އެޗްއާރްސީއެމްގެ މެންބަރު ކަމަށް މުހައްމަދު ޝަފީގް އައްޔަންކުރުމަށް ފާސްކޮށްފި
މުހައްމަދު ޝަފީގް މަހްމޫދު އެޗްއާރްސީއެމްގެ މެންބަރުކަމަށް މަޖިލީހުން އައްޔަން ކުރީ 65 މެމްބަރުންގެ ވޯޓުން
ހިއުމަން ރައިޓްސް ކޮމިޝަން އޮފް ދަ މޯލްޑިވްސް
ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) ގެ މެންބަރު ކަމަށް މ. ޕޮޕީ، މުހައްމަދު ޝަފީގް މަހްމޫދު އައްޔަންކުރުމަށް ރައްޔިތުންގެ މަޖިލީހުން ފާސްކޮށްފި އެވެ.
އެޗްއާރްސީއެމް އަށް އައްޔަން ކުރުމަށް ދެ ބޭފުޅެއްގެ ނަން ރައީސް ޑރ.މުހައްމަދު މުއިއްޒު، ފޮނުއްވާފައި ވަނީ އެޗްއާރްސީއެމްގެ ދެ މެންބަރުންގެ ދައުރު އަންނަ ސެޕްޓެމްބަރު މަހު ހަމަވާތީއެވެ. އެ މަގާމަށް އައްޔަންކުރަން ރައިީސް ފޮނުއްވާފައި ވަނީ މުހައްމަދު ފާރިސް ތޯހާ ހ. ސޯސަން އަދި މ. ޕޮޕީ، މުހައްމަދު ޝަފީގް މަހްމޫދުގެ ނަމެވެ.
އޭގެ ތެރެއިން މ. ޕޮޕީ، މުހައްމަދު ޝަފީގް މަހްމޫދު އެ މަޤާމަށް އައްޔަންކޮށްފައި ވަނީ ހޯމަ ދުވަހުގެ މަޖިލީހުގެ ޖަލްސާގައި، 65 މެމްބަރުންގެ ވޯޓާއި އެކުގަ އެވެ. އެ މަޤާމަށް އޭނާ އައްޔަން ކުރަން ނުފެންނަ ކަމަށް އެއްވެސް ބޭފުޅަކު ވޯޓުދެއްވާފަ އެއް ނުވެ އެވެ.
އެޗްއާރްސީއެމް އަށް އައްޔަނުކުރުމަށްޓަކާ ރައީސް މުއިއްޒު މަޖިލީހަށް ހުށަހެޅުއްވި ހ. ސޯސަން، މުހައްމަދު ފާރިސް ތޯހާގެ ނަން މަޖިލީހުން ފާސްވެފަ އެއް ނުވެ އެވެ. އޭނާ އެ މަޤާމަށް އައްޔަން ނުކުރެވުނީ ގެވެށި އަނިޔާގެ ތުހުމަތުތަކެއް އޮތްކަން ހާމަވުމާއި ގުޅިގެންނެވެ. ނަމަވެސް ތޯހާ ވަނި އެ ތުހުމަތުތައް ދޮގުކުރައްވާފަ އެވެ.
އެޗްއާރްސީއެމްގެ މެމްބަރުކަމަށް ކުރިމަތިލުމަށް ދެ ފަހަރަށް އިއުލާން ކުރިއެވެ. އެގޮތުން ޖޫން މަހާއި ޖުލައި މަހު ވެސް އެ މަޤާމަށް ކުރިމަތިލާން ފުރުސަތު ހުޅުވާލި އިރު ދެވަނަ ފަހަރަށް އެ މަޤާމަށް ކުރިމަތިލާން ހުޅުވާލި ސަބަބެއް ރައީސް އޮފީހުން ހާމައެއް ނުކުރެ އެވެ.
