ގެދޮރުވެރިޔާ ސްކީމުގެ ދަށުން އިމާރާތްކުރާ 4،000 ފުލެޓުތަކުގެ ކޮންޓްރެކްޓަރާ އެކު ވެފައިވާ އެއްބަސްވުމުގެ ތެރެއިން ބައިތަކެއް އުނިކޮށްފައިވާ ކަމަށް ބުނެ ދައްކަނީ ދޮގު ވާހަކަތަކެއް ކަމަށް އެމްޑިޕީން ބުނެފި އެވެ.

އެޕާޓީން މިހެން ބުނީ 4،000 ފުލެޓު ގެ އެއްބަސްވެފައިވާ އެއްބަސްވުމާ ޚިލާފަށް ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި އެ އެއްބަސްވުމުން ބައިތަކެއް އުނިކޮށްފައިވާކަމަށް ބުނެ ފަހި ދިރިއުޅުން ކޯޕަރޭޝަން (އެފްޑީސީ)ގެ މެނޭޖިން ޑިރެކްޓަރު ހަމްދާން ޝަކީލު ދެއްކެވި ވާހަކައަށް ރައްދުދީ ނެރުނު ބަޔާނެއްގައެވެ.

ހަމްދާން އެކްސްގައި ކުރެއްވި ޕޯސްޓެއްގައި ވިދާޅުވީ ކުރީގެ ސަރުކާރުން ހަދާފައިވާ އެއްބަސްވުމުގައިވާ ބައިތަކެއް އުނިކޮއްފައިވުމުން ފެން، ކަރަންޓު އަދި އިންޓަނެޓް ހިދުމަތް ދޭނެ ގޮތެއް ވެސް ކުރީގެ ސަރުކާރުން ރާވައިފައެއް ނެތްކަމަށެވެ. އަދި ޓަވަރުތައް ޕަވަރ ގްރިޑަށް ގުޅާލުމާއި ސެކިއުރިޓީ ސިސްޓަމްތަކާއި ޓަވަރުތަކާއި ކުއްޔަށް އުޅޭ މީހުންނަށް އިންޓަނެޓާއި އެހެނިހެން މީޑިއާގެ ވަސީލަތްތައް ކަނެކްޓް ކުރެވޭނެ ގޮތަށް ޖީޕޮން ނެޓްވާރކް އަދި ކުނި ނައްތާލުމުގެ ނިޒާމާއި ލޭންޑްސްކޭޕިންގެ މަސައްކަތްތައް ކަހަލަ މުހިންމު ވަސީލަތްތައް މިދިޔަ ސަރުކާރުން އެއްބަަސްވުމުން އުނިކޮށްފައިވާކަމަށެވެ.

މި ވާހަކަތަކަށް ރައްދުދީ އެމްޑީޕީން ބުނީ، އެއްބަސްވުމުން އުނިކުރިކަމަށްް ބުނާ ކަންކަކަމަކީ އިމާރާތްތަކުގެ މަސައްކަތް ކޮންޓްރެކްޓަރުން ނިންމުމުން ސަރުކާރާއި އެފްޑީސީ ގުޅިގެން ކުރަންޖެހޭ ކަންކަން ކަމަށެވެ. އަދި އެއްބަސްވުމުން ކަމެއް އުނިކުރެވޭނީ އެ ކަމެއް އެއްބަސްވުމުގައި ހިމަނާފައިވާ ނަމަ އެކަމެއް ކަމަށްވެސް އެމްޑީޕީގެ ބަޔާނުގައި ބުނެފައި ވެއެވެ.

އެމްޑީޕީން ބުނީ، ހުރިހާ ފުލެޓުތަކަށް ފެނާއި ކަރަންޓު ފަދަ އަސާސީ ހިދުމަތްތަކާއި ފޯނު ލައިނާއި ޓީވީ ކޭބަލާއި އިންޓަނެޓް ކޭބަލް ގުޅުމާ އެއްކޮށް ޒަމާނީ ފެންވަރަށް އޭރު ފަރުމާކޮށްފައިވާނެ ކަމަށެވެ. އަދި އެކަން ކުރަން ނިންމާފައި ވާނީ އިމާރާތުގެ މަސައްކަތްތައް ކޮންޓްރެކްޓަރު ނިންމުމުން ސަރުކާރާއި އެފްޑީސީންކަމަށް އެމްޑީޕީގެ ބަޔާނުގައިވެއެވެ.

މީގެ އިތުރުން ސަލަމާތީ ގޮތުން ރައްކާތެރި ތަނަކަށް ހެދުމަށްޓަކައި ފުރިހަމަ ކުރަން ޖެހޭ ކަންކަން ވެސް ފުރިހަމަކޮށްފައިވާނެ ކަމަށާއި އެ ޚިދުމަތްތަކަކީ ކޮންޓްރެކްޓަރުން ފުލެޓުތައް ނިންމަމުންދާ ވަރަކަށް ސަރުކާރާއި އެފްޑީސީން ގާއިމުކުރަން ޖެހޭ ޚިދުމަތްތަކެއް ކަމަށް އެ ޕާޓީން ބުންޏެވެ.

އެމްޑީޕީން ވަނީ، ފުލެޓުތަކުގައި މީހުން ދިރިއުޅުމަށް ބޭނުންވާ އަސާސީ ޚިދުމަތްތައް އަވަހަށް ގާއިމުކޮށްދިނުމަށް ގޮވާލާފައެވެ. އަދި، އެމްޑީޕީ ސަރުކާރުން ރޭވި ގޮތަށް މި ސަރުކާރަށް މަސައްކަތް ނުކުރެވުނު ނަމަވެސް މިއަހަރުގެ މިހާހިސާބަށް ފުލެޓުތަކުގެ ބޮޑުބައި ހުންނާނީ ނިމިފައި ކަމަށް އެޕާޓީން ދެކެއެވެ.

އެ ފުލެޓުތައް މިހާރު ހަވާލުކުރަން އުޅޭއިރު، ފުލެޓާއި ގޯތީގެ މައްސަލައިގައި ރައްޔިތުންގެ ހައްގުގައި ވަކާލާތުކުރާ ފަހި ޔޫނިއަން ޖަމިއްޔާއިން ވަނީ މި ސަރުކާރުން ހުޅުމާލެ ފުރަތަމަ ފިޔަވަހީގެ ފްލެޓްތަކާއި، ހިޔާ އަދި ވިނަރެސް ފްލެޓާއި، ރާއްޖޭގެ އެހެން ސޯޝަލް ހައުސިންގ ޔުނިޓަކުގެ ކުލި ކުޑަކުރި ގޮތަށް، އެފްޑީސީގެ 4،000 ފްލެޓުގެ ކުލި ކުޑަކޮށްދިނުމަށް ވެސް ވަނީ ގޮވާލައިފައެވެ.