މުމްބާއީގެ އިމާރަތެއް ވެއްޓި މަރުވި މީހުންގެ އަދަދު 11 އަށް އަރައިފި
މީހުން ސަލާމަތްކުރުމުގެ މަސައްކަތް ކުރަމުންދާ ފަރާތްތަކުންދަނީ ދިރިހުއްޓައި މީހަކު ފެނޭތޯ ބަލަމުން
ހަ ބުރީގެ މި އިމާރާތް ވެއްޓިފައިވަނީ ބުރާސްފަތި ދުވަހުގެ ހެނދުނުގެ ވަގުތެއްގަ
މުމްބާއީގެ އިމާރާތެއް ވެއްޓި މަރުވި މީހުންގެ އަދަދު 11 އަށް އަރައި 24 މީހަކު ސަލާމަތްކޮށްފައިވާކަމަށް އޮފިޝަލުން ބުނެފިއެވެ.
އިންޑިއާގެ މީޑިއާތަކުން ޚަބަރު ދޭ ގޮތުގައި ހަ ބުރީގެ މި އިމާރާތް ވެއްޓިފައިވަނީ ބުރާސްފަތި ދުވަހުގެ ހެނދުނުގެ ވަގުތެއްގައެވެ.
އާބާދީ ބޮޑު ބެންދީ ބާޒާރު ސަރަހައްދުގައި ހުންނަ މި އިމާރާތަކީ 100 އަހަރަށްވުރެ ގިނަ ދުވަސްވީ އިމާރާތެއްކަމަށް ބުނެވެއެވެ.
އެމްބިއުލާންސްތަކާއި ފަޔަރ އިންޖީނުތަކާއިއެކު ޑިޒާސްޓަރ ރިލީފް ފޯސްއިން ދަނީ ހާދިސާ ހިނގި ސަރަހައްދުގައި މަސައްކަތް ކުރަމުންނެވެ.
މި ހަފްތާގައި މުމްބާއީއަށް ބޯކޮށް ވާރޭ ވެހުމުގެ ސަބަބުން ލިބުނު ގެއްލުންތަކުން އަރައިގަތުމުގެ މަސައްކަތް އިންޑިއާއިން ގެންދަނީ ކުރަމުންނެވެ.
އިމާރާތްތައް ވެއްޓުމުގެ ހާދިސާތަކަކީ އިންޑިއާގައި އާއްމު ކަމަކަށްވާއިރު ޚާއްސަކޮށް ވިއްސާރަ މޫސުމުގައި އެކަން އިތުރުވެއެވެ.
އިމާރާތްތަކުގެ ފެންވަރު ދަށްވުމާއި ދުވަސްވީ އިމާރާތްތައް ގިނަ ވުމަކީ އޭގެ ސަބަބެއްކަމަށްވަނީ ފާހަގަކުރެވިފައެވެ.
މިއީ މަހެއްހާ ދުވަހަށްވުރެ ކުރު މުއްދަތެއްގެ ތެރޭގައި މުމްބާއިގައި ވެއްޓުނު ތިންވަނަ އިމާރާތެވެ. ފުލުހުން ލަފާކުރާ ގޮތުގައި މި އިމާރާތް ވެއްޓިފައިވަނީ ވިއްސާރައިގައި ބަލިކަށިވެގެންނެވެ.
މުމްބާއީގައި ގެދޮރު ވިއްކާ އަދި ކުއްޔަށްދޭ އަގުތަކަކީ އޭޝިއާގައި ގެދޮރު ވިއްކާ އަދި ކުއްޔަށްދޭ އެންމެ ބޮޑެތި އަގުތަކުގެ ތެރޭގައި ހިމެނޭ އަގުތަކެކެވެ.
