ބުރާސްފަތި ދުވަހުގެ ފަތިހު، ޖަޕާނުގެ ކައިރީގައި އެމެރިކާގެ ކަނޑު ސިފައިންގެ މަނަވަރެއްގައި ރޯވެފައިވާ އަލިފާން 12 ގަޑިއިރު ފަހުން ނިއްވާލެވިއްޖެ ކަމަށް އެމެރިކާގެ ސިފައިން ބުނެފިއެވެ. މި އަލިފާން ނިއްވުމުގައި ގިނަ ވަގުތުތަކެއް ވަންދެން އެ ސަރަހައްދުގެ އުޅަނދުތަކުން މަސައްކަތްކުރިއެވެ.

ބުދަ ދުވަހު އޮކިނާވާގެ ދެކުނުގައި އޮތް ޔޫއެސްއެސް ނިއު އޯލިއަންސްގައި ހިނގި އަލިފާނުގެ ހާދިސާގައި ކުދިކުދި އަނިޔާތަކަށް ފަރުވާދެވުނު އެމެރިކާ ކަނޑު ސިފައިން ގެ ދެ މީހަކު ތިބިކަމަށް އެމެރިކާގެ 7 ވަނަ ފްލީޓުން ނެރުނު ބަޔާނެއްގައި ބުނެފައިވެއެވެ.

"މި އަލިފާން ރޯވި ސަބަބު މިހާރު ދަނީ ތަޙުޤީޤު ކުރެވެމުން ނެވެ... ނިއު އޯލިއަންސްގެ ފަޅުވެރިން އުޅަނދުގައި ތިބޭނެއެވެ،" މި ބަޔާނުގައި ބުނެފައިވެއެވެ.

208.4 މީޓަރު ދިގު، 24،433 ޓަނުގެ މި އެމްފިބިއަސް ޓްރާންސްޕޯޓް ޑޮކް އުޅަނދު ބަނދަރުކޮށްފައި އޮތީ ވައިޓް ބީޗް ނޭވަލް ފެސިލިޓީގެ ކައިރީގައެވެ.

ޖަޕާނުގެ ކޯސްޓް ގާޑުން ބުނި ގޮތުގައި، އެމެރިކާގެ ސިފައިން ޖަޕާނުގެ އެހީތެރިކަމަށް އެދުނެވެ. ނަމަވެސް އޭގެ ފަހުން އެ އެދުން ބާޠިލުކޮށް، އަނެއްކާ އިރުއޮއްސި 7:30 ހާއިރު އަލުން އެހީތެރިކަމަށް އެދުނެވެ.

ކޯސްޓް ގާޑު، ނޭވީ އަދި އަމިއްލަ ކޮންޓްރެކްޓަރުންގެ ޖަޕާނު ގެ ހަތަރު އުޅަނދު މުޅި ރޭ ހޭދަކުރީ އަލިފާން ނިއްވުމުގައި ކަމަށް އޭއެފްޕީ އިން ރިޕޯޓުކޮށްފައިވެއެވެ.

އެމެރިކާގެ ގާތްގަނޑަކަށް 54،000 ސިފައިން ޖަޕާނުގައި ޚިދުމަތް ކުރަމުން ދެއެވެ. މީގެ ތެރެއިން ގިނަ ބަޔަކު ތިބެނީ އޮކިނާވާގައެވެ.