4000 ފްލެޓް: ކުއްޔާއި މެއިންޓެނެންސް ފީ 10 އެއްގެ ކުރިން ދައްކައިފި ނަމަ 100 އިންސައްތަ ސަބްސިޑީގެ މަންފާ ލިބޭނެ - އެފްޑީސީ
މަހުން މަހަށް ދައްކަން ޖެހޭ ޖުމްލަ ރުފިޔާގެ އަދަދަކީ 2 ކޮޓަރީގެ އެޕާޓްމެންޓަކަށް ނަމަ 8000 ރުފިޔާ އަދި 3 ކޮޓަރީގެ އެޕާޓްމެންޓަކަށް 10500 ރުފިޔާ
ހުޅުމާލޭ 2 ވަނަ ފިޔަވަހީގައި ތަރައްޤީކުރަމުންދާ 4000 ފްލެޓްގެ މަސައްކަތް ބައްލަވާލެއްވުމަށް ރައީސް ޑރ.މުއިއްޒު ކުރެއްވި ޒިޔާރަތުގެ ތެރެއިން - 20 ޖޫން 2025
ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭގައި ޤާއިމްކޮށްފައިވާ، 4000 ފްލެޓް ލިބުނު މީހުން، އެ ފްލެޓަށް ދައްކަން ޖެހޭ ކުއްޔާއި މެއިންޓެނެންސް ފީ، ކޮންމެ މަހެއްފެ 10އެއްގެ ކުރިން ދައްކައިފި ނަމަ، އެ ފަރާތްތަކަށް 100 އިންސައްތައިގެ މަންފާ އެއް ލިބޭނެ ކަމަށް ފަހި ދިރިއުޅުން ކޯޕަރޭޝަން (އެފްޑީސީ) އިން ބުނެފިއެވެ.
އެ ކޯޕަރޭޝަނުން އެފަދައިން ބުނެފައި ވަނީ އެފްޑީސީން ތަރައްޤީ ކުރި 4000 ހައުސިން ޔުނިޓްގެ މަހު ކުލި އަދި ސެކިއުރިޓީ ޑިޕޮސިޓާއި މެދު 21 ޖުލައި 2025ގައި އާއްމު ކުރި އިއުލާނެއްގައެވެ.
އެ އިއުލާންގައި ބުނެފައި ވަނީ އެފްޑީސީ އިން ދެވަނަ ފިޔަވަހީގައި ތަރައްޤީކޮށްފައިވާ 4000 ހައުސިން ޔުނިޓު ލިބޭ ފަރާތްތައް، މިނިސްޓްރީ އޮފް ކޮންސްޓްރަކްޝަން ހައުސިން އެންޑް އިންފްރާސްޓްރަކްޗަރ އިން ކަނޑައެޅުމާއި ގުޅިގެން އެފްޑީސީން އާއްމުންނަށް މައުލޫމާތު ފޯރުކޮށްދިނުމުގެ ތެރެއިން، އާއްމު ރައްޔިތުންނަށް އޮޅުން އަރާ ގޮތަށް މައުލޫމާތު ދައުރުވަމުންދާ ކަމަށެވެ.
މީގެ އިތުރުން، ހުޅުމާލެ ދެވަނަ ފިޔަވަހީގައި ތަރައްޤީ ކޮށްފައިވާ 4000 ހައުސިންގ ޔުނިޓުގެ އެއްބަސްވުންތަކަކީ ޝަރީއާގެ ހަމަތަކާއި އެއްގޮތްވާ ގޮތުގެ މަތިން އެކުލަވާލެވިފައިވާ އެއްބަސްވުމެއް ކަމުގައި ވާތީ، މި އެއްބަސްވުމުގެ ދަށުން ދައްކަން ޖެހޭ މަހު ކުއްޔާއި މެއިންޓެނަންސް ފީ، އެ މަހެއްގެ 10 ވަނަ ދުވަހުގެ ކުރިން ދައްކައިފި ނަމަ އެ ފަރާތްތަކަށް 100 އިންސައްތަ ސަބްސިޑީގެ މަންފާ ލިބޭނެ ކަމަށް އެ ކޯޕަރޭޝަނުން ބުނެފައިވެއެވެ.
ހަމައެހެންމެ މަހެއްގެ 10 ވަނަ ދުވަހުގެ ފަހުން، މަހު ކުލި ދައްކާ ހާލަތުގައި ލިބޭ ސަބްސިޑީ އަށް ބަދަލު އަންނާނެ ގޮތް ވެސް އެ އިއުލާންގައި ވަނީ ބަޔާންކޮށްފައެވެ. އެގޮތުން މަހުގެ 16އިގެ ކުރިން އެ މަހެއްގެ ކުލި ދައްކާ ނަމަ 75% ސަބްސިޑީގެ މަންފާ ލިބޭ އިރު، މަހުގެ 21 ވަނަ ދުވަހުގެ ކުރިން އެ މަހެއްގެ މަހު ކުލި ދައްކައިފި ނަމަ 50 އިންސައްތަ ސަބްސިޑީގެ މަންފާ ލިބޭނެ ކަމަށް އެ ކޯޕަރޭޝަނުން ވަނީ ބުނެފައެވެ.
އެފްޑީސީން ހާމަކޮށްފައިވާ ގޮތުގައި މަހުގެ 26 ވަނަ ދުވަހުގެ ކުރިން އެ މަހެއްގެ މަހު ކުލި ދައްކައިފި ނަމަ 25 އިންސައްތަ ސަބްސިޑީ ގެ މަންފާ ލިބޭނެއެވެ. އަދި މަހުގެ 26 ވަނަ ދުވަހުގެ ފަހުން އެ މަހެއްގެ މަހު ކުލި ދައްކާ ނަމަ، ކުލި ދައްކަން ޖެހޭނީ ސަބްސިޑީގެ ކުލީގެ މަންފާ ނުހިމަނާ މަހު ކުލި ކަމަށް ވެސް އެ ކޯޕަރޭޝަނުން ބުނެފައިވެއެވެ.
މަހު ކުއްޔާއި ސެކިއުރިޓީ ޑިޕޮސިޓްގެ ގޮތުގައި ދައްކަން ޖެހޭ ފައިސާގެ އަދަދުތައް ނުދައްކައިފި ނަމަ އެ ފައިސާ ދެއްކުމަށް އެދި އެފްޑީސީން ކުއްޔަށް ހިފާފައިވާ ފަރާތަށް ލިޔުމުން ނޯޓިސް އެއް ފޮނުވުމުގެ އިޚްތިޔާރު ލިބިގެންވާކަން ފާހަގަކޮށްލެވެއެވެ.
މަހު ކުއްޔާއި ސެކިއުރިޓީ ޑިޕޮސިޓްގެ ގޮތުގައި ދައްކަން ޖެހޭ ފައިސާގެ އަދަދުތަކުގެ ތަފްސީލަށް ބަލާ ނަމަ ސެކިއުރިޓީ ޑިޕޮސިޓްގެ ގޮތުގައި 2 ކޮޓަރީގެ އެޕާޓްމެންޓުތަކަށް 15000 ރުފިޔާ ދައްކަންޖެހެއެވެ. މީގެ އިތުރުން 3 ކޮޓަރީގެ އެޕާޓްމެންޓުތަކަށް 25000 ރުފިޔާ ދައްކަންޖެހެއެވެ. މި ފައިސާ އަކީ އެއްފަހަރާ ދައްކަން ޖެހޭ ފައިސާއެވެ.
މަހުން މަހަށް ދައްކަން ޖެހޭ މަހު ކުލި އަދި މެއިންޓެނެންސް އަށް ބަލާ ނަމަ، ކޮންމެ މަހަކަށް ޖެހޭ ކުލި އަކީ 2 ކޮޓަރީގެ އެޕާޓްމެންޓަކަށް 7000 ރުފިޔާ، 3 ކޮޓަރީގެ އެޕާޓްމެންޓަކަށް 9000 ރުފިޔާއެވެ. އަދި މެއިންޓެނަންސް ފީ އަކީ 2 ކޮޓަރީގެ އެޕާޓްމެންޓަކަށް 1000 ރުފިޔާ އަދި 3 ކޮޓަރީގެ އެޕާޓްމެންޓަކަށް 1500 ރުފިޔާއެވެ. އެހެންކަމުން މަހުން މަހަށް ދައްކަން ޖެހޭ ޖުމްލަ ރުފިޔާގެ އަދަދަކީ 2 ކޮޓަރީގެ އެޕާޓްމެންޓަކަށް ނަމަ 8000 ރުފިޔާ އަދި 3 ކޮޓަރީގެ އެޕާޓްމެންޓަކަށް 10500 ރުފިޔާއެވެ.
