ރާއްޖެއަށް މިހާރު ކުރަމުންދާ ވިއްސާރައިގައި ބައެއް ރަށްތަކަށް ބޮޑެތި ގެއްލުންތަކެއް ލިބިއްޖެއެވެ.

މޫސުމާބެހޭ ގައުމީ އިދާރާއިން ބުނީ، ހުކުރު ދުވަހު މާލެސިޓީގެ އިތުރުން ރާއްޖޭގެ އެކި ރަށްތަކަށް ވަރަށް ބޮޑަށް ވައިގަދަވި ކަމަށެވެ. ހުޅުލެ-ހުޅުމާލެއަށް 52 މޭލަށް ވައިގަވެފައިވާއިރު، ހދ. ހަނިމާދޫ އާއި މަކުނުދޫއަށް ގަޑިއަކު 54 މޭލަށް ވައިގަދަވެފައި ވާކަމަށް އެއިދާރާއިން ބުނެއެވެ. އަދި ފ. ނިލަންދޫ 48 މޭލަށް، ކ. ދިއްފުއްޓަށް 49 މޭލަށް، ގދ. ކާޑެއްދޫ - 46 މޭލަށް، ސ. ގަމަށް 46 މޭލަށް އަދި ހދ. ކުޅުދުއްފުއްޓަށް 47 މޭލަށް ވައިޖެހިފައިވެއެވެ.

ހަނިމާދޫ ހާލަތާ ގުޅޭގޮތުން އެރަށު ކައުންސިލްގެ ރައީސް އަބްދުއްސަތާރު ހަސަން ވިދާޅުވީ ހުކުރު ދުވަހު ރަށުތެރެއަށް ވަރަށް ބޮޑަށް ވައި އެރި ކަމަށާއި، ރުށްގަސްތައް ވެއްޓިފައިވާ ކަމަށެވެ. އަދި ނޫރު މިސްކިތުގެ ފުރާޅު އެއްލާލި ކަމަށް އޭނާ ވިދާޅުވިއެވެ.

އަބްދުއްސައްތާރު ވިދާޅުވީ މިހާރު އެރަށް އާއްމު ހާލަތަށް ގެނެވިފައިވާ ކަމަށާއި، މީހަކަށް ގެއްލުމެއް ނުވާ ކަމަށެވެ.

މަކުނުދޫއަށް ލިބުނު ގެއްލުންތަކާ ގުޅޭގޮތުން އެރަށުގެ ކައުންސިލް މެންބަރު މުހައްމަދު ޝައްމާހު ވިދާޅުވީ ރަށުގެ އާއްމު ހާލަތު ރަނގަޅު ކަމަށެވެ. ވިލާގަނޑުގައި ވަރަށް ވައިގަދަވާ ކަމަށާއި، ރައްކާތެރިކަމުގެ ފިޔަވަޅު އަޅާފައިވާ ކަމަށެވެ. އަދި ހުކުރު ދުވަހު އައި ވިލާގަނޑުގައި ރަށުގައި ހުރި ހަޓެއްގެ ފުރާޅު އެއްލާލި ކަމަށާއި، އިތުރު ގެއްލުމެއް ނުލިބޭ ކަމަށެވެ.

މީގެ އިތުރުން ހއ.މުރައިދޫ ކައުންސިލްގެ ނައިބު ރައީސް އަބްދުލްކަރީމް އަލީ ވިދާޅުވީ، މޫސުން ގޯސްވެ، އެރަށަށް ހުކުރު ދުވަހުގެ އަސަރުގެ ވަގުތު އެރިކޮޅިގަނޑުގައި 4 ގެއަކަށް ގެއްލުންވެފައިވާ ކަމަށާއި، 4 ގޭގެ ފުރާޅު އެއްލާލި ކަމަށެވެ. ދެ ގެއެއް އާއްމު ހާލަތަށް ގެނެސްފައިވާއިރު، އަނެއް ދެ ގޭގެ މީހުން، އެމީހުންނާ ގުޅުންހުރި ގެތަކަށް ބަދަލުކޮށްފައިވާ ކަމަށެވެ. އަދި ވިދާޅުވީ އެތަނުން އެއްގޭގައި ދިރިއުޅެމުންދިޔައީ އެންމެ އަންހެނެއް ކަމަށާއި، އަނެއްގޭގައި ދިރިއުޅެމުންދިޔައީ އަންހެނެއްގެ އިތުރުން އޭނާގެ ދަރިފުޅު ކަމަށެވެ.

އަބްދުލްކަރީމް ވިދާޅުވީ ކައުންސިލް އިމާރާތުގެ ފުރާޅު ވެސް އެއްލާލުމުގެ ސަބަބުން، ބޮޑެތި ގެއްލުންތަކެއް ލިބިފައިވާ ކަމަށެވެ. އަދި ކައުންސިލް އިމާރާތުގެ މީޓިން ރޫމްގައި 75 އިންޗީގެ ޓީވީއަކާއި، އޭސީއެއްގެ އިތުރުން ސީޕީޔޫއެއް ހަލާކުވެފައިވާ ކަމަށް އޭނާ ވިދާޅުވިއެވެ.

ވިއްސާރައިގެ ސަބަބުން ގެއްލުން ލިބުނު ރިޕޯޓު ތައްޔާރުކުރުމުގެ މަސައްކަތް ކުރަމުންދާކަން ފާހަގަކުރައްވައި އަބްދުއްކަރީމް ވިދާޅުވީ ގެއްލުން ލިބުނު ގެތަކަށް ގިނަ ބަޔަކު އެހީ ފޯރުކޮށްދެމުންދާ ކަމަށެވެ. އަދި ރަށުގެ އާއްމު ހާލަތު ރަނގަޅު ކުރުމަށް ސާފުކުރުމުގެ މަސައްކަތް ވެސް ކުރިއަށް ގެންދާ ކަމަށް އޭނާ ވިދާޅުވިއެވެ. ރަށު ތެރެއަށް ވެއްޓިފައިވާ ރުށްގަސްތަކާއި، އެހެނިހެން އާލަތްތައް ނެގުމުގެ މަސައްކަތުގެ ތެރެއިން ބައެއް މީހުންނަށް އަނިޔާވެފައިވާ ކަމަށް ވެސް އަބްދުއްކަރީމް ވިދާޅުވިއެވެ.

ހުޅަނގު މޫސުމުގެ ބާރު ގަދަވެ ރާއްޖޭގެ އެކި ރަށްތަކަށް ގެއްލުން ލިބިގެންދާއިރު، މޫސުމާބެހޭ ގައުމީ އިދާރާއިން ބުނީ، އެކިހިސާބަށް ވިއްސާރަކުރުމާއެކު ގުގުރާނެ ކަމަށާއި، ބައެއް ރަށްތަކަށް ބޯކޮށް ވާރޭވެހުން އެކަށީގެންވާ ކަމަށެވެ.

މީގެ އިތުރުން ހޮނިހިރު ދުވަހުގެ ހެނދުނު 9:45ން މެންދުރުފަހު 3:30 ހއ.އަތޮޅުން ފެށިގެން ތ.އަތޮޅަށް ވަނީ ވައިޓް އެލާޓް ނެރިފައެވެ.

މޫސުމާބެހޭ ގައުމީ އިދާރާއިން ބުނި، ހުޅަނގާއި ހުޅަނގުއުތުރުން ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި، ވިލާގަނޑުގައި ގަޑިއަކު 45 މޭލާއި 55 މޭލާ ދެމެދުގެ ބާރުމިނަށް ވައިގަދަވުން އެކަށީގެންވާ ކަމަށެވެ. އަދި އާއްމު ގޮތެއްގައި ކަނޑުތައް ގަދަވާނެ ކަމަށާއި، ރާޅުގެ އުސްމިނުގައި 5 ނުވަތަ 8 ފޫޓު ހުންނާނެ ކަމަށް މޫސުމާބެހޭ ގައުމީ އިދާރާއިން ބުނެއެވެ.

ދިޔަވަރު ބޮޑުވާ ގަޑިތަކުގައި ބައެއް ރަށްތަކަށް އުދައިގެ އަސަރުކުރުން އެކަށީގެންވާތީ، ހުރިހާ ފަރާތްތަކުން، ޚާއްސަކޮށް ކަނޑުދަތުރު ކުރައްވާ ފަރާތްތަކުން މޫސުމަށް ސަމާލުވުމަށް ވަނީ އިލްތިމާސްކޮށްފައެވެ.