ބިރުދައްކައިގެން ފައިސާ ފޭރުނު ބަޔަކު ހައްޔަރުކުރަން އުޅުމުން، މާރާމާރީ ހިންގައިފި
19 ޖުލައި 2025 | ހޮނިހިރު 14:40މި މައްސަލަ ފުލުހުން ދަނީ ތަހުގީގުކުރަމުން
ފުލުހުންގެ އިމާރާތުގެ ބޭރުން ނަގާފައިވާ ފޮޓޯ އެއް
މާލޭގައި ބިރުދައްކައިގެން ފައިސާތަކެއް ފޭރުނު ބަޔަކު، އަތުލައިގަތުމަށް ފުލުހުން މަސައްކަތް ކުރުމުން ފުލުހުންނަށް ހަމަލާދީ މާރާމާރީ ހިންގައިފިއެވެ.
ފުލުހުން ބުނިގޮތުގައި ފޭރިގަތުމަށް މަސައްކަތް ކުރުމަށް ފަހު އެ މީހުން ތިބީ ގެއަކަށް ވަދެއެވެ. އެ މީހުން މާރާމާރީ ހިންގާފައި ވަނީ ފުލުހުން އެ މީހުން އަތުލައިގަތުމަށް މަސައްކަތް ކުރުމުންނެވެ.
ފުލުހުން ބުނީ މާލޭގެ ހެންވޭރު ލޮނުޒިޔާރަތް މަގުގައި މީހަކަށް ތޫނު އެއްޗަކުން ބިރު ދެއްކުމަށް ފަހު އޭނާ ތަނަކަށް ވައްދާ އޭނާގެ އެކައުންޓްގައި ހުރި 200 ރުފިޔާ ޓްރާންސްފާ ކުރުވާފައިވާ މައްސަލަ އެއް ފުލުހުންގެ ސަމާލުކަމަށް އައިސްފައިވަ ކަމަށެވެ.
މި މައްސަލަ ފުލުހުންގެ ސަމާލުކަމަށް އައިސްފައި ވަނީ މި މަހުގެ 18 ވަނަ ދުވަހުގެ ރޭ 23:57 ހާއިރު ކަމަށް ވެސް ފުލުހުން ވަނީ ބުނެފައެވެ.
ފުލުހުން އިތުރަށް ބުނީ މި މައްސަލަ ފުލުހުންނަށް ރިޕޯޓްކުރުމާއި ގުޅިގެން ފުލުހުން އެ ހާދިސާ ހިނގައިގެން އުޅޭ ތަނަށް އެޓެންޑް ވި އިރު ފޭރުނު ކަމަށް ތުހުމަތުކުރެވޭ މީހުން އެ ސަރަހައްދުގެ ގެއެއްގައި ތިބި ކަމަށް ފުލުހުންނަށް މައުލޫމާތު ލިބުނު ކަމަށެވެ. ފުލުހުންނަށް ލިބުނު މައުލޫމާތު ތަކާއި ގުޅިގެން އެ މިހުން ތިބި ގެއަށް ފުލުހުން ވަންނަށް އުޅުމުން ފުލުހުންނާއި ކުރިމަތިލާ މާރާމާރީ ހިންގާފައިވާ ކަމަށް ފުލުހުން ބުނެއެވެ.
ފުލުހުން ވިދާޅުވީ ބާރުގެ ބޭނުންކޮށް ފުލުހުންނަށް ހަމަލާދީ މާރާމާރީ ހިންގައި ފުލުހުންގެ ދައުރު އަދާކުރުމަށް ހުރަސް އަޅާފައިވާތީ ހައްޔަރުކޮށްފައި ވަނީ ނ. ވެލިދޫ، ވަރީސާ މަންޒިލް، ހަސަން ލޫޖެއިން މުހައްމަދު (23އ)، މާލެ، ހ. ކަނޑުފިނީގެ، މުހައްމަދު ޝަފީއު (55އ) ކަމަށެވެ.
އެ މީހުން ހައްޔަރުކުރުމުގެ ތެރޭގައި އެ ދެ މީހުންގެ އިތުރުން ފުލުހުންނަށް ވެސް އަނިޔާވިކަން ފުލުހުން ހާމަކޮށްފަިއވެއެވެ. މި މައްސަލައިގައި އެ މީހުންގެ ބަންދާއިމެދު ގޮތެއް ނިންމުމަށް ކޯޓަށް ހާޒިރުކުރުމުން އެ މީހުންގެ ބަންދަށް 5 ދުވަސް ވަނީ ޖަހާފައެވެ.
މި މައްސަލަ ފުލުހުން ދަނީ ތަހުގީގުކުރަމުންނެވެ.
