ޕީއެންސީގެ މަޖިލީހުގެ މެމްބަރުންގެ ސިކުނޑިތައް ރައީސް މުއިއްޒު އާއި ހަވާލު ނުކުރެއްވުމަށް މެމްބަރު މީކާއިލް ގޮވާލައްވައިފި
27 އޯގަސްޓު 2025 | ބުދަ 06:02މެންބަރުން އަމިއްލަ ވިސްނުން އިސްކޮށް، ޒިންމާ ނަގަންޖެހޭ
ރައްޔިތުން މަޖިލީހުގެ ޖަލްސާގައި ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވާހަކަދައްކަވަނީ
ޕީއެންސީގެ ރައްޔިތުންގެ މަޖިލީހުގެ މެންބަރުންގެ ސިކުނޑި ރައީސުލްޖުމްހޫރިއްޔާ ޑރ.މުހައްމަދު މުއިއްޒާ ހަވާލު ނުކުރެއްވުމަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެއެވެ.
ބުދަ ދުވަހު ރައްޔިތުންގެ މަޖިލީހުގައި މެންބަރު މީކާއިލް ވަނީ މީޑިއާ ކޮންޓްރޯލް ކުރާ ބިލާ ދެކޮޅަށް ވާހަކަދައްކަވައި، ސަރުކާރަށް ފާޑު ވިދާޅުވެފައެވެ.
މެންބަރު މީކާއިލް ވިދާޅުވީ ރައްޔިތުން މަޖިލީހުގެ މެންބަރުން އަމިއްލަ ވިސްނުން އިސްކުރަންޖެހޭ ކަމަށާއި، މެންބަރުން ޒިންމާ ނަގަންޖެހޭ ކަމަށެވެ. ނަމަވެސް ރައީސް މުއިއްޒު އެންގެވިއްޔާ އެންގެވި ގޮތަކަށް އަމަލު ކުރައްވާ ކަމަށް މެންބަރު މީކާއިލް ވިދާޅުވިއެވެ.
މީގެ އިތުރުން މެންބަރު މީކާއިލް ވަނީ، ރައީސް އޮފީހުގެ ކުޑަކުޑަ ކޮޓަރިއަކަށް ހުރިހާ މެންބަރުންގެ ސިކުނޑިތައްލައި ތަޅުނުލެއްވުމަށާއި، ރައީސް މުއިއްޒާ ސިކުނޑިތައް ހަވާލު ނުކުރެއްވުމަށް ގޮވާލައްވާފައެވެ.
ރައީސުލްޖުމްހޫރިއްޔާ އެންގެވިއްޔާ އެންގެވި ގޮތެއް މިއަދު މި ވިދާޅުވަނީ ޓެލެސީމިއާ ބިލު ފާސްކުރާށޭ. މާދަން މި ވިދާޅުވަނީ ނޫނޭ ނޫނޭ އެބިލު ފުރިހަމައެއް ނޫނޭ. ފާސްކޮށްގެން ނުވާނޭ. އިއްޒަތްތެރި ރައީސް ދެ ވަގުތު ވެސް މި ތިއްބަވަނީ ހަމަ ޕީއެންސީގެ އެއްކަލަ ބަދަހި އެކުވެރި ޕީޖީ ގުރޫޕް. އެދުވަހު ވިދާޅުވީ ވަރަށް ފުރިހަމަ ބިލެކޭ. މިއަދު ރައީސުލްޖުމްހޫރިއްޔާ އެންގެވީމަ މި ވިދާޅުވަނީ ނޫނެކޭ ބިލު ފުރިހަމައެއް ނޫނޭ. އިއްޒަތްތެރި ރައީސް ވިސްނުން އިސްކުރައްވާ. ރައީސް ޑރ.މުހައްމަދު މުއިއްޒާއި، ރައީސް އޮފީހުގެ ކުޑަކުޑަ ކޮޓަރިއަކަށް ތިހުރިހާ މެންބަރުންގެ ސިކުނޑި ތަޅުނުލައްވާށޭ އިއްޒަތްތެރި ރައީސް. ހަވާލު ނުކުރައްވާށޭ. ރައީސް ޑރ.މުހައްމަދު މުއިއްޒާ ތިބޭފުޅުންގެ ސިކުނޑި ހަވާލު ނުކުރައްވާށޭ. ވިސްނުން އިސްކުރައްވާށޭ.ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް
މީޑިއާ ކޮންޓްރޯލްކުރާ ބިލާ ދެކޮޅަށް ގިނަ ނޫސްވެރިން އަޑު އުފުލަމުންދާއިރު، ރައްޔިތުންގެ މަޖިލިސް ކައިރީގައި ގިނަ އަދަދެއްގެ އާއްމު ރައްޔިތުން ދަނީ މުޒާހަރާ ކުރަމުންނެވެ.
