އެމެރިކާ އާއެކު ވިޔަފާރީގެ މަޝްވަރާތައް ކުރިއަށް ގެންދަމުން އަންނަ ކަމަށް އިންޑިއާގެ ފޮރިން މިނިސްޓަރު ސުބްރަމަނިއަމް ޖައިޝަންކަރު ވިދާޅުވެއްޖެ އެވެ.

ޖައިޝަންކަރު މިހެން ވިދާޅުވީ އިންޑިއާގެ ވެރި ރަށް ނިއު ދިއްލީގައި ހޮނިހިރު ދުވަހު ބޭއްވުނު ހަފްލާއެއްގައި ބައިވެރިވެ ވަޑައިގެން ވާހަކަ ދައްކަވަމުންނެވެ. އެ ޙަފްލާގައި އިންޑިއާގެ ދަނޑުވަރިންނާއި، ކުދި އުފެއްދުންތަކުގެ މަސްލަޙަތު ހިމާޔާތް ކުރުމަކީ މުހިންމު ކަމެއް ކަމަށް ޖައިޝަންކަރު ވަނީ ވިދާޅުވެފަ އެވެ.

އިންޑިއާ އިން ރަޝިޔާގެ ތެޔޮ ގަތުމުގެ މުއާމަލާތްތައް ކުރިއަަށް ގެންދިޔުމާ ގުޅިގެން، އިންޑިއާގެ މުދަލުން 50 އިންސައްތައާ ހަމައަށް ޓެރިފް ނެގުމަށް އެމެރިކާ އިން ވަނީ ނިންމައިފަ އެވެ. މިއީ އެމެރިކާ އިން އެހެން ޤައުމު ތަކުގެ މުދަލުން ނަގާ އެންމެ މަތީ ޓެރިފްގެ މިންވަރެވެ.

މިހާރު އެމެރިކާ އިން އަންނަނީ އިންޑިއާގެ މުދަލުން 25 އިންސައްތައިގެ ޓެރިފް ނަގަމުންނެވެ. މި ހިނގާ އޮގަސްޓު މަހުގެ 25 ވަނަ ދުވަހުން ފެށިގެން، އިތުރު 25 އިންސައްތައިގެ ޓެރިފް ނެގުމަށް ނިންމާފައިވާ ނިންމުން ތަންފީޒު ކުރުމަށް ވަނީ ހަމަޖެހިފަ އެވެ.

އިންޑިއާގެ ފޮރިން މިނިސްޓަރު ޖައިޝަންކަރުގެ ވާހަކަފުޅުން ފާހަގަ ކުރެވުނު ގޮތުގައި، އެ މަޝްވަރާ ތަކުގައި އިންޑިއާގެ އިޤްތިޞާދީ މަސްލަޙަތު ހިމާޔާތް ކުރުމަށް އެ ޤައުމުން ގެންދަނީ ވަރަށް ބޮޑަށް މަސައްކަތް ކުރަމުންނެވެ. ނަމަވެސް، ދެ ޤައުމުގެ ދެމެދުގައި ވިޔަފާރީގެ ގުޅުން ރަނގަޅު ކުރުމަށް މަސައްކަތް ކުރާ ކަމަށް ވެސް ޖައިޝަންކަރު ވަނީ ފާހަގަ ކުރައްވައިފަ އެވެ.

އިންޑިއާގެ މުދަލުން 50 އިންސައްތައާ ހަމައަށް ޓެރިފް ނެގުމަށް އެމެރިކާ އިން ނިންމި ނަމަވެސް، ރަޝިޔާއާއެކު ކުރަމުން އަންނަ ތެލުގެ ވިޔަފާރި އަށް ބަދަލު ނުގެންނަން އިންޑިއާ އިން ވަނީ ނިންމައިފަ އެވެ. އެގޮތުން އިންޑިއާ އިން ބޭނުން ވަނީ އެމެރިކާގެ ފިޔަވަޅުތަކާ ކެރިގެން ކުރިމަތިލައި، ރަޝިޔާއާ އެކު އޮންނަ ގުޅުން ވެސް ބަދަހި ކުރަން ކަމަށް މީގެ ކުރިން ވަނީ ހާމަކޮށްފަ އެވެ.

އެގޮތުން އިންޑިއާގެ އިސް އޮފިޝަލުން ވަނީ ރަޝިޔާގެ ވެރި ރަށް މޮސްކޯ އަށް ވަޑައިގެން، ދެ ޤައުމުގެ ދެ މެދުގައި ގުޅުން ބަދަހި ކުރުމަށް މަޝްވަރާތައް ކޮށްފަ އެވެ. އަދި ދެ ޤައުމުން ވެސް ގުޅުން ބަދަހި ކުރަން ބޭނުންވާއިރު، މިއަހަރުގެ ފަހު ކޮޅު ރަޝިޔާގެ ރައީސް އިންޑިއާ އަށް ވަޑައިގަންނަވަން ހަމަޖެހިފައިވާ ކަމަށް ވެސް ވަނީ ހާމަކޮށްފަ އެވެ.