ފްލެޓް އެއްބަސްވުމުގައި ސޮއިކުރަން ފެށިތާ މަހެއް، މިހާތަނަށް ސޮއިކުރެވުނީ އެންމެ 1826 މީހުންނާއެކު
މިހާތަނަށް 2،774 ފްލެޓު އެއްބަސްވުމެއްގައި ސޮއިކުރަން ތާވަލުކޮށްފައިވޭ
ގެދޮރުވެރިޔާ ސްކީމްގެ ފްލެޓުތައް
"ގެދޮރުވެރިޔާ" ސްކީމުގެ ދަށުން ދޫކުރާ ފްލެޓް ގެ އެއްބަސްވުމުގައި މިހާތަނަށް ސޮއިކުރެވިފައިވަނީ 1826 މީހުންނާއެކު ކަމަށް ފަހި ދިރިއުޅުން ކޯޕަރޭޝަން (އެފްޑީސީ)އިން ބުނެފިއެވެ.
ގެދޮރުވެރިޔާ ސްކީމުގެ ދަށުން ދޫކުރާ ފްލެޓް ގެ އެއްބަސްވުމުގައި ސޮއިކުރަން ފަށާފައިވަނީ 21 ޖުލައި 2025 ގައެވެ.
އެ މަސައްކަތުގެ އެންމެފަހުގެ މައުލޫމާތު ހިއްސާކޮށް، ހުކުރު ދުވަހު އެފްޑީސީން ބުނީ މިހާތަނަށް 2،774 ފްލެޓު އެއްބަސްވުމެއްގައި ސޮއިކުރަން ތާވަލުކޮށްފައިވާ ކަމަށާއި، އޭގެ ތެރެއިން 1،826 އެއްބަސްވުމެއްގައި ސޮއިކޮށްފައިވާ ކަމަށެވެ.
އެކޯޕްރޭޝަނުން ބުނީ ފްލެޓް ލިބޭ މީހުންނަށް، އެއްބަސްވުމުގައި ސޮއިކުރުމަށް ދާން ޖެހޭ ދުވަހާއި ގަޑި "ފަހި ޕޯޓަލް" މެދުވެރިކޮށް ޝެޑިއުލްކޮށް އެ މީހަކަށް އަންގާނެ ކަމަށެވެ. އަދި އެވަގުތަކަށް އައުމަށް އެދިފައިވެއެވެ.
އެއްބަސްވުންތަކުގައި ސޮއިކުރުމުގެ މަސައްކަތްތައް ހުއްޓުމެއްނެތި ކުރިއަށްދާ ކަމަށް އެފްޑީސީން ބުނެފައިވާއިރު، އޯގަސްޓް މަހުގެ 3 ވަނަ ދުވަހު ހައުސިންގ މިނިސްޓްރީ އިން އަންގައިގެން ސޮއިކުރުން ހޯލްޑް ކޮށްފައިވާ ކަމަށް ބައެއް ފަރާތްތަކަށް ޕޯޓަލް މެދުވެރިކޮށް މެސެޖު ފޮނުވާފައިވެއެވެ. ނަމަވެސް އެޗްޑީސީން ބުނެފައިވަނީ އެފަދަ އެންގުމެއް އަންގާފައިނުވާ ކަމަށް ބުނެ، އެކަން ދޮގުކޮށްފައެވެ.
އެފްޑީސީން އެއްބަސްވުންތައް އެކުަލަވާލި ނަމަވެސް ފްލެޓް ލިބޭ މީހުންގެ ލިސްޓް ކަނޑައެޅުމުގެ މަސައްކަތް ކުރިއަށް ގެންދަނީ ހައުސިން މިނިސްޓްރީންނެވެ.
އެކި ފަހަރު އެކި ގޮތްތޮތަކަށް ފްލެޓް ދޫކުރުމުގެ ކަންކަމާ ބެހޭ ގޮތުން ސަރުކާރުން ވާހަކަ ދައްކަމުން އައިސް އެންމެ ފަހުން މިފުލެޓް ތަކަކީ އެހެނިހެން ރިއަލްއެސްޓޭޓް ކުންފުނިތަކުން ވެސް ދިގު މުއްދަތަކަށް އަގުދައްކާ ޚަލާސް ކުރުމުން މިލްކު ކުރެވޭ އުސޫލުން، އެފްޑީސީ އަށް 25 އަހަރުގެ މުއްދަތަކަށް އަގުދައްކާ ޚަލާސް ކުރުމުން މިލްކު ކުރެވޭގޮތަށް ދޫކުރެވޭ އެޕާރޓްމަންޓް ތަކެއް ކަމަށް ސަރުކާރުން ބުނެފައިވެއެވެ.
އަނެއްކޮޅުން "ގެދޮރުވެރިޔާ" ސްކީމްގެ ދަށުން ދޫކޮށްފައިވާ ފްލެޓް ތަކަށް ރައްވެހިންގެ ރަޖިސްޓަރީ ހަދައި ނުދެވޭނެ ކަމަށް ސިޓީ ކައުންސިލުން ވަނީ އަންގާފައެވެ.
މީގެ އިތުރުން، ކުރިއާ ޚިލާފަށް މި ފަހަރު ފްލެޓް ހަވާލު ކުރަނީ ކުޔަށްދޭ އެޕާރޓްމަންޓްތަކަށް ޑައުންޕޭމަންޓުގެ ގޮތުގައި 25،000 ރުފިޔާ ދެއްކުމުންނެވެ.
ސޯޝަލް ހައުސިންގެ ގޮތުގައި ކުރީ ސަރުކާރުން އިމާރާތްކުރި 4000 ހައުސިން ޔުނިޓްތަކަކީ ސަރުކާރު ބަދަލުވެގެން ދިޔައިރު، ސްޓަރަކްޗަރގެ ހުރިހާ މަސައްކަތެއް ނިންމާފައިވާ މަޝްރޫއެކެވެ. އަދި ފްލެޓު ލިބޭނެ މީހުންގެ ލިސްޓްވެސް ފައިނަލް ކޮށްފައިވެއެވެ. ނަމަވެސް މިސަރުކާރުން ފުރަތަމަ ވަނީ އެލިސްޓަށް ފްލެޓުތައް ދޫކުރުމަށް ދެކޮޅު ހަދައި، މައްސަލަތަކެއް ބަލާކަން ހާމަކޮށްފައިވެއެވެ. މި ސަރުކާރަށް ދޮޅު އަހަރުވެގެން ދިޔައިރު ވެސް މި މައްސަލަ ނިންމިފައިނުވާތީ، އަދި ގާނޫނީ ގޮތުން ކުރެވޭނެ ކަމަކަށްނުވާތީ ގިނަ ބައެއްގެ ފާޑުކިޔުން އަމާޒުވުމާއި ގުޅިގެން ކުރީ ސަރުކާރުގެ ފްލެޓު ލިސްޓަށް ފްލެޓުތައް ދޫކުރަން ނިންމައި އެކަން 29 މެއި 2025 ގައި ބޭއްވި ނޫސްވެރިންގެ ބައްދަލުވުމެއްގައި ހާމަކުރިއެވެ. އަދި ހައުސިން މިނިސްޓަރު އަަބްދުﷲ މުއްތަލިބު ވިދާޅުވީ، މި އަހަރުގެ ސެޕްޓެމްބަރު މަސް ނިމުމުގެ ކުރިން 4000 ފްލެޓު ދޫކޮށް، އެތަންތަނުގައި މީހުންނަށް ދިރިއުޅެވޭނެ ކަމަށެވެ.
