ލަންކާގެ ރައްޔިތުންގެ މަޖިލީހުގެ ރައީސްގެ ރަސްމީ ގެކޮޅު ޕާލިމެންޓަރީ ދިރާސާތަކުގެ މަރުކަޒަކަށް ބަދަލު ކުރަނީ
ސްރީ ލަންކާގެ ޕާލިމެންޓްގެ ރައީސްގެ ރަސްމީ ގެކޮޅު މިހާރު ބަދަލުވެގެންދަނީ ޤައުމުގެ ކުރިމަގަށް އައު އުއްމީދެއް ގެނެސްދޭނެ ދިރާސާތަކުގެ މަރުކަޒަކަށް. މި މަރުކަޒުން ގާނޫނީ އަދި އިދާރީ ދާއިރާތަކުން މަތީ ފެންވަރުގެ ދިރާސާތައް ހަދައި، ސަރުކާރުގެ އެކި ފެންވަރުގެ އޮފިޝަލުންނަށް ތަމްރީނު ފޯރުކޮށްދޭނެ.
ރާއްޖޭގެ ރައްޔިތުންގެ މަޖިލީހުގެ ރައީސް ގެ ރަސްމީ ގެކޮޅު
ސްރީ ލަންކާގެ ރައްޔިތުންގެ މަޖިލީހުގެ ރައީސްގެ ރަސްމީ ގެކޮޅު ޕާލިމެންޓަރީ ދިރާސާތަކުގެ މަރުކަޒަކަށް ބަދަލު ކުރަން ނިންމައިފި އެވެ.
ރައްޔިތުންގެ މަޖިލީހުގެ ރައީސްގެ ރަސްމީ ގެކޮޅު "ސެންޓަރ ފޯ ޕާލިމެންޓަރީ ސްޓަޑީޒް އެންޑް ރިސާޗް" އަށް ބަދަލުކުރުމަށް ހުށަހެޅުނު ހުށަހެޅުމަކަށް ޕާލިމެންޓަރީ ސްޓާފް އެޑްވައިޒަރީ ކޮމިޓީން ވަނީ އެއްބަސްވެފައެވެ.
މި މަރުކަޒަކީ ރައްޔިތުންގެ މަޖިލީހުގެ މެންބަރުންނާއި، ސަރަޙައްދީ ކައުންސިލްތަކުގެ މެންބަރުންނާއި، އަދި ލޯކަލް ގަވަރމަންޓްގެ އޮފިޝަލުންނަށް ވަސީލަތްތަކާއި ތަމްރީނު ފޯރުކޮށްދޭ މަރުކަޒެއްގެ ގޮތުގައި ޚިދުމަތް ދޭ ތަނަކަށް ވެގެންދާނެ ކަމަށް ލަންކާގެ ނޫސްތަކުން ބުނެފައިވެއެވެ.
މި ނިންމުން ނިންމާފައިވަނީ 24 ޖުލައި 2025 ގައި ރައްޔިތުންގެ މަޖިލީހުގެ ރައީސް ޑރ. ޖަގަތް ވިކްރަމަރަތްނެ ރިޔާސަތު ބެލެހެއްޓެވި ކޮމިޓީ ބައްދަލުވުމެއްގައެވެ.
އެޑްވާންސް ރިސާޗް ފެސިލިޓީ އެއްގެ ގޮތުގައި އުފައްދާ މި މަރުކަޒުން ގާނޫނީ ދާއިރާ އިންނާއި އިދާރީ ހިންގުމުގެ ދާއިރާ އިން މަތީ ފެންވަރުގެ ދިރާސާތައް ހެދުމާއި، ސިޔާސަތުތައް އެކުލަވާލުމުގައި އެހީތެރިވެ ދިނުމާއި ކަމާބެހޭ ތަމްރީން ހިންގުން ހިމެނެއެވެ.
