ރައީސް ޑރ. މުހައްމަދު މުއިއްޒުއަށް މިއަދު ޤާނޫނީ ވެރިކަން ކުރަން ނޭނގޭ: ޖަމީލް

ރައީސް ޑރ. މުހައްމަދު މުއިއްޒުއަށް މިއަދު ޤާނޫނީ ވެރިކަން ކުރަން ނޭނގިގެން އުޅޭތަން ފެނިގެންދާ ކަމަށް ވިދާޅުވެ ކުރީގެ ނައިބް ރައީސް ޑރ. މުހައްމަދު ޖަމީލް އަޙްމަދު ވަރަށް ބޮޑަށް ފާޑު ވިދާޅުވެއްޖެ އެވެ.

ޕީއެންއެެފްއިން "ވޭކްއަޕް"ގެ ނަމުގައި އާޓިފިޝަލް ބީޗްގައި ބުރާސްފަތި ދުވަހުގެރޭ ބޭއްވި ޖަލްސާގައި ވާހަކަ ދައްކަވަމުން ރައީސް މުއިއްޒުގެ ވެރިކަމުގައި ގިނަ މުއައްސަސާތަކެއް ހުއްޓުމަކަށް ގެނެސް، އެތަންތަނުގެ މިނިވަންކަން ގެއްލިގެން ގޮސްފައިވާކަން ޖަލީމް ފާހަގަކުރެއްވި އެވެ. މިގޮތުން ޝަރުއީ ކޯޓުތަކާއި، ރައްޔިތުންގެ މަޖިލިސް، ކައުންސިލްތައް އަދި މީޑިއާތަކުގެ މިނިވަންކަން ހަނިކުރެވި، އެތަންތަނުގެ މަސައްކަތްތައް ހުއްޓުމަކަށް ގެނެވިފައިވާކަމަށް ވިދާޅުވި އެވެ.

ޚާއްޞަކޮށް ރައްޔިތުންގެ މަޖިލީހުގެ ހާލަތު މިވަގުތު ވަނީ ނާޒުކު ހާލަތެއްގައި ކަމަށާއި ރައްޔިތުންގެ ހައްގުގައި މަސައްކަތްކުރާނެ މެންބަރުން މަދުވެފައިވާކަން ފާހަގަކުރައްވަމުން، ރާއްޖޭގެ ޝަރުއީ ދާއިރާގެ މިނިވަންކަމާމެދު ބައިނަލްއަގުވާމީ ފަރާތްތަކުން ވެސް ސުވާލު އުފައްދަމުންދާ ކަމަށް ޖަމީލް ވިދާޅުވި އެވެ.

ރައީސް މުއިއްޒުގެ ވައުދުތަކާ ޚިލާފަށް، މީޑިއާގެ މިނިވަންކަން ހަނިކުރުމުގެ މަސައްކަތް ކުރިއަށްދާކަން ފާހަގަކުރައްވަމުން ޖަމީލް ވިދާޅުވީ، ޚާއްޞަކޮށް ގެއްލިފައިވާ ކަނޑުތަކާއި "އިންޑިއާ އައުޓް" އާ ގުޅޭ ޚަބަރުތައް ގެނެސްދޭ މީޑިއާތަކަށް އެކި ގޮތްގޮތުން ފިއްތުންތައް ރައީސް މުއިއްޒު ކުރިމަތިކުރުވަމުންދާނެ ކަމަށެ އެވެ.

ލާމަރުކަޒީ ނިޒާމަށް ގެންނަން އުޅޭ ބަދަލުތަކާ ގުޅޭގޮތުން ވެސް ޤާނޫނީ މައްސަލަތަކެއް ހުރިކަމަށް ވިދާޅުވެ، ރާއްޖެ ތަހުޒީބު އަދި ކޮރަޕްޝަނުން އެއްކިބާވެފައިވާ ޤައުމަކަށް ހެދުމަށް ރައްޔިތުން އެދޭއިރު، ސަރުކާރުން ގެންގުޅޭ ސިޔާސަތުތަކާމެދު ޖަމީލު ވަނީ ސުވާލު އުފެދައްވާފަ އެވެ.

އަދި ރައީސް މުއިއްޒުގެ ވާހަކަފުޅުތަކުގައި ޙަޤީޤަތާ ޚިލާފު ވާހަކަތައް ގިނަވެފައިވާކަން ފާހަގަކުރެވޭއިރު، މިކަމަކީ ޤައުމުގެ ކުރިމަގަށް ނޭދެވޭ އަސަރުކުރާނެ ކަމެއްކަމަށް ވެސް ޖަމީލު ވިދާޅުވި އެވެ.