެސް ހިލާފު ވާހަކައެއް ކަމަށެވެ. އެކަމަކީ ނޫސްވެރިންނާއި މީޑިއާތަކުގައި މަސައްކަތްކުރާ މީހުންނަށް އެކަމުގެ ސަބަބުން ބިރުވެރިކަމުގެ ތެރެއަށް ވެއްޓޭ ކަމެއް ކަމަށް ވެސް އެމެޖޭއޭ އިން ބުނެފައިވެ އެވެ. އަދި މެމްބަރު ފަލާހުގެ އެ ވާހަކަ އަކީ މުޖުތަމައުގެ އަމަންއަމާންކަން ގެއްލި ހަމަނުޖެހުމަށް ގައުމު ވެއްޓިގެން ހިނގައިދާނެ ފަދަ ވާހަކަތަކެއް ކަމަށް އެމްޖޭއޭ އިން ފާހަގަކޮށްފައި ވެއެވެ.

މިނިވަން މީޑިއާ ނެތިކޮށްލަން ހުށަހަޅާފައިވާ ބިލަކާ ގުޅޭ ގޮތުން ވާހަކަދައްކަވަމުން ފަލާހު ވިދާޅުވެފައިވަނީ އޭނާއާ ގުޅޭ ގޮތުން ބައެއް މީޑިއާތަކުން ދޮގު ހަބަރުތަކެއް ފަތުރާފައިވާ ކަމަށާއި، އެފަދައިން މަސައްކަތްކުރާ މީޑިއާގެ މުވައްޒަފުން "އުލުބައިންދަން" ޖެހޭ ކަމަށެވެ.

ފަލާހު މި ވާހަކަ ދެއްކެވި ނަމަވެސް، އޭނާ ވިދާޅުވި ފަދަ ދޮގު ހަބަރުތަކެއް އެއްވެސް މީޑިއާއަކުން ުގެނެސްފައެއްނުވެއެވެ، އެ ވާހަކަތައް ދައުރުވެފައިވަނީ ހަމައެކަނި ސޯޝަލް މީޑިއާގައި ކަން ފާހަގަކުރެވެ އެވެ.