ރައީސް ޑރ.މުހައްމަދު މުއިއްޒު އަކީ ދުރާލާ ވިސްނައިގެން ރޭވުންތެރިކަމާއި އެކު ވައްކަމުގައި އުޅުއްވާ ބޭފުޅެއްގެގޮތުގައި ފާހަގަކުރެވޭ ކަމަށް ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ވިދާޅުވެއްޖެއެވެ.

އޭނާ އެފަދައިން ވިދާޅުވީ ރާއްޖެޓީވީގެ ޓީވީ ޓޯކް ޕްރޮގްރާމްގައި ވާހަކަދައްކަވަމުންނެވެ.

ނޫމަޑި ރިސޯޓްސް އެންޑް ރެސިޑެންސް އޭޖީ (ނޫމަޑި)ން ދިވެހި ސަރުކާރުގެ މައްޗަށް އާރބިޓްރޭޝަން މައްސަލަ ހުށަހެޅި އިރު، އޭރު ޑރ. މުހައްމަދު މުއިއްޒު ހުންނެވީ ހައުސިންގ މިނިސްޓަރުގެ މަޤާމުގައެވެ. އޭރު ޑރ.މުއިއްޒު ދޮގު ބަޔާން ދެއްވުމާ ގުޅިގެން ދައުލަތަށް ވަނީ ބޮޑެތި ގެއްލުންތަކެއް ލިބިފައެވެ. އެކަމަށް އިޝާރާތް ކުރައްވާ މީކާއިލް ވަނީ އެކަން އެގޮަތަށް ރައީސް މުއިއްޒު ކުރެއްވީ އެއްވެސް ޤައުމީ ލޯތްބެއް ނެތުމުން ކަމަށެވެ. އަދި އެއީ ކޮރަޕްޝަންގެ ތެރެއިން ހިނގިކަމެއް ކަމަށް އޭނާ ވަނީ ތުހުމަތު ކުރައްވާފައެވެ.

ރައީސް މުއިއްޒު އަކީ މޭޔަރުކަމަށް ވަޑައިގަތުމުގެ ކުރީއްސުރެން ކޮރަޕްޝަންގެ މައްސަލަތައް ފާހަގަވާ ބޭފުޅެއް ކަމަށް މީކާއިލް ވިދާޅުވިއެވެ. މޭޔަރކަމަށް ވަޑައިގެން ވެސް ރައީސް ޑރ.މުހައްމަދު މުއިއްޒު އަކީ މުޅި މާލެ ވިއްކާ ހުސްކުރި ބޭފުޅެއް ކަމަށް އޭނާ ވިދާޅުވިއެވެ.

"ގަލޮޅު އުތުރު ދާއިރާގައި ވެސް އެތައް ތަނެއް ވިއްކާލި. ތައިސޭ ކޮށި ވިއްކާލީ. އެތައް އަހަރަކަށް ބަޔަކަށް ދިނީ. ސިނަމާލެ އާއި ޖެހިގެން އޮތް ތަން ހަމަ އެހެން ވިއްކާލީ. ރުމާލު 2 ޖަގަހައިގެ ޖެހިގެން އޮތްތަން ރަމީ ކިޔާ ގާތް ބޭފުޅަކަށް ދެއްވާފައި އޮތީ. މިހާރު ދެން ސިހުރޭ ކިޔައިގެން ވަރަށް މައްސަލަ ޖެހިފައި އޮތީ. " މީކާއިލް ވިދާޅުވިއެވެ.

އޭރު އެމްޑީޕީ ސަރުކާރުން އެކަން ނުހުއްޓުވީ ލާމަރުކަޒީ ނިޒާމާއި ގުޅުން ހުރި ކަންކަން ހުއްޓުވަން އޭރުގެ ސަރުކާރުން ބޭނުން ނުވުމުން ކަމަށް ވެސް މީކާއިލް ވިދާޅުވިއެވެ. އެއީ އޭރުވެސް ވަރަށް ބޮޑަށް މެމްބަރުން ވެސް ހިތްހަމަ ނުޖެހުން ފާޅުކުރި ކަމެއްކަން މީކާއިލް ފާހަގަކުރެއްވިއެވެ.