މިނިވަން މީޑިއާ ކޮންޓްރޯލް ކުރާ ބިލު މަޖިލީހުން ބަލައިގެންފި

މިނިވަން މީޑިއާ ނެތިކޮށްލައި ރައީސް ޑރ މުހައްމަދު މުއިއްޒު ބޭނުންވާ ގޮތަށް މީޑިއާތައް ކޮންޓްރޯލް ކުރުމަށް ހުށަހެޅި ބިލް ރައްޔިތުންގެ މަޖިލީހުން ބަލައިގެންފި އެވެ.

މަޖިލީހުން މި ބިލު ބަލައިގެންފައިވަނީ އެ ބިލާމެދު އެތައް ކަންްބޮޑުވުމެއް ނޫސްވެރިން ފާޅުކުރަމުން ދަނިކޮށެވެ. އިދިކޮޅު މެންބަރުން އިހުތިޖާޖު ކުރަމުން ދަނިކޮށް ނެގި ވޯޓުގައި މި ބިލު ބަލައިގަތީ ސަރުކާރު ހިންގާ ޕީއެންސީގެ މެޖޯރިޓީ އާއެކު އެވެ. ބިލާ އެއްކޮޅަށް 49 މެންބަރުން ވޯޓު ދެއްވިއިރު ބިލު ބަލައިނުގަންނަން 12 މެންބަރުން ވޯޓު ދެއްވި އެވެ.

Advertisement

މިނިވަން މީޑިއާ ނެތިކޮށްލާ ބިލުގައި ބުނެފައި ވަނީ ބިލަށް އަމަލު ކުރަން ފެށުމާއެކު މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުގެ ނަމުގައި ކޮމިޝަނެއް އުފައްދަންޖެހޭ ކަމަށެވެ. އެ ކޮމިޝަން އުފެދުމުން މޯލްޑިވްސް ބްރޯޑްކާސްޓިން ކޮމިޝަނާއި މޯލްޑިވްސް މީޑިއާ ކައުންސިލް އުވޭނެ އެވެ.

މި ބިލަށް ބަހުސް ކުރަމުން ދިޔަ ވަގުތު ނޫސްވެރިން ވަނީ މީޑިއާ ކޮންޓްރޯލް ކުރާ ބިލު ބޭރުކޮށްލުމަށް ގޮވާލައިފަ އެވެ. މިއީ މަޖިލީހުން ބަލައިގަތުމަށްވުރެ ގޯސްކޮށް އޮތް ބިލެއް ކަމަށާއި މީޑިއާ ކޮންޓްރޯލެއް ނުކުރެވޭނެ ކަމަށް ނޫސްވެރިން ދިޔައީ ބުނަމުންނެވެ.

މިހާރު ވެސް މީޑިއާތައް ރެގިއުލޭޓް ކުރާ ދެ މުއައްސަސާ އޮތް ކަމަށާއި، ރަނގަޅުކުރަން ޖެހޭ ކަންކަން މީޑިއާތަކާއެކު މަޝްވަރާ ކުރުމަށްފަހު ހަރުދަނާ ކުރެވޭނެ ކަމަށް ނޫސްވެރިން ބުނެފައިވެއެވެ. އަދި މިއީ ނޫސްވެރިކަން ނެތިކޮށްލާ ސަރުކާރުން މިޑީއާ ކޮންޓްރޯލް ކުރުމަށް މަޖިލީހަށް ވައްދާފައިވާ ބިލެއް ކަމަށް ނޫސްވެރިން ބުނެއެވެ. ނަމަވެސް ނޫސްވެރިންގެ އަޑު އެއްސެވުމެއް ނެތި މަޖިލީހުން އެ ބިލުވަނީ ބަލައިގެންފަ އެވެ.