ދަގަނޑޭ އަދި ތަޖުރިބާކާރު ކޯޗު ސުޒެއިން ވެސް، އެންމެ ކާމިޔާބު ކުލަބު ނިއުރޭޑިއެންޓަށް
ސުޒެއިން ނިއުރޭޑިއެންޓާ ގުޅިފައިވަނީ ދެ އަހަރު ދުވަހުގެ އެއްބަސްވުމެއްގެ ދަށުން
ކޯޗު އަލީ ސުޒެއިން އަދި އަލީ އަޝްފާގް ވަނީ ނިއުރޭޑިއެންޓް ސްޕޯޓްސް ކުލަބާ ގުޅިފަ
ދިވެހިރާއްޖޭގެ އެންމެ ތަޖުރިބާކާރު އަދި ކާމިޔާބު ކޯޗުންގެ ތެރޭގައި ހިމެނޭ އަލީ ސުޒެއިން، ރާއްޖޭގެ އެންމެ ސަޕޯޓަރުން ގިނަ އަދި އެންމެ ކާމިޔާބު ފުޓުބޯޅަ ކުލަބު ނިއުރޭޑިއެންޓް ސްޕޯޓްސް ކުލަބުގެ ކޯޗުކަމާ ހަވާލު ވެއްޖެއެެވެ. މި ފެށޭ ސީޒަންގައި ރާއްޖޭގެ ތާރީހުގައި އުފެދުނު އެންމެ މޮޅު ފުޓުބޯޅަ ކުޅުންތެރިޔާ، އަލީ އަޝްފާގް (ދަގަނޑޭ) ވެސް ފެނިގެންދާނީ ނިއުރޭޑިއެންޓުން ކަން، ނިއުގެ ޗެއާމަން އަހުމަދު މުބީން ދާދިފަހުން ހާމަކޮށްފައި ވެއެވެ. އަދި އާ ކޯޗު ސުޒެއިން ވެސް ވަނީ މިކަން ކަށަވަރު ކޮށްދީފައެވެ.
ސުޒެއިން ކްލަބާ ގުޅުނުކަން، ނިއުރޭޑިއެންޓް ސްޕޯޓްސް ކުލަބުން އަދި ރަސްމީކޮށް އިއުލާނު ކޮށްފައެއް ނުވެއެވެ. ނަމަވެސް ރާއްޖެ އެމްވީ އަށް މައުލޫމަތު ދެމުން ކޯޗު އަލީ ސުޒެއިން ވަނީ ނިއުރޭޑިއެންޓްގެ ކޯޗުކަމާ ހަވާލުވިކަން ކަށަވަރު ކޮށްދީފައެވެ. އަދި ނިއުރޭޑިއެންޓާ ހަވާލުވެފައި ވަނީ ދެ އަހަރު ދުވަހުގެ އެއްބަސްވުމެއްގެ ދަށުން ކަމަށްވެސް ސުޒެއިން މައުލޫމާތު ދީފައިވެއެވެ.
ސުޒެއިން ވަނީ ނިއުރޭޑިއެންޓާ އެންމެ ވާދަވެރި، ވިކްޓްރީ ސްޕޯޓްސް ކްލަބްގައި ކުޅުންތެރިއެއްގެ އިތުރުން ކޯޗެއްގެ ގޮތުގައިވެސް ގިނަ އަހަރުތަކެއް ވަންދެން މަސައްކަތް ކޮށްފައެވެ. އެންމެ ކުޑައިރު، ވިކްޓްރީ ނިއުރޭޑިއެންޓް އަތުން ބަލިވެއްޖެ ނަމަ ގެޔަށް އައިސް ރޯން އޮންނަކަން ސުޒެއިން ފާހަގަކުރިއެވެ. ނިއުރޭޑިއެެންޓްގެ ކޯޗު ކަމާ ހަވާލުވުމުން ކުރެވެނީ ވަރަށް ތަފާތު އިހުސާސެއްކަން ފާހަގަ ކުރަމުން ސުޒެއިން ބުނީ ނިއުރޭޑިއެންޓްގައި މަސައްކަތް ކުރުމުގެ ފުރުސަތު ލިބުމަކީ އޭނާގެ ކޯޗިން ކެރިޔަރަށް ލިބިގެންދާ އިތުރު ފުރިހަމަ ކަމެއް ކަމުގައެެވެ.
ދެން ވިކްޓްރީ ނިއުރޭޑިއެންޓްގެ ވާދަވެރިކަމަކީ ....އަޅުގަނޑުމެން ކުޑައިރުގަ މެޗުބަލަން ދާއިރު ވިކްޓްރީ ނިއުރޭޑިއެންޓް އަތުން މެޗަކުން ބަލިވިއްޔާ ގެޔަށް އައިއްސަ ރޯނެ... އެހާވެސް ވާދަވެރިކަން ބޮޑު، އެހާވެސް އަޅުގަނޑުމެން ވިކްޓްރީވެފަ އޭރު ތިބެނީ... އެހެން ނަމަވެސް މިހާރު ބަދަލުވެގެން އައިސް އަޅުގަނޑުގެ ކެރިއާގެ އެންމެ ފަހު ދުވަސްތައް މިހާރު މި އަންނަނީ، ގާތް ގަނޑަކަށް 5 ވަރަކަށް އަހަރު ތެރޭގަ އަޅުގަނޑުވެސް ދެން ހަމަ ގެޔަށް އަންނާނީ، އޭގެ ކުރިން އަޅުގަނޑުގެ ކެރިޔާއަށްވެސް އަންނަ އިތުރު ފުރިހަމަ ކަމެއް ކަމަށް އަޅުގަނޑު ގަބޫލުކުރަނީ ނިއުރޭޑިއެންޓްގަ މަސައްކަތް ކޮށްލެވުމަކީ، ރާއްޖޭގެ ފުޓުބޯޅައިގެ އެންމެ ބޮޑު އެއް ކުލަބު ނިއުރޭޑިއެންޓަކީއަލީ ސުޒެއިން
ނިއުގެ ކޯޗުކަމާ ހަވާލުވިފަހުން ކްލަބުގެ ސަޕޯޓަރުންގެ ފަރާތުން ލިބުނު މެސެޖްތަކުން އެނގިގެން ދިޔައީ، ނިއުގެ ކޯޗުކަމުގެ މަގާމުން ސުޒެއިން ފެނުމަކީ މީގެކުރިންވެސް އެފަރާތްތަކުގެ އުއްމީދެއް ކަމުގައެވެ. ސުޒެއިން ނިއުރޭޑިއެންޓާ ގުޅުމަކީ ލީގަށް ލިބިގެންދާނެ އިތުރު ކުރިއެރުމެއް ކަމަށް ފާހަގަކޮށް ދިވެހި ކޯޗުންގެ ފަރާތުން ލިބިގެންދިޔަ މަރުހަބާގެ މެސެޖުތަކުގެ ސަބަބުން، ކޯޗުންގެ މެދުގައި ވެސް ގުޅުންތެރިކަމާ އެއްބައިވަންތަކަން އޮތްކަން ވަރަށް ބޮޑަށް އިހުސާސްވެގެން ދިޔަކަމަށް ސުޒެއިން ބުނެފައިވެއެވެ. އެހެން ކަމުން ނިއުރޭޑިއެންޓްގެ ކޯޗުކަމާ ހަވާލުވެވުމުން ހުރިހާ ގޮތަކުންވެސް ކުރެވެނީ ވަރަށް އުފާވެރި އިހުސާސެއްކަމަށް ސުޒެއިން ފާހަގަކުރިއެވެ.
މީގެ ދެން އެންމެ ވާދަވެރިކަން އޮތް އިރު ވިކްޓްރީގަ އަޅުގަނޑު ކުޅެ، ވިކްޓްރީގެ ކޯޗެއްގެ ގޮތުގަވެސް މަސައްކަތް ކުރެވިއްޖެ ނިއުރޭޑިއެންޓާ އިދިކޮޅަށް، މާޒިޔާގަވެސް ނިއުރޭޑިއެންޓާ ވާދަ ކޮށްފިން، އެހެން ކަމުން ޖުމްލަކޮށް ދަންނަވާކަމުގަ ވަނީނަމަ މިއީ ވަރަށް ތަފާތު އިހުސާސެއް ކުރެވޭ ކަމެއް، އެއީ ނިއުރޭޑިއެންޓުގަވެސް ވަރަށް ގިނަ ސަޕޯޓަރުންތަކެއް ތިބޭނެ.... މެސެޖްތައްވެސް އައި މަރުހަބާ ކިޔާފަ އަޅުގަނޑު ނިއުރޭޑިއެންޓާ އެއްކޮށް މަސައްކަތް ކޮއްލަން ބޭނުންވެފެ.. އެގޮތަށް އެ ވެލްކަމް އައިމަ ވަރަށް އުފާވި،އަލީ ސުޒެއިން
މިހާރު ކަންތައްތައް މިދާ ގޮތުން އޮގަސްޓް 27 ގައި ޓީމުގެ ޕްރެކްޓިސް ފެށޭނެ ކަމަށް ސުޒެއިން މައުލޫމާތު ދީފައިވެއެވެ. އަދި އަލުން އަނބުރާ ފުރަތަމަ ޑިވިޝަނުގައި ނިއު ކުޅޭނެ ކަމުގެ ވަރަށް ބޮޑުއުއްމީދެއް އެބަ އޮތް ކަމަށާއި، ނިއުއާ ހަވާލުވުމުގެ އެންމެ ބޮޑު ސަބަބަކީ ވެސް އެއީ ކަމުގައި ސުޒެއިން ފާހަގަކުރިއެވެ.
ފުރަތަަ ޑިވިޝަނުގައި ނިއު ވާދަކުރުމުގެ ހުރިހާ ކަމެއް ނިމިގެން، ޓީމަށް އިތުރު ކުޅުންތެރިން ގެނައުމުގެ މަސައްކަތް ކުރިޔަށް ދާނެ ކަމަށް ސުޒެއިން ބުނެފައިވެއެވެ. މިހާރުވެސް ޓީމުގައި ރަނގަޅު ސްކޮޑެއް އެބައޮތް ކަމަށާއި، އެންމެ ފަހުން ބޭއްވި އެފްއޭއެމް ލީގު ކަޕުގައި ކޯޗު ސޮބާގެ އިރުޝާދުގެ ދަށުން ރަނގަޅު ކުޅުމެއް މި ކުޅުންތެރިންގެ ފަރާތުން ފެނިފައިވާކަމަށް ސުޒެއިން ފާހަގަ ކުރިއެވެ. އަދި ފެންވަރު ރަނގަޅު ބިދޭސީ ދެ ކުޅުންތެރިޔަކު ހިމެނޭހެން ސީޒަން ފެށުމުގެ ކުރިން އިތުރު ކުޅުންތެރިން ނިއުއާ ގުޅޭނެ ކަމަށްވެސް ސުޒެެއިން މައުލޫމާތު ދީފައިވެއެވެ.
މިއަހަރުގެ ލީގުގެ ކުޅުން ފެށޭނެ ކަމަށް ގަބޫލު ކުރެވެނީ ސެޕްޓެމްބަރު މެދުތެރޭގައި ބޭއްވުމަށް ހަމަޖެހިފައިވާ ޗެރިޓީ ޝީލްޑް މެޗުގެ ހަފްތާއެއް ފަހުން ކަމަށް ސުޒެއިން ބުނެފައިވެއެވެ.
އެންމެ ފަހުން ސުޒެއިން ކޯޗެއްގެ ގޮތުގައި މަސައްކަތް ކޮށްފައިވަނީ ދިވެހި ގައުމީ ފުޓުބޯޅަ ޓީމުގައެވެ. އޭގެ ކުރިން ސުޒެއިން ވަނީ ވިކްޓްރީގެ އިތުރުން މާޒިޔާ އަދި ގްރީން ސްޓްރީޓްގައި ކާމިޔާބު ދުވަސްތަކެއް ހޭދަ ކޮށްފައެވެ.
