ރައީސް ޞާލިޙު މަގޫދޫ އަށް ފުރާ ވަޑައިގެންފި
މިއީ މަގޫދޫ ކައުންސިލްގެ ދައުވަތަކަށް އެމަނިކުފާނު އެ ރަށަށް ކުރައްވާ ދަތުރުފުއް
ފ.މަގޫދޫ އަށް ފުރައި ވަޑައިގެންނެވުމަށް ރައީސް ޞާލިޙް ސީ ޕްލޭން އަށް އަރައި ވަޑައިގަންނަވަނީ
ކުރީގެ ރައީސް އިބްރާހީމް މުޙައްމަދު ޞާލިޙު ފ. މަގޫދޫ އަށް ކުރައްވާ ދަތުރުފުޅެއް ގައި ފުރާވަޑައިގެންފި އެވެ.
މި ދަތުރުފުޅުގައި ރައީސް ސާލިހް ފުރާވަޑައިގަތީ އާދީއްތަ ދުވަހުގެ ހަވީރު އެވެ.
މިއީ މަގޫދޫ ކައުންސިލުގެ ދައުވަތަކަށް ކުރައްވާ ދަތުރުފުޅެކެވެ.
މައުލޫމާތު ލިބިފައިވާ ގޮތުގައި މި ދަތުރުފުޅުގައި މަގޫދޫގެ ބަނދަރު މަތީގައި ހަދާފައިވާ ދަތުރުވެރިންގެ ހިޔާ އާއި، ރަސްމީ ފާލަން އަދި ޓްރެކު ރަސްމީކޮށް ހުޅުވުމުގެ ރަސްމިއްޔާތު އެމަނިކުފާނު ޝަރަފްވެރި ކޮށްދެއްވާނެއެވެ.
ރައީސް ޞާލިޙުގެ ސަރުކާރުގައި ވަނީ މަގޫދޫގައި ތަރައްޤީގެ ގިނަ މަޝްރޫއުތަކެއް ކުރިއަށް ގެންގޮސްފަ އެވެ. އެގޮތުން އެ ރަށުގައި ވަނީ ފެނާއި ނަރުދަމާ ޤާއިމު ކުރުމުގެ މަޝްރޫއު ކުރިއަށް ގެންގޮސްފަ އެވެ. މީގެ އިތުރުން އައުޓް ޑޯ ވޮލީ ކޯޓެއް ޤާއިމު ކުރުމާއި، ކުޑަ ކުދިންގެ ޕާކެއް ވެސް ވަނީ ޤާއިމު ކޮށްފަ އެވެ.
މީގެ އިތުރުން މަގޫދޫގައި އެއާޕޯޓެއް ޤާއިމު ކުރުމުގެ މަސައްކަތް ވެސް ވަނީ ފަށައިފަ އެވެ. ރައީސް ޞާލިޙުގެ ވެރިކަން ނިމުނުއިރު، އެ މަޝްރޫއުގެ ބޮޑު އިންސައްތައެއްގެ މަސައްކަތް ނިމިފައި ވާއިރު، މި ސަރުކާރާ އެކު އެ މަޝްރޫއު ވަނީ ވަރަށް ބޮޑަށް މަޑު ޖެހިފަ އެވެ.
