ޣައްޒާގެ ރައްޔިތުންނަށް ބޭނުންވާ އިންސާނީ އެހީ ފޯރުކޮށްދިނުމުގެ މަސަައްކަތް އދ އިން ފަށައިފި އެވެ. 

އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގައި، ޣައްޒާގެ ރައްޔިތުންނަށް ބޭނުންވާ އިންސާނީ އެހީތެރިކަމަށް ވަރަށް ބޮޑަށް ހުރަސް އެޅުމަށް ފަހު، މިހާރު ވަނީ އިންސާނީ އެހީ އެތެރެ ކުރުމުގެ ހުއްދަ ދީފަ އެވެ. އެއާ އެކު، ޣައްޒާގައި ބަނޑުހައި ހޫނުކަން ތަހަންމަލު ކުރަމުން އަންނަ މީހުންގެ ތެރެއިން، ވީހާ ވެސް ގިނަ ބަޔަކަށް އިންސާނީ އެހީ ފޯރުކޮށްދިނުމުގެ މަސައްކަތް އދ އިން ވަނީ ފަށައިފަ އެވެ. 

އދ ގެ ވޯލްޑް ފުޑް ޕްރޮގްރާމް (ޑަބްލިއުއެފްޕީ) އިން ބުނެފައިވާ ގޮތުގައި، ޣައްޒާގެ 2.1 މިލިއަން މީހުންނަށް ގާތް ގަނޑަކަށް ތިން މަސް ދުވަހުގެ ކާބޯ ތަކެތި މިހާރު އެ ސަރަހައްދަށް ދަތުރު ކުރަމުންދާނެ ކަމަށެވެ. 

އާދީއްތަ ދުވަހު އިސްރާއީލް އިން ހަނގުރާމައިގައި އޮޕަރޭޝަންތައް ވަގުތީ ގޮތުން މެދު ކަނޑާލުމަށް ނިންމާފައި ވަނީ، އދ އާއި އެހީދޭ އެޖެންސީތަކަށް ކާބޯ ތަކެތީ ނުލިބުމުގެ ސަބަބުން ޣައްޒާގައި ބޮޑުވަމުން އަންނަ ނުރައްކާތެރި ޙާލަތާ ކުރިމަތިލުމުގެ ގޮތުން ކަމަށް ރިޕޯޓުތައް ބުނެ އެވެ. 

އދ ގެ އިމަޖެންސީ ރިލީފް ކޯޑިނޭޓަރު ޓޮމް ފްލެޗާ ވިދާޅުވީ، އިސްރާއީލްގެ ނިންމުމަކީ އުފާވެރި ނިންމުމެއް ކަމަށާއި، މިސްރުން ކާބޯ ތަކެއްޗާއި، ބޭސް ފަރުވާ އަށް ބޭނުންވާ ސާމާނު އަދި ތެލުގެ ކަސްޓަމްސް ހުރަސްތައް ނައްތާލުމަށް މަގު ފަހި ވެގެން ދާނެ ކަމަށެވެ. 

ޑަބްލިއުއެފްޕީ އިން ބުނެފައިވާ ގޮތުގައި، ޣައްޒާގައި މިހާރު ވެސް އެތައް ހާސް ބަޔަކު އަންނަނީ ބަނޑު ހައި ހޫނުކަން ތަހަންމަލު ކުރަމުންނެވެ. އަދި 470،000 އަށް ވުރެ ގިނަ މީހުން، ބަނޑުހައި ހޫނު ކަމުގެ ސަބަބުން މަރުގެ ނުރައްކަލާ ކުރިމަތިލާން ޖެހިފައިވާ ކަމަށް ވެސް ވަނީ ބުނެފަ އެވެ.

އދ ގެ އިންސާނީ ހައްގުތަކުގެ ވެރިޔާ ވޯލްކާ ޓާކް ވިދާޅުވެފައިވާ ގޮތުގައި، ޣައްޒާގެ އޮކިއުޕައިން ބާރެއްގެ ގޮތުގައި އިސްރާއީލް އިން އެ ސަރަހަައްދުގެ އާބާދީ އަށް އެކަށީގެންވާ ކާބޯ ތަކެތި ފޯރުކޮށްދޭން ޖެހޭ ކަމަށެވެ. 

އޭނާ ވިދާޅުވީ ބަނޑުހައު ހޫނު ކަމުގެ ސަބަބުން ކުޑަ ކުދިން ވެސް މަރުވަމުން އަންނަ ކަމަށާއި، އެއީ ލޮލުން ކަރުނަ އަންނަވަރުގެ ހިތާމަވެރި ކަމެއް ކަމަށެވެ. ޣައްޒާ އަކީ މިހާރު މަރުގެ ބިރުވެރިކަމާއި، އިންސާނީ ބޮޑު ކާރިސާއެއްގެ ބިރުވެރި ކަމުގައި އޮތް ތަނެއް ކަމަށް ވެސް އޭނާ ވަނީ ވިދާޅުވެފަ އެވެ. އަދި މިވަގުތު އެންމެ މުހިންމޫ ދާއިމީ ގޮތެއްގައި ޣައްޒާ ހަނގުރާމަ ހުއްޓުމަކަށް ގެނައުން ކަމަށް ވެސް އޭނާ ވިދާޅުވެފައިވެ އެވެ.

އިސްރާއީލް އިން ވަނީ ޣައްޒާގެ ބައެއް ސަރަހައްދުތަކުން ވަކި ވަގުތުތަކަކަށް ހަމަލާ ދިނުންް މެދު ކަނޑާލަން ނިންމައި އެކަން ވެސް އިއުލާން ކޮށްފަ އެވެ. ނަމަވެސް، އެކަން އިއުލާން ކުރި ފަހުން އިސްރާއީލްގެ ހަމަލާތަކުގައި ޣައްޒާ އިން ބަޔަކު ޝަހީދުވެފައިވާ ކަމަށް ވަނީ ރިޕޯޓު ކޮށްފަ އެވެ.