"ކާބޯތަކެއްޗަށް ދަތިވެއްޖެ، ބޭސް ނުލިބޭއިރު ޒަރޫރީ މުދަލުގެ އަގުތައް އުފުލިއްޖެ، ރާއްޖޭގެ އިގްތިސާދު ފުނޑިއްޖެ" : ފައްޔާޒް
30 ޖުލައި 2025 | ބުދަ 12:28ސަރުކާރުން ނުދައްކާ ބިލުތައް 13 ބިލިއަން ރުފިޔާއަށް އަރައި ރާއްޖޭގެ އިގްތިސާދު ފުނޑިއްޖެ
އެމްޑީޕީގެ ޗެއަރޕާރސަން ފައްޔާޒު އިސްމާޢީލް
ކާބޯތަކެއްޗަށް ދަތިވެއްޖެ ކަމަށާއި ބޭސް ނުލިބޭއިރު ޒަރޫރީ މުދަލުގެ އަގުތައް އުފުލިއްޖެ ކަމަށް އެމްޑިޕީގެ ޗެއަރޕާރސަން ފައްޔާޒް އިސްމާއިލް ވިދާޅުވެއްޖެ އެވެ.
އެކްސްގައި ކުރެއްވި ޕޯސްޓެއްގައި ފައްޔާޒް ވިދާޅުވީ، އާފަލެއްގެ އަގު 10ރ. ކަމަށާއި ފިޔާ ކިލޯއެއްގެ އަގު 50ރ އިން މަތިވެ ކާބޯތަކެއްޗަށް ދަތިވެއްޖެ ކަމަށެވެ. އަދި ބޭސް ނުލިބޭއިރު ޒަރޫރީ މުދަލުގެ އަގުތައް އުފުލިއްޖެ ކަމަށާއި ޑޮލަރުގެ އަގު ހުރީ 20.20ރ އިން މަތީގައި ކަމަށް ފައްޔާޒް ވިދާޅުވިއެވެ.
ފައްޔާޒް ވިދާޅުވީ، ކުދި ވިޔަފާރިތައް ދަރަނިވެ، ސަރުކާރުން ނުދައްކާ ބިލުތައް 13 ބިލިއަން ރުފިޔާއަށް އަރައިފި ކަމަށާއި ރާއްޖޭގެ އިގްތިސާދު އެއްކޮށް ފުނޑިއްޖެ ކަަމަށެވެ.
މި ހާލަތަށް ދިޔައިރުވެސް ގާނޫނު އަސާސީން މަނިޓަރީ ސިޔާސަތު މަތިކޮށްފައިވާ މަރުކަޒީ ބޭންކުގެ ބަހެއް ނެތްކަން ފާހަގަކުރައްވާ ފައްޔާޒް ވިދާޅުވީ، މިކަންކަމާ ކަންބޮޑުވެ އެމްޑީޕީގެ ޕާލަމެންޓަރީ ގްރޫޕުން ބައްދަލުކުރަން އެދުމުން ބައްދަލުވާނެ ގޮތެއް ނުވި ކަމަށެވެ. އަދި ރައްޔިތުން ހޮވާފައި ތިބި މަންދޫބުން ގައުމުގެ ހާލަތު ސާފުކުރަން މަސައްކަތް ކުރެއްވުމުން ފިއްލެވީ ކަމަށާއި އެމްއެމްއޭއިން ޖަވާބު ނުދޭތާނގާ ރައްޔިތުންނަށް ކުރީ ބޮޑު މަލާމާތެއް ކަމަށް ފައްޔާޒް ވިދާޅުވި އެވެ.
ފައްޔާޒް ވިދާޅުވީ، މިއީ ރައްޔިތުންގެ ހާލަތު ދަންނަ އަދި ބަލަން ބޭނުން ސަރުކާރެއް ނޫން ކަމަށެވެ. އަސާސީ ބޭނުންތަކުގެ އަގު މައްޗަށް ދިޔައީކީ ނޫން ކަމަށާއި ރުފިޔާގެ އަގު ދަށަށް ދިޔައީ ކަމަށް ފައްޔާޒް ވިދާޅުވި އެވެ. އަދި ސަރުކާރުގެ އަމަލުތައް ހުރި ގޮތުން އަދިވެސް ދުވަހެއް ދުވަހަކަށް ދަނީ ދަށަށް ކަމަށް ފައްޔާޒް ވިދާޅުވި އެވެ.
