މިއީ މުނާފިގު ސަރުކާރެއް، މުއިއްޒު ވެރިކަމަށް ގެންނަން މަސައްކަތް ކުރެވުނީތީ ލަދުވެތިކަމާއި އެކު މަޢާފަށް އެދެން - މޮސްޓާ
ދެ އަހަރު ވެގެން ދާއިރު ރަސްމާލެ އަށް، ފުށިދިއްގަރު ފަޅުން ކުޑަ ރަށެއްގެ މިންވަރު ވެސް ނުހިއްކުނު ކަމަށް ފާހަގަކުރައްވާ އޭނާ ވަނީ ރައީސް ޑރ.މުހައްމަދު މުއިއްޒު އަށް ވަރަށް ބޮޑަށް ފާޑު ވިދާޅުވެފަ
ހދ. ނޮޅިވަރަމްފަރު ދާއިރާގެ ކުރީގެ މެމްބަރު މުހައްމަދު ނަޝީދު އަބްދުﷲ (މޮސްޓާ)، "ވޭކްއަޕް" ޖަލްސާގައި ވާހަކަދައްކަވަނީ
މި ސަރުކާރަކީ މުނާފިގު ސަރުކާރެއް ކަމަށާއި، ރައީސް ޑރ.މުހައްމަދު މުއިއްޒު ވެރިކަމަށް ގެންނަން މަސައްކަތް ކުރެވުނީތީ ލަދުވެތިކަމާއި އެކު އާއްމުންގެ ކިބައިން މަޢާފަށް އެދިވަޑައިގަންނަވާ ކަމަށް ހދ. ނޮޅިވަރަމްފަރު ދާއިރާގެ ކުރީގެ މެމްބަރު މުހައްމަދު ނަޝީދު އަބްދުﷲ (މޮސްޓާ) ވިދާޅުވެއްޖެއެވެ.
މޮސްޓާ އެފަދައިން ވިދާޅުވީ ޕީއެންއެފް އިން ބުރާސްފަތި ދުވަހުގެ ރޭ އާޓިފިޝަލް ބީޗްގައި ބޭއްވި "ވޭކް އަޕް" ޖަލްސާގައި ވާހަކަދައްކަވަމުންނެވެ.
ގައުމުގެ ކަންކަމާއި މެދު ކަންބޮޑުވެގެން ވާހަކަދައްކާ ނަމަ، ދައްކާފައި ނުދައްކާނެ ވާހަކަ އެއް ނޭނގޭ މިންވަރަށް ގައުމުގެ ކަންކަން ދަށަށް ގޮސްފައިވާ ކަމަށް އޭނާ ވަނީ ވިދާޅުވެފައެވެ. އެގޮތުން ޑޮލަރުގެ އަގު އިންތިހާ އަށް ބޮޑުވެފައި ވާއިރު ވިޔަފާރިވެރިންނަށް ޑޮލަރު ލިބެމުން ނުދާ ކަމަށް އޭނާ ވަނީ ވިދާޅުވެފައެވެ. މީގެ އިތުރުން މި ސަރުކާރުން ވޭޕް މަނާކުރި މަގްސަދާއި މެދު ވެސް އޭނާ ވަނީ ސުވާލު އުފައްދަވާފައެވެ.
ޑޮލަރު ނުލިބިގެން، ޑޮލަރު ހޯދަން ސަލާން ޖަހަނީ ވިޔަފާރިވެރިން. ޒުވާނުން ތިބީ ވާނުވާގައި. ވޭޕް ބޯ މީހުން، ބިޑި ބޯ މީހުން، ސިނގިރެޓް ބޯ މީހުން ތިބީ ކޮން ހާލެއްގައި ކަމެއް ސާފެއް ނޫން. ކޮން މަގްސަދެއްގައި ކަމެއް ނޭނގެ އެ (ވޭޕް) މަނާކުރީ. ލިބޭ އަގު ބޮޑުވީ. ރައްޔިތުންގެ ޖީބަށް ބާރު ބޮޑުވެފައި ސިނގިރެޓް ވިއްކާ އަދަދު މާކެޓްގައި މަދެއް ނުވޭ. ވައުދެއް ވެއްޖެއްޔާ ރޭގަނޑު އަނބި މީހާ ނިދާފައި އޮތްވާ ކޮއްޓާލާފައި މިގޮތަށް މިކަން ކުރާށޭ ބުނީމަ އާއެކޭ ކުރާނަމޭ ބުނާ އުސޫލުން ވާ ވައުދަކަށް މި ވަނީ.ހދ. ނޮޅިވަރަމްފަރު ދާއިރާގެ ކުރީގެ މެމްބަރު މުހައްމަދު ނަޝީދު އަބްދުﷲ (މޮސްޓާ)
މީގެ އިތުރުން ރަސްމާލެ ހިއްކާނެ ކަމަށް ބުނެ ރައީސް ޑރ.މުއިއްޒު ވެވަޑައިގެންނެވި ވައުދު ވެސް ފުއްދަމުން ނުދާތީ މޮސްޓާ ވަނީ އެކަމަށް ފާޑު ވިދާޅުވެފައެވެ. އެ ވައުދު ވެވަޑައިގެންނެވި ފަހުން، ދެ އަހަރު ވެގެން ދާއިރު ރަސްމާލެ އަށް ކުޑަ ރަށެއްގެ މިންވަރު ވެސް ނުހިއްކުނު ކަމަށް ފާހަގަކުރައްވާ ، މޮސްޓާ ވަނީ ރައީސް ޑރ.މުހައްމަދު މުއިއްޒު އަށް ވަރަށް ބޮޑަށް ފާޑު ވިދާޅުވެފައެވެ. ސަރުކާރުން ފައިސާދޭ މީޑިއާތައް ބޭނުންކޮށްގެން އެކަން އޮޅުވާލުމަށް މަސައްކަތް ކުރާ ކަމަށް ވެސް މޮސްޓާ ވަނީ ވިދާޅުވެފައެވެ.
ފުށިދިއްގަރު ފަޅުން 1150 ހެކްޓަރުގެ ބިން އެ ސަރަހައްދުން ހިއްކާނެ ކަމަށް ރައީސް ޑރ.މުހައްމަދު މުއިއްޒު ވަނީ ވިދާޅުވެފައެވެ. މި މަޝްރޫޢޫ އަކީ ރައީސް މުހައްމަދު މުއިއްޒުގެ ސަރުކާރުން ހިންގާ ގެދޮރުވެރިކަމުގެ އެންމެ ބޮޑު މަޝްރޫއު ކަމަށް ރައީސް ޑރ.މުހައްމަދު މުއިއްޒު ވެސް ވަނީ ވިދާޅުވެފައެވެ. އެހެން ނަމަވެސް ރަސްމާލެ ހިއްކުމުގެ މަސައްކަތް ފެށިތާ 600 ދުވަސް ވީއިރު، ހިއްކަން ކަނޑައެޅި ބިމުން ހިއްކުނީ އެންމެ 129 ހެކްޓަރުކަން ވަނީ ހާމަވެފައެވެ.
