ރައްޔިތުންގެ މަޖިލިސް މެމްބަރުންނަށް ޔާމީން: ކުކުޅު ކޮށްޓަށް އަޅާ ކާނާ ކޮޅާ މެންބަރުންނާއި ހުރި ތަފާތަކީ ކޮބައިތޯ؟
ރައްޔިތުންގެ މަޖިލީހުގެ މެންބަރުންނަށް ފަންސާހަކަށް ހާސް ރުފިޔާ ދިނީމަ އަޅުންނަށް ވެފައި ތިބެނީ
ކުރީގެ ރައީސް އަބްދުﷲ ޔާމީން 2016 ވަނަ އަހަރު ރައްޔިތުންެ މަޖިލިސް ހުޅުވި ޖަލްސާގައި ރިޔާސީ ބަޔާން އިއްވަނީ
ކުކުޅު ކޮށްޓަށް އަޅާ ކާނާ ކޮޅާ ރައްޔިތުންގެ މަޖިލީހުގެ މެންބަރުންނާއި ތަފާތެއް ނެތް ކަމަށާއި، ފަންސާހަކަށް ހާސް ރުފިޔާ ދިނީމަ މެންބަރުން ތިބެނީ އަޅުންނަށް ވެފައި ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ޕީއެންއެފްއިން އިސްނަގައިގެން ބޭއްވި 'ވޭކް އަޕް' ޖަލްސާގައި ވާހަކަ ދައްކަވަމުން ޔާމީން ވިދާޅުވީ އޮޅުހިޔާ ފެސިލިޓީން ޤާނޫނުއަސާސީގައި، ފަސްދޮޅަސް ފަސް އަހަރު މަތީގެ މީހުންނަ ކުރިމަތިލުން ނުލެވޭ ގޮތް ހަދަން މަސައްކަތް ކުރަމުންދާ ކަމަށެވެ. ޔާމީން ވިދާޅުވީ އެކަންވެސް ކުރައްވަންވީ ކަމަށާއި، ނަމަވެސް ރައީސް ޑރ. މުހައްމަދު މުއިއްޒުއަށް ގިލްގަމޭޝް ހުރި ގޮތަށް، އެހާ ގިނަ ޒަމާންވަންދެން ވެރިކަމުގައި ހުންނާނީ ކިހިނެއްތޯ ސުވާލު އުފެއްދިއެވެ.
ޔާމީން ވިދާޅުވީ މުއިއްޒުއަކީ ރައްޔިތުންގެ ތާއީދު އޮވެގެން ރައްޔިތުންގެ ލޯބި ހޯއްދަވައިގެން ވެރިކަން ކުރައްވާ ރައީސެއް ނޫން ކަމަށެވެ. އަދި އެމަނިކުފާނަކީ އެ ކުރެވުނު ގޮތަކަށް ކުރެވުނު ކަމެއް ކޮށްގެން ވެރިކަމުގައި ހުންނަން ބޭނުންފުޅުވާ ބޭފުޅެއް ކަމަށެވެ.
އެއީ، ދެއްތޯ އެއްވެސް މުއައްސަސާތަކަކަށް ހިނިނުދެވިގެން މި އުޅެނީ؟ ހުރިހާ ތަނެއް ޑިސްފަންކްޝަނަލް. އެއްވެސް ތަނެއް އޮޕަރޭޓްކުރިޔަކަށް ނުދޭ. އެންމެ ފަހުން ނުވިތާކަށް ކޮބާ. އެންމެ ފަހުން ނުވިތާކަށް ޖަރނަލިޒަމާއި މީޑިއާއަކީ ފްރީކޮށް އޮންނާނެ ތަނެއް ކަމަށް ވިދާޅުވެފައި، ފުރަތަމަ ބެއްލެވީ އެ މީހުން އޮޅުކުރަން. ކުދި އެތިކޮޅުކޮޅު ދެމުން އެ މީހުން އޮޅުކުރީ. ހަމަ ރައްޔިތުންގެ މަޖިލީހުގެ މެންބަރުންނަށް ހެދި ގޮތް. ހާދަހާ ޑިސްއޮނަރަބަލް ބައެކޭ ރައްޔިތުންގެ މަޖިލީހުގެ މެންބަރުންނަކީ. އެ މީހުން އެ ލިބީ އެ މީހުންގެ ނަފްސާ އެ މީހުންގެ ރައްޔިތުން ވިއްކައިލާފައިނޫންތޯ. ލާރި އެކޮޅަކަށް ނަފްސު ވިއްކައިލާފައި އެ ތިބީ. ރާއްޖޭގެ މިޖެހޭ ހުރިހާ ބޮޑެތި ބަލާވެރިކަން އެ މީހުންނަށް ހެދިނޫންތޯ އަޅުގަނޑުމެން ތަޙައްމަލުކުރަންޖެހިގެން މި އުޅެނީ.ކުރީގެ ރައީސް އަބްދުﷲ ޔާމީން
ޔާމީން ވިދާޅުވީ މަޖިލީހުގެ މެންބަރުން ރައްޔިތުންނާ ހަމައަށް މިވެނި ކަމެއް ކޮށްދޭނެކަމަށް ވިދާޅުވެ ދާއިރު، މެންބަރުންނަކީ ފަންސާސް ހާސް ރުފިޔާ ދިނީމަ އަޅުންނަށްވެފައި ތިބި ބައެއް ކަމަށެވެ.
ޔާމީން ވިދާޅުވީ ކުކުޅުކޮށްޓަށް އަޅާ ކާނާކޮޅާއި، މެންބަރުންގެ ތަފާތަކީ ކޮބައިތޯ ސުވާލު އުފައްދަވާ އެއީ ހަމަ އެއްބައެއް ކަމަށް ވިދާޅުވެފައެވެ.
ހަމަ އެއްބައެއްތޯ؟ އެއް ފެންވަރެއްގައިތޯ؟ އިންސާނީ ކަރާމާތް މިގޮތަށް ޑީގްރޭޑްކޮށްލަނީ ކީއްވެގެންހެއްޔޭ؟ ދެން މިވަރު މީހުންނަށް ކިހިނެއްތޯ އެ މީހުން މަޤާމުން ވަކީމަ ދެން އަންނަ ސަރުކާރަކުން ވަޒީފާއަށް ދޭނީ؟ އެ ބޭންގޭ ނަފުސުގެ އިތުބާރެއް ނެތްކަން. ނަފުސުގައި ޝަރަފެއް ނެތް. ނަފުސުގައި އިއްޒަތެއް ނެތް. ނަފުސުގެ ކަރާމާތެއް ނެތް އެވަރު ބައެއް ގާނޫނު ހަދާ މަޖިލީހުގައި މި ތިބީ. މިންވަރު މީހުންނަށް ގާނޫނުތައް ހެދޭނީ. ފުރަތަމަ މަސައްކަތް ކުރީ ހަމަ މި މީހުން އޮޅުކުރި ގޮތަށް، ނޫސްތަކުގެ މީހުންވެސް އޮޅުކުރަން. އެތިކޮޅުކޮޅު ދީގެން މިކަން ކުރީ.ކުރީގެ ރައީސް އަބްދުﷲ ޔާމީން
ޔާމީން ވިދާޅުވީ ނޫސްތައް ގާތްކުރަން މަސައްކަޔް ކޮށްގެން އެކަން ނުވެގެން ނޫސްތައް ވެސް އުވައިލެވޭ ގޮތަށް ކަންކަން ކުރަން ނިންމާފައިވާ ކަމަށެވެ. އެހެން ކަންތައްވެސް އުވައިލެވޭ ގޮތަށް ނޫސްތައްވެސް އުވާލެވޭ ގޮތަށް ހަދަން އުޅޭ ކަމަށާއި، މިއީ އަނދިރި ދައުލަތެއް ކަމަށް ޔާމީން ވިދާޅުވިއެވެ.
ޔާމީން ވިދާޅުވީ ސަރުކާރުން ހިންގާ ބޭއިންސާފުގެ ނަތީޖާއަކަށްވާނީ ދިވެހި ރައްޔިތުން ފުނޑިގެންް ދިޔުން ކަމަށެވެ.
