ސަންޗޭޒް ސިޓީއަށް ވިއްކާލަނީ

އާސެނަލްއަށް ކުޅެމުން އަންނަ ޗިލީގެ ފޯވާޑް އެލެކްސިސް ސަންޗޭޒް ވާދަވެރި މެންޗެސްޓާ ސިޓީއަށް ވިއްކާލަން ނިންމައިފިއެވެ.

އިނގިރޭސި ނޫހެއް ކަމަށްވާ ޑެއިލީ މެއިލްއިން ރިޕޯޓު ކޮށްފައިވާ ގޮތުގައި އާސެނަލްއިން ސަންޗޭޒް ވިއްކާލަން ނިންމާފައ ވަނީ ބަދަލުގައި ކުޅުންތެރިޔެއް ސިޓީއިން ދޭމަތިންނެވެ.

އާސެނަލްއިން ވަނީ މީގެ ކުރިން ސިޓީއިން ސަންޗޭޒް ހޯދުމަށް ކުރި 50 މިލިއަން ޕައުންޑުގެ ބިޑު އަނބުރާ ފޮނުވާލާފައެވެ. ސަންޗޭޒް ހޯދުމަށް ސިޓީއިން މިފަހަރު 70 މިލިއަން ޕައުންޑުގެ އިތުރުން އެ ޓީމަށް ކުޅެމުން އަންނަ އިނގިރޭސި ފޯވާޑް ރަހީމް ސްޓާލިން ހުށަހަޅާނެވެ. ރިޕޯޓުތައް ބުނާ ގޮތުން ސިޓީއިން އާސެނަލްއަށް މި ބިޑު ހުށަހަޅައިފިނަމަ ސަންޗޭޒް ދޫކޮށްލާނެއެވެ.

އާސެނަލްއަށް ބަދަލުވުމުގައި ސްޓާލިންގެ އެއްވެސް މައްސަލައެއް ނެތް ކަމަށް ރިޕޯޓުތައް ބުނެއެވެ. އެގޮތުން މިއަންނަ އަހަރު އޮންނަ ފީފާ ވޯލްޑް ކަޕަށް ނަގާ އިނގިރޭސި ސްކޮޑުން އޭނާއަށް ޖާގަ ލިބެން އޮތީ ގަވާއިދުން ކުޅުމުގެ ފުރުސަތު ލިބިގެން ކަމަށް އޭނާ ގަބޫލްކުރެއެވެ. އެހެން ނަމަވެސް ސިޓީގައި އޭނާ މަޑުކޮށްފިނަމަ ގަވާއިދުން ކުޅުމުގެ ފުރުސަތު ނުލިބޭނެތީ އޭނާ އާސެނަލްއަށް ބަދަލުވާން ބޭނުންވެއެވެ.

ވޯލްޑް ކަޕް ކޮލިފައިންގައި ޕެރަގުއޭއާ ދެކޮޅަށް ކުޅޭ މެޗުގައި ސަންޗޭޒް ކުޅެން ބޭނުންނުވާ ކަމަށް އޭނާ ވަނީ ޗިލީގެ ކޯޗު ޖުއާން އެންޓޯނިއޯ ޕިއްޒީ ކައިރި ބުނެފައެވެ. އޭނާ މި މެޗުގައި ކުޅެން ބޭނުން ނުވަނީ އޭނާގެ މުސްތަގުބަލާ މެދު ގޮތެއް ނިންމަން ބޭނުންވާތީ ކަމަށް ރިޕޯޓުތައް ބުނެއެވެ.

އާސެނަލްގެ ބައެއް ކުޅުންތެރިން ދެކޭގޮތުގައި ސަންޗޭޒްގެ މުސްތަގުބަލާމެދު ގޮތެއް ނިމިފައި ނުވުމަކީ ޓީމުގެ ކުޅުމަށްވެސް އަސަރު ކުރަމުންދާ ކަމެކެވެ. އެގޮތުން އާސެނަލް ވަނީ މި ސީޒަނުގައި ކުޅުނު ތިން މެޗުގެ ތެރެއިން ދެ މެޗުން ބަލިވެފައެވެ.

ސަންޗޭޒް ވަނީ މިހާތަނަށް އާސެނަލް އަށް ކުޅުނު 145 މެޗުގައި 72 ލަނޑު އެ ޓީމަށް ކާމިޔާބު ކޮށްދީފައެވެ.