ދަރިކަލުން ވޭޕް ސާމާނު އެތެރެކުރިކަމަށް ބުނާ ވާހަކަ މިނިސްޓަރު ޝަހީމް ދޮގުކުރައްވައިފި
މާހިލް ރާއްޖެ އައުމުން ކަސްޓަމްސްއިން ޗެކުކުރި އިރު ވޭޕްއާ ގުޅޭ ތަކެތި ފެނުނު ކަމަށް ރިޕޯޓުކޮށްފައިވޭ
މިނިސްޓަރު ޝަހީމްގެ ދަރިކަލުން ވޭޕް ސާމާނު އެތެރެކުރަން އުޅެނިކޮށް ހިފެހެއްޓިކަމަށް ބުނާ މައްސަލަ: މި ކަން މިނިސްޓަރ ޝަހީމް ވަނީ ދޮގުކުރައްވާފަ
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ގެ ދަރިކަލުން އަބްދުالله މާހިލް ޝަހީމް ވޭޕް ސާމާނު އެތެރެކުރިކަމަށް ބުނާ ވާހަކަ މިނިސްޓަރު ދޮގުކުރައްވައިފި އެވެ.
މާހިލް ރާއްޖެ އައުމުން ކަސްޓަމްސްއިން ޗެކުކުރި އިރު ވޭޕްއާއި ގުޅޭ ތަކެތި ފެނުނުކަމަށް ބުނެ ރާއްޖޭގެ ބައެއް މީޑިއާތަކުން ވަނީ ރިޕޯޓުކޮށްފަ އެވެ. އަދި އެ ވޭޕްގެ ތަަކެތި މާހިލްގެ ހަށިގަނޑުގައި ބަނދެފައާއި ލަގެޖުން ވެސް އެ ތަކެތި ފެނުނު ކަމަށް ވެސް ވަނީ ރިޕޯޓުކޮށްފަ އެވެ.
މި މައްސަލައާއި ގުޅިގެން މިނިސްޓަރު ޝަހީމް އެކްސްގައި ކުރެއްވި ޕޯސްޓެއްގައި ވިދާޅުވީ ގައިގައި ވޭޕްގެ ސާމަނު ބަނދެގެން އެތެރެކުރިކަަމަށް ބުނެ ހަގީގަތާ ހިލާފަށް ވާހަކަތައް ފެތުރުމަކީ ވަރަށް ދެރަކަމެއް ކަމަށެވެ.
މާހިލްއަކީ މެލޭޝިއާގައި ހުންނަ ރާއްޖޭގެ އެމްބަސީގައި ވަޒީފާ އަދާކުރާ މީހެއްކަމަށް ބުނާ ވާހަކަވެސް މިނިސްޓަރު ދޮގުކުރެއްވި އެވެ.
ގައިގައި ވޭޕްގެ ސާމަނު ބަނދެގެން އެތެރެކުރިކަަމަށް ބުނެ ހަގީގަތާ ހިލާފަށް ވާހަކަތައް ފެތުރުމަކީ ވަރަށް ދެރަކަމެއް.މާހިލްއަކީ މެލޭޝިއާގައި ހުންނަ ރާއްޖޭގެ އެމްބަސީގައި ވަޒީފާ އަދާކުރާ މީހެއްނޫން. ކަބަރުތައް ރަނގަޅުކޮށްލުމަށް އެދެންއިސްލާމިކް މިނިސްޓަރ ޑރ. މުހައްމަދު ޝަހީމް އަލީ ޝައީދު
ޝަހީމްގެ ދަރިފުޅު ވޭޕް އެތެރެކުރިކަމަށް ފަތުރަމުންދާ ވާހަކަތަކާ ގުޅިގެން ކަސްޓަމްސްއިން މިހާތަނަށް ވެސް އެއްވެސް އެއްޗެއް ނުބުނެ އެވެ.
މިނިސްޓަރ ޝަހީމް އެކަން ދޮގުކުރެއްވި ނަމަވެސް ކަސްޓަމްސްގެ ބައެއް އޮފިޝަލުންނާއި ހަވާލާދީ ބައެއް ނޫސްތަކަށް އެކަން ކަށަވަރު ކޮށްދީފައިވާ ކަމަށް ވަނީ ރިޕޯޓު ކޮށްފަ އެވެ.
ދުންފަތް ކޮންޓްރޯލް ކުރުމުގެ ގާނޫނަށް ގެނައި އިސްލާހުގެ ދަށުން މިދިޔަ އަހަރުގެ ޑިސެމްބަރު މަހުގެ 15 ވަނަ ދުވަހުން ފެށިގެން އީ-ސިނގިރޭޓާއި ވޭފް ކުރުމަށް ބޭނުން ކުރާ އާލާތްތަކާއި އެ އެއްޗެއްސާ އެކު ބޭނުން ކުރުމަށް ތައްޔާރުކޮށްފައިވާ އުފެއްދުންތައް ރާއްޖޭގައި ވިއްކުމާއި ހިލޭ ބެހުމާ އަދި ބޭނުން ކުރުން ވަނީ މަނާކޮށްފަ އެވެ.
