ރައީސް ބޭބެ ވަރަށް އައްޗި!

އަރިއަތޮޅު އުތުރުބުރިއަށް ރައިސް ޑރ. މުހައްމަދު މުއިއްޒު ކުރެއްވި ދަތުރުފުޅުގައި އުކުޅަހަށް ވަޑައިގެން ޕޯޑިއަމްގައި ހުންނަވައި ދެއްކެވި ވާހަކަފުޅުގެ ތެރެއިން ވިދާޅުވާތީ އެހިން "މިރަށަށް އައި ތަނުން އަޅުގަނޑަށް ތުއްތު ކުދިންތަކެއް ގަނޑު ކޮޅެއް ދީފި، އޭގައި އޮތް އެއްޗެއް އޮތް ގޮތަށް ދަންނާވާލާނަން. ކޮއްކޮމެން ބީޗްއަށް ދާން ބޭނުން، އެކަމަކު ބީޗްގައިވެސް، މަގުމަތީގައިވެސް، ރެސްޓޯރަންޓް ތަކުގައިވެސް ގެސްޓުން އުޅެނީ އައްޗި ހެދުން ލައިގެން އައްޗިކޮށް" ރައީސް ވިދާޅުވީ މިއީ ވަރަށް ބޮޑު މައްސަލައެއް ކަމަށެ އެވެ. މިވާހަކަފުޅު އަޑު އެހި މީހަކު އަޅުގަނޑަށް ފޮނުވި މެސެޖެއް ދަންނަވާލާނަމެވެ. އޭނާ ބުނީ މިއީ އޭނާގެ ދަރިފުޅު ރައީސް މުއިއްޒުގެ އަތްޕުޅަށް އަރުވާށޭ ކިޔާފައި ލިޔުނު މެސެޖެއް ކަމަށެއެވެ. އޭގައި އޮތް ގޮތަށް ބަހުން ބަހަށް ދަންނަވާލާނަމެވެ.

ރައީސް ބޭބެ އެވެ. ކޮއްކޮމެން ވަރަށް އެޕަލް ކާހިތްވެ އެވެ. އޮރެންޖްވެސް ވަރަށް ކާހިތްވެ އެވެ. އެކަމަކު މިހާރު ރަށުން އޮރެންޖާއި އާފަލު ލިބެން ހުރީ އައްޗި އަގެއްގަ އެވެ. އެއީ ބާރަ ރުފިޔާއަށެ އެވެ. ކޮއްކޮ އަކީ ވަރަށް އޮމްލެޓް ކާހިތްވާ ކުއްޖެއެކެވެ. އެކަމަކު މީހަރު ބިހުގެ އަގުވެސް ވަރަށް އައްޗި އެވެ. ގަންނަން ލިބެނީ ތިން ރުފިޔާއަށެ އެވެ. ކޮއްކޮގެ މަންމަ އުޅެނީ ބަލިވެ އެވެ. ބޭސް ގަންނަން ދިއުމުން ފާމަސީގައި ތިބޭ ކުދިން ދައްކަނީވެސް އައްޗި ވާހަކަ އެވެ. އެކުދިން ބުނަނީ ބޭހެއް ނެތް ކަމަށެ އެވެ. ހުންނަ ބޭސް ވެސް އާސަންދައަކުން ނުލިބޭނެ ކަމަށެ އެވެ. ގެއަށް ކަރަންޓް ބިލް އައުމުން ބިލް ހިފައިގެން ބައްޕި ދެރަވެފައި ހުއްޓާ ކޮއްކޮ ދުށީމެ އެވެ. ކީއްވެތޯ ކޮއްކޮ އަހާލުމުން ބައްޕި ބުނީ ކަރަންޓް ބިލް ބޮޑުވާތީ ކަމަށެ އެވެ. ކުރިން ފައްސަތޭކަ ރުފިޔާ އަރާ ކަރަންޓް ބިލަށް މިހާރު ދެހާސް ރުފިޔާ އަރާ ކަމަށެ އެވެ. ރައީސް ބޭބެއެވެ. އިންޖީނުގޭ ކުދިން ކިހާ އައްޗި ހެއްޔެ އެވެ.

ރައީސް ބޭބެ އެވެ. ކޮންމެ މަހަކު ގޯތި ތެރޭގައި ހުންނަ ޖަންކްޝަން ވަޅުގެ މަތި ނަގައިގެން ބައްޕިމެން އުޅޭތީ ކޮއްކޮއަށް ވަރަށް އައްޗިވަސް ދުވަ އެވެ. ބައްޕި ކައިރީގައި ކީއްވެ ކުރާ ކަމެއްތޯ އަހާލުމުން ބުނީ ކުރީގެ ރައީސް ބޭބެގެ ސަރުކާރުން އަޅާ ދީފައި އޮތް ނަރުދަމާ އަދިވެސް ގުޅައި ނެދޭތީ ކުރަން ޖެހޭ ކަމެއް ކަމަށެ އެވެ. ކޮއްކޮވެސް ސާފު ފެނުން ފެންވަރަން ބޭނުންވެ އެވެ. އެކަމަކު އަދިވެސް ފެންވަރަން މިޖެހެނީ ގޭ ވަޅުން ނަގާ ފެނުންނެ އެވެ. މިހާރު އެފެންވެސް ވަރަށް ލޮނުވެ ދުވަނީވެސް އައްޗި ވަހެ އެވެ. މަންމި ބުނީ ކުރީގެ ރައީސް ބޭބެގެ ސަރުކާރުން އަޅާ ދީފައި އޮތް ފެން ހޮޅި މިގެއަށް ގުޅައި ނުލެވިގެން އެކަން ނުވެގެން އުޅެނީ ކަމަށެ އެވެ.

ރައީސް ބޭބެ އެވެ. ކޮއްކޮވެސް ރީތި ހެދުމާއި މީރު ކާއެއްޗެހި ބޭނުމެ އެވެ. ބައިވަރު ކުޅޭ އެއްޗެހިވެސް ބޭނުމެ އެވެ. އެކަމަކު މަންމިމެންގެ އަތްމަތި ދަތިކަމުން އެކަންކަމެއް ނުވެ އެވެ. ކަރަންޓް ބިލާއި ފެން ބިލް ދައްކާފައި ބާކީ ހުންނަ ލާރިކޮޅުން ކުރަން ޖެހެނީ ބޭސްފަރުވާ އެވެ. އާސަންދަވެސް ނުލިބޭތީ އެވެ. ކޮއްކޮ ބޭނުންވާ ކަންކަން މަންމިއަށާއި ބައްޕިއަށް ކޮށް ނުދެވެނީ އެހެން ވެގެންނެ އެވެ. ރަށު ތެރޭގައި ރަށްޓެހި ކުދިންވެސް ކިޔަނީ ރައީސް ބޭބެގެ ސަރުކާރު އައި ފަހުން އެންމެން ފަގީރުވެއްޖެ ކަމަށެ އެވެ. ރައީސް ބޭބެގެ ސަރުކާރު ވަރުގެ އައްޗި ސަރުކާރެއް ނާންނަ ކަމަށެ އެވެ. ވީއިރު ކޮއްކޮގެ މިއާދޭހުގެ އަޑު ރައީސް ބޭބެ އައްސަވާ މިކަންކަން ހައްލުކޮދެއްވިދާނެތޯ އެވެ. ކޮއްކޮއަށް އާފަލެއް ކާލެވޭނެވަރު ކޮށްލަ ދެއްވިދާނެތޯ އެވެ.

ރައީސް ބޭބެ އެވެ. މިގަނޑުކޮޅުގައި އަޅުގަނޑު ލިޔުނު ކަންކަންކޮށް ނުދެއްވަންޏާ ރައީސް ބޭބެ ވަރަށް އައްޗި އެވެ.

މިލިޔުން ކިޔާފައި އަޅުގަނޑު ހިތައް އެރި އެވެ. ރައީސް ރަށްރަށަށް ވަޑައިގަތުމުން ރަށު ތެރޭގައި އުޅޭ ގެސްޓުން އަޅާ ހެދުމުގެ ވާހަކަ ކަންބޮޑުވުމާއި އެކު ނޯޓް ކޮޅު ކޮޅުގައި ލިޔެގެން ތުއްތު ކުދިން ރައީސްގެ އަތްޕުޅަށް އަރުވާ ނަމަ މިއީވެސް ކުއްޖަކު ހަމަ ރައީސް އަށް އަރުވަފާނެ ނޯޓެއްތާ އެވެ. އެކުއްޖާ ލިޔެފައި ހުރީ ރަނގަޅު ވާހަކަ އެވެ.

ޤަބޫލުފުޅުކުރައްވާށެ އެވެ. ތުއްތު ކުއްޖަކު އެދެއްކީ ހަގީގީ ވާހަކަ އެކެވެ. އެއީ މިއަދު މިރާއްޖޭގެ ހަގީގީ ހާލަތެ އެވެ.