ދިވެހިރާއްޖޭގެ ކޮންމެ އަކަ އިންޗިއެއް ބަލަހައްޓާނީ އަމިއްލައަށް، އެހެން ބަޔަކު އައިސް ގައުމުގެ ކަންކަން ބެލެހެއްޓުމަކީ ސިޔާސަތެއް ނޫން: ރައީސް
26 ޖުލައި 2025 | ހޮނިހިރު 07:58ގައުމުގެ ކަންކަން ބެލެހެއްޓުމުގައި އެހެން ގައުމުތަކުގެ އެހީތެރިކަން ފަންނީ ގޮތުންނާއި އެހެނިހެން ގޮތްގޮތުން ހޯދަން ޖެހޭ ކަން އެމަނިކުފާނު ފާހަގަކުރެއްވި
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު
ދިވެހިރާއްޖެ އަކީ ފަހުރުވެރި މިނިވަން ގައުމެއް ކަމަށާއި މި ގައުމުގެ ކޮންމެ އަކަ އިންޗިއެއް ބަލަހައްޓާނީ އަޅުގަނޑުމެން އަމިއްލައަށް ކަމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެ އެވެ.
މިނިވަން ދުވަހުގެ މުނާސަބަތުގައި ސިފައިންނާއި ފުލުހުންނާ ބައްދަލުކުރެއްވުމަށް ބޭއްވި ރަސްމިއްޔާތުގައި އެމަނިކުފާނު ވިދާޅުވީ، ރާއްޖޭގެ ވަށަައިގެންވާ ކަނޑުގެ ބޮޑު ސަރަހައްދެއް އޮންނައިރު، ސިފައިންނާއި ފުލުހުންނަށް ބޮޑު އަދަދެއް އިންވެސްޓުކުރަނީ ގައުމުގެ ކަންކަން އަމިއްލައަށް ބެލެހެއްޓުމަށް ކަމަށެވެ. އަދި އެހެން ބަޔަކު އައިސްގެން ގައުމުގެ ކަންކަން ބެލެހެއްޓުމަކީ މި ސަރުކާރުގެ ސިޔާސަތެއް ނޫން ކަމަށް ރައީސް ވިދާޅުވި އެވެ.
ނަމަވެސް، ގައުމުގެ ކަންކަން ބެލެހެއްޓުމުގައި އެހެން ގައުމުތަކުގެ އެހީތެރިކަން ފަންނީ ގޮތުންނާއި އެހެނިހެން ގޮތްގޮތުން ހޯދަން ޖެހޭ ކަން އެމަނިކުފާނު ފާހަގަކުރެއްވިއެވެ.
އެހެން ނަމަވެސް އެހެން ބަޔަކު އައިސް އަޅުގަނޑުމެންގެ ކަންކަމާއި ހަވާލުވެގެން ކުރުމަކީ އަޅުގަނޑުމެންގެ ސިޔާސަތެއް ނޫން، އެހެންވީމަ މިސަރުކާރުން ސިފައިންނާ ފުލުހުންނަށް އެހާ އިސްކަމެއްދީގެން ކަންކަން މިކުރަނީ، މިއީ ފަހަރެއްގައި ހިތުގަ މިނިވަންކަމުގެ ލޯބި، ޖޯޝް ގައުމީ ލޯބި ނެތް ބަޔަކަށް އެހާ ބޮޑަށް ފަހުމް ނުވެދާނެ ކަމެއް، އެހެން ނަމަވެސް އަޅުގަނޑު ގަބޫލުކުރަނީ ދިވެހި ކޮންމެ ރައްޔިތެއްގެ ހިތުގަ މި ގައުމީ ލޮއެއްބާ ޖޯޝް ހުންނާނެ.ރައީސުލްޖުމްހޫީރިއްޔާ ޑރ. މުޙައްމަދު މުޢިއްޒު
ރައީސް ވިދާޅުވީ ފުލުހުންނާއި ސިފައިންނަށް މި ސަރުކާރުން ހާއްސަ އިސްކަމެއް ދެއްވަނީ ކީއްވެގެންތޯ އާއި ހަނގުރާމައަކަށް ރާއްޖެ ތައްޔާރުވަމުންދަނީތޯ ބައެއް ފަރާތްތަކުން ސުވާލުކުރައްވާކަން ފާހަގަކުރައްވަމުން ރައީސް ވިދާޅުވީ ގައުމު އޮންނަން ޖެހޭނީ ދިވެހި ރައްޔިތުން ހިމާޔަތްކުރުމަށް އަބަދުވެސް ތައްޔާރަށް ކަމަށާއި ފަޚުރުވެރި މިނިވަން މި ގައުމުގެ ކޮންމެ އަކަ އިންޗިއެއް ބަލަހައްޓަމުން ގެންދަނީ ފުލުހުންނާއި ސިފައިން ކަމަށެވެ. އެހެންކަމުން މި ދެ މުއައްސަސާއަށް ސަރުކާރުން ހާއްސަ އިސްކަމެއްދީގެން ކަންތައްކޮށްދެނީ އެފަދަ ގިނަ ސަބަބުތަކާހުރެ ކަމަށް ރައީސް ވަނީ ވިދާޅުވެފައެވެ.
ރައީސް ވިދާޅުވީ އައްނަން އޮތް ޖީލުތަކަށް މިގައުމު މިނިވަންކަންމަތީގައި ސަލާމްތެރިކަމާއެކީގައި ފޯރު ކޮށްދިނުމަކީ ކޮންމެ މީހެއްގެވެސް ޒިންމާއެއް ކަމަށެވެ.
ދިގު މާޒީއެއްގައި ދިވެހިރާއްޖެ މިނިވަންކަންމަތީ ބާއްވާ، ރާއްޖެ ހިމާޔަތްކޮށް ޖީލުތަކަށް ފޯރުކޮށްދިނީ ދިވެހި ސިފައިންނާއި ފުލުހުންގެ ހިދުމަތުން ކުރައްވަމުން ގެންދިޔަ މަސައްކަތުން ކަމަށް ރައީސް ވިދާޅުވިއެވެ.
