މުށުތެރެއަށް މީޑިއާ ގެނައުމަށް މަސައްކަތް ކުރަނީ މި ސަރުކާރުން ހިންގާ ޖަރީމާތަށް ފޮރުވުމަށް: ޔާމީން

ރައީސް މުއިއްޒުގެ މި ސަރުކާރުން މީޑިއާތަށް ކޮންޓްރޯލް ކޮށް މުށުތެރެއަށް ލުމަށް މަސައްކަތް ކުރަމުން އެ ގެންދަނީ ހިންގާ ޖަރީމާތަށް ފަސް އަޅައި ފޮރުވުމަށް ކަމަށް ކުރީގެ ރައީސް އަބްދުﷲ ޔާމީން އަބްދުލް ޤައްޔޫމު ވިދާޅުވެއްޖެ އެވެ.

ޔާމީން މިފަދައިން ވިދާޅުވީ ޕީއެންއެފްގެ އޮފީހުގައި ބުރާސްފަތި ދުވަހުގެ ރޭ ބޭއްވި ޖަލްސާގައި، ސަރުކާރާ ގުޅުން ބޮޑު، ތުޅާދޫ ދާއިރާގެ އަމިއްލަ މެންބަރު އަބްދުލްހަންނާން އަބޫބަކުރު ހުށަހެޅުއްވި މީޑިއާ ކޮންޓްރޯލް ބިލާ ގުޅޭގޮތުން ވާހަކަފުޅު ދައްކަވަމުންނެވެ.

ހީލަތްތެރި ރޭވުމެއްގެ ދަށުން މީޑިއާ ކޮންޓްރޯލް ކުރުމަށް ބިލެއް ފަރުމާކޮށް މަޖިލީހުގެ ތަޅުމަށް ލައިގެން އެ ބިލް ފާސްކުރަން ސަރުކާރުން ކުރަމުންގެންދާ މަސައްކަތް ހުއްޓުވުމަށް ނޫސްވެރިން އަންނަނީ އެކަމާއި ދެކޮޅަށް އަދު އުފުލައި އިހުތިޖާޖު ކުރަމުންނެވެ. އެގޮތުން ބުދަ ދުވަހާއި ބުރާސްފަތި ދުވަހު ވެސް ރައީސް އޮފީހާއި މުލިޔާގެ ކައިރިީއަށް އެއްވެސް ނޫސްވެރިން ވަނީ އިހުތިޖާޖު ކޮށްފަ އެވެ.

ރައީސް މުއިއްޒުގެ މި ސަރުކާރުން ކުރާ ބޮޑެތި ވައްކަންތަކާއި ހިންގާ ކޮރަޕްޝަނުގެ އަމަލުތައް ނޫސްވެރިން ތިލަކުރަމުން ގެންދާތީ އެކަން ހުއްޓުވުމަށް މީޑިއާތަށް ތަޅުއަޅުވައި ޚިޔާލު ފާޅުކުރުމުގެ މިނިވަންކަން ނިގުޅައިގަތުމަށް މި ސަރުކާރުން ކުރަމުން ގެންދާ މަސައްކަތް ހުއްޓާލައި މިހާރު ހުށަހަޅާފައި އޮތް ބިލު ވަގުތުން ބޭރުކުރުމަށް ބައިނަލްއަޤުވާމީ ޖަމްޢިއްޔާތަކާއި ޖަމާއަތްތަކުން ދަނީ ގޮވާލަމުންނެވެ.

މިކަމާއި ގުޅިގެން ވާހަކަދައްކަވަމުން ޔާމީން ވިދާޅުވީ، މި ސަރުކާރުން މީޑިއާތަށް ކޮންޓްރޯލް ކޮށް މުށުތެރެއަށް ލުމަށް މަސައްކަތް ކުރަމުން އެ ގެންދަނީ ގިނަ ކަންކަން ފަސް އަޅައި ފޮރުވުމަށް ކަމަށެވެ. އަދި ބިލާ ގުޅޭގޮތުން ރައީސް މުއިއްޒު ނޫސްވެރިންނާ ބައްދަލުކުރެއްވީ ގޮތް ހުސްވެގެން ކަމަށް ޔާމީން ވިދާޅުވި އެވެ.

ޔާމީން ވިދާޅުވީ ނޫސްވެރިންނާ ބައްދަލުކުރެއްވުމަށް ފަހު، ރައީސް ނޫސްވެރިންގެ ކަންބޮޑުވުންތައް ފުރިހަމައަށް ބައްލަވައި އެކަންކަން ހައްލުކުރައްވަން ޖެހޭ ކަމަށެވެ.

އެއާއެކު، މީޑިއާތައް ކޮންޓްރޯލްކުރުމާއި، ކޮންޓްރޯލް ބިލުގެ ދަށުން އުފައްދާ ކޮމިޝަންގެ ބާރު ބޭނުންފުޅުނުވާ ކަން ރައީސް ވިދާޅުވި ވިދާޅުވުން ޔާމީން ފާހަގަކުރެއްވިއެވެ.

ބޭނުންގޮތެއް ނޫނޭ ވިދާޅުވާއިރު މީގެ ޕެރަލަލްތައް އެބަހުރި، އިލެކްޝަން ކޮމިޝަންގެ ރައީސަކީ މުއިއްޒު އައްޔަންކުރާ މީހެއް، އޭސީސީގެ ރައީސަކީ މުއިއްޒު އައްޔަންކުރާ މީހެއް، ކުރީގަ އޮވެއްޖިއްޔާ މި އޮންނަނީ އެ މީހުންގެ ތެރެއިން ވޯޓު ލައިގެން ހޮވޭ މީހެއް، މި ހުރިހާ ތަނެއް މުއިއްޒު ކޮންޓްރޯލްކުރަނީ، އެކަމަކު މިހާރު މި ބުނަނީ މި ބިލުގަ އެބައޮތޭ މިހެން ވެސް، ތިމަންނަ ބޭނުމެއް ނޫނޭ އެކަމެއް

ކުރީގެ ރައީސް އަބްދުالله ޔާމީން

މީޑިއާތައް ކޮންޓްރޯލްކުރަން ބޭނުންފުޅުނުވާ ކަމަށް ރައީސް ވިދާޅުވަމުން ގެންދެވި ނަމަވެސް، މުހިންމު މިނިވަން މުއައްސަސާތަކުގެ ވެރިން އައްޔަންކުރައްވަނީ ރައީސް ކަމަށާއި، އެ މުއައްސަސާތައް ހިންގުމުގެ ޒިންމާ އުފުލަނީ ވެސް އެ ބޭފުޅުން ކަމަށް ޔާމީން ވިދާޅުވިއެވެ. އެހެންކަމުން ރައީސްގެ އިޚުލާސްތެރިކަމެއް ނެތް ކަމަށް ޔާމީން ވިދާޅުވިއެވެ.

ޔާމީން ވިދާޅުވީ، ސަރުކާރު ޖަވާބުދާރީކުރުވޭނެ ފަދަ މުއައްސަސާއެއް މިވަގުތު މި ގައުމުގައި ނެތްއިރު، ސަރުކާރު ޖަވާބުދާރީކުރުވަން މީޑިއާ އޮންނަން ޖެހޭ ކަމަށެވެ.

އެމަނިކުފާނު ވިދާޅުވިގޮތުގައި، މިވަގުތު މިނިވަންކަމާއެކު އޮތް އެއް ބާރަކީ މީޑިއާކަމަށް ވާއިރު، މީޑިއާތައް ކޮންޓްރޯލްކުރަން ސަރުކާރުން މަސައްކަތްކުރަނީ ސަރުކާރުން ކުރާ ގޯސް ކަންކަމަށް ރައްޔިތުން ފާޑުކިޔާތީ އެ ފާޑުކިއުންތަކުގައި މަތިއެޅުމުގެ ގޮތުންނެވެ.

ޔާމީން ވިދާޅުވީ ސަރުކާރުގައި ތިއްބަވާ ވެރިންގެ ވާހަކަ ރައްޔިތުން ދައްކަނީ ވެރިންގެ ފަސްބައިގައި ކަންތައްތަކެއް ހުރުމުން ކަމަށާއި ޖެހިގެން އުޅޭ މައްސަލައަކީ ސަރުކާރުން ހިންގާ ބޮޑެތި ޖަރީމާތަކުގެ އަޑު ކަނޑުވާލަން ޖެހޭ ޖެހުން ކަމަށެވެ.

މީޑިއާ ކޮންޓްރޯލްކުރާ ބިލު ފާސްކުރަން ޖެހޭ ސަބަބާ މެދު ސުވާލު އުފައްދަވައި އެމަނިކުފާނު ވިދާޅުވިގޮތުގައި އާންމުންގެ ކަންކަމާ ހަވާލުވެ ތިބޭ މީހުން ގޯސް ހަދާ ގޯސްތަކުގެ ވާހަކަ އާންމުން އަބަދު ވެސް ދައްކާނެއެވެ.