އިންޑިއާ އައުޓް ހަރަކާތަށް އެންމެ ބޮޑަށް ފަންޑު ކުރީ މުއިއްޒު - މެންބަރު މުހައްމަދު އިސްމާއިލް
11 އޯގަސްޓު 2025 | ހޯމަ 11:09އިންޑިއާ އައުޓް ކެމްޕޭން އަށް ވިޔަރާރިވެރިން ވެސް އެހީވި ނަވަމެސް އެންމެ ބޮޑު ހޭދަ އެއް ކުރެއްވީ މުއިއްޒު
އިންޑިއާ އައުޓް ކެމްޕެއިންގައި ރައީސް މުޢިއްޒު
މި ސަރުކާރުގެ ވެރިން އިދިކޮޅުގައި ތިބި އިރުގައި އަދި ވެރިކަމަށް އައި ފަހުންވެސް ހިންގި އިންޑިއާ އައުޓް ހަރަކާތުގައި އެންމެ ބޮޑު މާލީ އެހީތެރިކަމެއް ދެއްވީ މިހާރުގެ ރައީސް ޑރ. މުއިއްޒު ކަމަށް ރައްޔިތުންގެ މަޖިލީހުގެ ވިލިމާލޭ ދާއިރާގެ މިހާރުގެ މެންބަރު މުހައްމަދު އިސްމާއީލް ވިދާޅުވެއްޖެއެވެ.
މެންބަރު މުހައްމަދު އިސްމާއިލް ވިދާޅުވީ އިދިކޮޅުގައި އޮވެގެން އެއިރު ޕީޕީއެމް ޕީއެންސީ އިން އިންޑިއާއި ދެކޮޅަށް އިންޑިއާ އައުޓް ހަރަކާތް ހިންގީ ޕާޓީގެ އިސް ލީޑަރު ކުރީގެ ރައީސް އަބްދުﷲ ޔާމީން ހުށަހެޅުއްވި ހުށަހެޅުން ލީޑަރޝިޕުން ފާސްކުރައްވައިގެން ކަމަށެވެ. އެގޮތުން އޭނާ އެކަމުގައި އިސްކޮށް ހުންނެވި އިރު ލީޑަރޝިޕްގެ ނިންމުން ތަންފީޒު ކުރަމުން ގެންދިޔަ ކަމަށެވެ.
މެންބަރު މުހައްމަދު އިސްމާއިލް ވިދާޅުވީ އޭނާއަކީ އެއްވެސް އިރެއްގައި އެފަދަ ކެމްޕޭނަކަށް ހަރަދުކުރެއްވުމުގެ ގާބިލުކަން ހުރި މީހެއް ނޫން ކަމަށާއި، ހަރަކާތް ކުރިއަށް ގެންދިޔައީ ޕާޓީއަށް ހެޔޮ އެދޭ ފަރާތްތަކާއި ވިޔަފާރިވެރިން ދިން ފައިސާ އިން ކަމަށެވެ.
މެންބަރު މުހައްމަދު އިސްމާއިލް ވިދާޅުވީ އެންމެ ބޮޑު ރޯލެއް މާލީ ގޮތުން އަދާކޮށްދެެއްވި ބޭފުޅަކީ ހަގީގަތުގައިވެސް ރައިސް ޑރ. މުހައްމަދު މުއިއްޒު ކަމަށެވެ.
މެންބަރު މުހައްމަދު ވިދާޅުވީ ދައުލަތުގެ އެއްވެސް މަގާމެއްގައި ހުންނަވާ އެއްވެސް ބޭފުޅަކު އެއީ އިސް މަގާމެއްގައި އަދި ދަށް މަގާމެއްގައި ހުންނަ ބޭފުޅަކު ވިޔަސް އެއްވެސް ގައުމެއްގެ، ވަކިން ހާއްސަކޮށް ކައިރި އަވަށްޓެރި ރައީސުންގެ އަބުރުފުޅަށް ކުޑައިމީސްވާގޮތަށް ވާހަކަ ދެއްކުމަކީ ބަލައިގަންނަ ކަމެއް ނޫން ކަމަށެވެ. މެންބަރު ވިދާޅުވީ އެފަދަ ކަމަކީ ރަނގަޅުކަމެއް ކަމަށް ބުނެ ނުދެވޭނެ ކަމަށާއި، ނަމަވެސް އެކިއެކި ޖަޒުބާތުގައި އެކިއެކި ބޭފުޅުންނަށް ވާހަކަ ދެއްކިފައި އެބަހުރި ކަމަށާއި، އެކަމާއި ގުޅިގެން ސަރުކާރުން ފިޔަވަޅުތައް ވެސް އަޅާފައި އެބަހުރި ކަމަށެވެ.
އިންޑިއާ އައުޓް ކެމްޕޭނާއި ގުޅިގެން ކުރީގެ ރައީސް އަބްދުﷲ ޔާމީން ވިދާޅުވެފައި ވަނީ އިންޑިއާ އައުޓް ކެމްޕެއިން ފެށީ އެ މަނިކުފާނުގެ އިސް ނެގުމާއި އެކުގައިކަމަށެވެ. އަދި އެ ޒިންމާ އިން ރެކިވަޑައިގަންނަވަން ބޭނުންފުޅު ވެވަޑައިނުގަންނަވާ ކަމަށް ވިދާޅުވެފައެވެ. މިއަދުވެސް މޮޓޯ އެއްގެ ގޮތުގައި ގެންގުޅުއްވަނީ އޭރުވެސް ގެންގުޅުއްވި މޮޓޯ ކަމަށް ރައީސް ޔާމީން ވަނީ ވިދާޅުވެފައެވެ. އެ މަސައްކަތުގައި ރައީސް ޔާމީން އިސް ނެންގެވި ނަމަވެސް އެ މަސައްކަތުގައި ނޫޅޭ ސިޔާސީ މީހެއް ޕީޕީއެމް، ޕީއެންސީގައި ނުހުންނާނެ ކަމަށް ރައީސް ޔާމީން ވިދާޅުވިއެވެ.
އެންމެ ފުރަތަމަ ވެރިކަމަށް ވަޑައިގެން އަލްޖަޒީރާ އަށް ދެއްވި އިންޓަރވިއުގައި ވެސް ރައީސް ޑރ.މުހައްމަދު މުއިއްޒު ދެއްކެވި ވާހަކަފުޅުގައި އެމަނިކުފާނު ވެރިކަމަށް ވަޑައިގަތީ އިންޑިއާ އައުޓް ކެމްޕެއިނަށް ރައްޔިތުން ދިން ވޯޓުން ކަން ފާހަގަ ކުރައްވާ، އެހެން ކަމާއި އެކު ރައްޔިތުންގެ އެދުމަށް އިހުތިރާމް ކުރައްވާނެ ކަމުގައެވެ. އަދި ހަމްދާން ޝަކީލަކީ ރައީސް މުއިއްޒުގެ ނުރަސްމީ ތަރުޖަމާނެއް ކަމަށް ސިފަކުރައްވާ ޔާމީން ވަނީ، އިންޑިއާ އައުޓްގެ ކެމްޕެއިން އަކީ ރައީސް މުއިއްޒު އިސްނަންގަވައިގެން ހިންގެވި ކެމްޕޭން އެއް ކަމަށް ހަމްދާން ޝަކީލް ވެސް ސިފަ ކުރައްވާފައިވާ ކަމަށް ވިދާޅުވެފައެވެ. އޭރު އޮޔާ އެއްކޮޅަށް ދަތުރުކުރާ އޮޑިއެއް ކަމަށް ދެކިގެން އެ ވާހަކަތައް ދެއްކެވީ ކަމަށާއި ހާލަތު ފުރޮޅުމުން ވާހަކަ ބަދަލުކުރެއްވީ ކަމަށް ރައީސް ޔާމީން ވިދާޅުވިއެވެ.
