ހަމާސްގެ ޖަވާބު އިސްރާއީލް އިން ދަނީ ދިރާސާ ކުރަމުން
24 ޖުލައި 2025 | ބުރާސްފަތި 08:33އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫގެ އޮފީހުން ނެރުނު ބަޔާނެއްގައި ބުނެފައި ވަނީ، މެދުވެރިންގެ ފަރާތުން ހަމާސްގެ ޖަވާބު އިސްރާއީލަށް ލިބިފައިވާ ކަމަށާއި، މަޝްވަރާ ޓީމުން ގެންދަނީ އެ ޖަވާބު ދިރާސާ ކުރަމުން ކަމަށް.
އިސްރާއީލްގެ އަސްކަރިއްޔާގެ ސިފައިންތަކެއް ޣައްޒާގައި ހަރަކާތްތެރި ވަނީ
އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ހުއްޓާލުމަށް ހުށަހަޅާފައިވާ ހުށަހެޅުމަށް ހަމާސް ޖަމާއަތުން ދީފައިވާ ޖަވާބު ދިރާސާ ކުރަމުން އަންނަ ކަމަށް އިސްރާއީލް އިން ބުނެފި އެވެ.
އިސްރާއީލްގެ އަސްކަރިއްޔާ އިން ބުރާސްފަތި ދުވަހު ބުނެފައި ވަނީ، ހަނގުރާމަ ހުއްޓާލުމުގެ ހުށަހެޅުމާ ގުޅިގެން ހަމާސް އިން ދީފައިވާ ޖަވާބު އެ އަސްކަރިއްޔާ އިން ދިރާސާ ކުރަމުން އަންނަ ކަމަށެވެ. އަދި އެ ޖަވާބު ލިބިފައިވާ ކަމަށް ވެސް އިސްރާއީލްގެ އަސްކަރިއްޔާ އިން ވަނީ ބުނެފަ އެވެ.
އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫގެ އޮފީހުން ނެރުނު ބަޔާނެއްގައި ބުނެފައި ވަނީ، މެދުވެރިންގެ ފަރާތުން ހަމާސްގެ ޖަވާބު އިސްރާއީލަށް ލިބިފައިވާ ކަމަށާއި، މަޝްވަރާ ޓީމުން ގެންދަނީ އެ ޖަވާބު ދިރާސާ ކުރަމުން ކަމަށެވެ.
އެމެރިކާގެ ރައީސް ޑޮނަލްޑް ޓްރަމްޕްގެ ފަރާތުން ވަނީ 60 ދުވަހުގެ މުއްދަތަކަށް ހަނގުރާމަ ހުއްޓާލުމުގެ ހުށަހެޅުމެއް ހުށަހަޅައިފަ އެވެ. އެ ހުށަހެޅުމުގެ މަޝްވަރާތަކުގައި މެދުވެރިއެއްގެ ދައުރު އަދާ ކުރަނީ ޤަތަރުންނެވެ. ޤަތަރުގެ ވެރި ރަށް ދޯހާގައި ކުރިއަށް ގެންދަމުން އައި މަޝްވަރާތަކަށް މަޑު ޖެހުމެއް އައިސްފައި ވަނީ ދެ ފަރާތުގެ ދެ މެދުގައި އުފެދުނު ޚިޔާލު ތަފާތުވުން ތަކެއް އުފެދުމުންނެވެ.
މީގެ ކުރިން ވެސް ވަނީ ޣައްޒާ ހަނގުރާމަ ހުއްޓާލުމަށް މަޝްވަރާތަކެއް ކޮށްފަ އެވެ. އަދި މަޝްވަރާތަކަށް ފަހު ހަނގުރާމަ ހުއްޓާލުމުގެ އެއްބަސްވުމެއް ޤާއިމު ވެސް ކުރި އެވެ. މިއަހަރުގެ ޖަނަވަރީ މަހު ހަނގުރާމަ ހުއްޓާލުމުގެ އެއްބަސްވުމެއް ޤާއިމު ކުރެވުނު ނަމަވެސް، އިސްރާއީލް އިން ވަނީ އެ އެއްބަސްވުމާ ޚިލާފުވެފަ އެވެ.
އެއްބަސްވުމާ ޚިލާފަށް އިސްރާއީލް އިން ހަމަލާތައް ދޭން ފެށި ފަހުން، ޣައްޒާ އަށް ދެމުން އަންނަ ހަމަލާތައް އަންނަނީ އެއް ދުވަހުން އަނެއް ދުވަހަށް ވަރުގަދަ ކުރަމުންނެވެ. އަދި އެ ހަމަލާތަކުގައި ޝަހީދުވާ މީހުންގެ އަދަދު ވެސް އަންނަނީ އިތުރު ވަމުންނެވެ. އިސްރާއީލްގެ އަނިޔާވެރިކަން ހައްދުފަހަނަ އަޅާފައިވާއިރު، ގިނަ ބަޔަކު އަންނަނީ އެކަމާ ގުޅިގެން ކަންބޮޑުވުން ފާޅުކޮށް، އިސްރާއީލް އަށް ނުރުހުން އަމާޒު ކުރަމުންނެވެ.
ޣައްޒާ އަށް ހަމަލާއް ދިނުމުގެ އިތުރުން، އިސްރާއީލް އިން ވަނީ ޣައްޒާ އަށް ބޭނުންވާ އިންސާނީ އެހީ ފޯރުކޮށްދިނުމަށް ވެސް ދަތި ކޮށްފަ އެވެ. އެގޮތުން ކާބޯ ތަކެއްޗާއި، ހޮސްޕިޓަލްތަކަށް ބޭނުންވާ ތެޔޮ ފޯރުކޮށްދިނުމަށް އިސްރާއީލް އިން ވަނީ ދަތި ކޮށްފަ އެވެ.
އެކަމުގެ ސަބަބުން ޣައްޒާގައި ބަނޑުހައި ހޫނުކަން އިންތިހާ އަށް އިތުރުވެ، ޣައްޒާގެ ޞިއްޙީ ނިޒާމު ވެސް ވަނީ ނާޒުކު ޙާލަތެއްގަ އެވެ. ޣައްޒާގެ ޞިއްޙީ ނިޒާމު ފުނޑު ފުނޑުވަމުންދާ ކަމުގެ އިންޒާރު ބައިނަލްއަޤުވާމީ އިދާރާ ތަކުން ވެސް އަންނަނީ ދެމުންނެވެ.
މީގެ އިތުރުން، ޣައްޒާގައި ބަނޑުހައި ހޫނު ކަމުގެ ސަބަބުން ޝަހީދުވަމުން އަންނަ މީހުންގެ އަދަދު ވެސް ވަނީ އިތުރުވެފަ އެވެ. އޭގެ ތެރޭގައި ގިނަ އަދަދެއްގެ ކުޑަ ކުދިން ހިމެނެ އެވެ.
