ވަޒީރު ބޭނުން މީހަކަށް ޕްރޮޖެކްޓް ދެވޭ ގޮތް ހެދުމަކީ އެތައް މިލިއަން ރުފިޔާ އެއް ގެއްލިދާނެ ކަމުގެ ބިރުގެ ތެރެއަށް ޤައުމު ވައްޓާލުން : ޝަމްހީދު

މާލިއްޔަތު ގަވާއިދަށް ގެނެސްފައިވާ އިސްލާހަކީ ބާތިލް އިސްލާހެއް ކަމަށާއި، އެ އިސްލާހަކީ އެތައް މިލިއަން ރުފިޔާ އެއް ގެއްލިދާނެ ކަމުގެ ބިރުގެ ތެރެއަށް ޤައުމު ވައްޓާލުން ކަމަށް ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ. އަޙްމަދު ޝަމްހީދު ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ޝަމްހީދު ވިދާޅުވީ މާލިއްޔަތު ގަވާއިދަށް ގެނެސްފައިވާ 4 ވަނަ އިސްލާހަކީ މާލިއްޔަތު ގާނޫނުގެ 46 ވަނަ މާއްދާއާއި ހިލާފަށް ގެނެސްފައިވާ، އުފެދުމުގައި ވެސް ބާތިލް އިސްލާހެއް ކަމަށެވެ.

މި އިސްލާހުގައި ބުނެފައި ވަނީ ވަޒީރު ބޭނުން މީހަކަށް ބޭނުން ޕްރޮޖެކްޓެއް ދެވިދާނެ ކަމަށެވެ. އަދި އެވޯޑު ކުރުމުގައި އެއްވެސް އިވެލުއޭޝަނެއް، ގާބިލް ކަމަކަށް ބަލަން ނުޖެހޭނެ ކަމަށް އެ އިސްލާހުގައި ބުނެފައިވެއެވެ. ހަމައެހެންމެ ⁠ވަޒީރު ބޭނުންފުޅު ޕޮރޮޖެކުޓަކަށް އެޑުވާންސް ޕޭމަންޓް ގެރެންޓީ، ޕާފޯމެންސް ގެރެންޓީ ނެތި 15% އާއި ހަމައަށް ފައިސާ ދެވިދާނެ ކަމަށް އެ އިސްލާހުގައި ބުނެފައިވެއެވެ.

"އިސްލާހުގެ ދަށުން ޕްރޮޖެކްޓްތައް ބަހާފަ ފެނަކައިގެ ކޮރޮޕްޝަންގެ ވާހަކަ ދައްކަނީ ކީއްކުރަންތޯ. އަދި އޭސީސީ އިން މިފަދަ ކަންތަށްތަކުގައި ދޭންޖެހޭ ގާނޫނީ ލަފާނުދީ، މިކަން ކުރިއަށް ގެންދަން ހަނު ތިބުމަކީ މުއައްސަސާ ފެއިލްވެފައިވާ ކަމުގެ ދަލީލެއް." ޝަމްހީދުގެ ޕޯސްޓުގައިވެއެވެ.

އެ ޕޯސްޓާއި ގުޅޭގޮތުން ރާއްޖެއެމްވީ އަށް އިތުރަށް މައުލޫމާތުދައްވަމުން ޝަމްހީދު ވިދާޅުވީ މިފަދައިން ސަރުކާރުން ނިންމާ ނިންމުންތަކުގެ ފަހަތުގައި އަބަދު ވެސް އޮޅުވާލުމުގެ އަމަލުތައް އޮންނަކަމަށެވެ. އިޚުލާސްތެރިކަމާއި އެކު ރައްޔިތުންނަށް ޚިދުމަތް ދޭން ބޭނުން ނަމަ ޤާނޫނުތަކާއި ޤަވާއިދުތަކަށް މިފަދަ ބަދަލުތަކެއް ގެނައުމުގެ މާނަ އެއް ނެތް ކަމަށް އެނާ ވަނީ ވިދާޅުވެފައެވެ.

"ސަރުކާރުން ބޭނުންވާ ޕްރޮޖެކްޓްތައް ހިންގަން އުސޫލާއި އެއްގޮތަށް އިއުލާންކޮށްގެން އެކަން ކުރަން މަސައްކަތް ކުރެވޭނެ ޖާގަ އެބަ އޮތް. އުސޫލަށް ބަދަލުގެނެސްގެން ކުރަނީ. މީގެ ބޭނުމަކީ ވަކި ބަޔަކަށް މާލީ މަންފާ ހޯދުން ނޫން ކޮން ކަމެއްކަން އަޅުގަނޑަކަށް ނުވިސްނޭ. މިއީ އަނެއްކާވެސް އެތައް މިލިއަން ރުފިޔާ އެއް ގެއްލިދާނެ ކަމުގެ ބިރަށް ޤައުމު ވައްޓާލުން" ޝަމްހީދު ވިދާޅުވިއެވެ.

ޝަމްހީދު ވިދާޅުވީ މިއީ އިންތިޚާބުގެ ދުވަސްވަރާއި ދިމާކޮށް އާއްމުންނަށް އޮޅުވާލައިގެން ކަންކަން ކުރުމަށް މަގުފަހިކުރުމަށް ގެންނަ ބަދަލުތަކެއް ކަމަށް ޤަބޫލު ކުރައްވާ ކަމަށެވެ. މާލިއްޔަތު ޤަވާއިދަށް ބަދަލު ގެނެސްގެންނާއި އެހެނިހެން ގޮތްގޮތުން ބިޑްކުރުމަކާއި އަދި އިއުލާން ކުރުމަކާއި ނުލާ މަޝްރޫޢުތައް ދިނުމަށް މަގުފަހިވާ ގޮތަށް އަމަލު ކުރުމަކީ އެކި ދާއިރާތަކުގައި ހަރަކާތްތެރިވާ މަސައްކަތްތެރިންގެ ބޮޑު ކަންބޮޑުވުމެކެވެ.

އިމާރާތްކުރުމުގެ ސިނާއަތާއި އިވެންޓް އޯގަނައިޒިން ފަދަ ދާއިރާތަކުން ވެސް ސަރުކާރާއި ގާތް ގުޅުމެއް އޮންނަ ފަރާތްތަކަށް އެކަނި މަސައްކަތް ލިބޭ ގޮތަށް އަމަލުކުރަމުންދާ މައްސަލަ ބޮޑުވެ އެ ސިނާއަތްތަކުގެ ސްޓޭކްހޯލްޑަރުން ވެސް ދަނީ އެކަމާއި މެދު ކަންބޮޑުވުން ފާޅު ކުރަމުންނެވެ.