ސޯޝަލް ހައުސިންގ އަށް ކުރިމަތިލާ ފަރާތްތަކުގެ މައުލޫމާތު ހާމަކުރަން ޖެހޭ ގޮތަަށް ބޯހިޔާވަހިކަމުގެ ބިލަށް އިސްލާހެއް!
ސޯޝަލް ހައުސިންގ އަށް ކުރިމަތިލާ ފަރާތްތަކުގެ މައުލޫމާތު ހާމަކުރަން ޖެހޭ ގޮތަށް އިސްލާހެއް ހުށަހެޅީ ހޮނިހިރު ދުވަހު
ރައްޔިތުންގެ މަޖިލީހުގެ ގަލޮޅު އުތުުރު ދާއިރާގެ މެމްބަރު މުހައްމަދު އިބްރާޙިމް (ކުޑޫ)
ސޯޝަލް ހައުސިންގ އަށް ކުރިމަތިލާ ފަރާތްތަކުގެ މައުލޫމާތު ހާމަކުރަން ޖެހޭ ގޮތަަށް ބޯހިޔާވަހިކަމުގެ ޤާނޫނަށް އިސްލާހެއް ހުށަހަޅައިފިއެވެ.
ބޯހިޔާވަހިކަމުގެ ބިލަށް އިސްލާހު ހުށަހަޅުއްވާފައި ވަނީ ހޮނިހިރު ދުވަހު، ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު މުހައްމަދު އިބްރާހީމް (ކުޑޫ)އެވެ. ބޯހިޔާވަހިކަމުގެ ބިލުގެ 51 ވަނަ މާއްދާގެ ފަހަތަށް އަންނަނިވި ގޮތަށް މާއްދާ އެއް އިތުރުކުރަން އޭނާ ވަނީ ހުށަހަޅުއްވާފައެވެ.
ބިލު ހުށެހެޅުއްވުމުގެ މަގްސަދާއި މެދު ރާއްޖެއެމްވީ އަށް މައުލޫމާތު ދެއްވަމުން ކުޑޫ ވިދާޅުވީ މިފަދަ އިސްލާހެއްގެ ބޭނުމަކީ ބޯހިޔާވަހިކަމުގެ މަޝްރޫޢުތައް ވީހާ ވެސް ދެފުށް ފެންނަ ގޮތަށް ކުރިއަށް ގެންދިއުން ކަމަށެެވެ.
"ރައީސް މުއިއްޒު ވެސް ވިދާޅުވޭ ޓްރާންސްޕޭރެންސްޓް ވާން ވާނެ ކަމަށް މިފަދަ ކަންކަން. އެެހެން ނޫނީ މިކަން ވެސް އޮޔާ ދުއްވާލާނީ. މިހާރު ވެސް އިންޝުއަރެންސް ބިލުގެ މަސައްކަތް ވެސް ހަމަ ކުއްލި އަކަށް ކޮމިޓީ އިން ގޮސް ނިންމާލައިފި. އެހެންވީމަ މިކަމުގެ މަގްސަދަނީ ވީހާވެސް ޓްރާންސްޕޭރެންޓްވާ ކަން ޔަޤީންކުރުން." ކުޑޫ ވިދާޅުވިއެވެ.
އިތުރުކުރަން ހުށަހަޅާފައިވާ މާއްދާގައި ބުނެފައި ވަނީ ބޯހިޔާވަހިކަމު ޤާނޫނުގައިވާ ގޮތުގެ މަތިން، ސޯޝަލް ހައުސިންގ ޕްރޮގްރާމެއްގެ ދަށުން ސޯޝަލް ހައުސިންގ އަށް ކުރިމަތިލުމަށް އެދި ހުށަހަޅާ އެންމެހައި ފަރާތްތަކާ ބެހޭ، ބައެއް މައުލޫމާތުތައް ހިމެނޭ ލިސްޓެއް، މިނިސްޓްރީއިން އާންމުކުރަންވާނެ ކަމަށެވެ.
އެގޮތުން 52 ވަނަ މާއްދާގެ ނަމުގައި އިތުރު ކުރާ އެ މާއްދާގައި ހިމަނަންވާނެ ކަމަށް ބުނެފައިވާ މައުލޫމާތުތަކުގެ ތެރޭގައި ސޯޝަލް ހައުސިންގ ޕްރޮގްރާމަށް ކުރިމަތިލާ ފަރާތްތަކުގެ ލިސްޓް އާންމުކުރާއިރު، ފުރިހަމަ ނަމާއި، ދާއިމީ އެޑްރެހާއި، ޝަރުތު ހަމަވާކަން ނުވަތަ ނޫންކަން، އަދި ޝަރުތު ހަމަނުވާނަމަ، އޭގެ ސަބަބު އަދި ޕޮއިންޓް ލިބިފައިވާ ގޮތުގެ ތަފުސީލު ހިމަނަން ވާނެ ކަމަށް ވަނީ ބުނެފައެވެ.
