އެމެރިކާގެ ރައީސް ޑޮނަލްޑް ޓްރަމްޕް އަށް ނާރުގެ އާލާސްކަންފުޅެއް ޖެހިފައިވާ ކަމަށް ވައިޓް ހައުސް އިން އެއްބަސް ވެއްޖެ އެވެ.

ވައިޓް ހައުސް އިން މިކަން ހާމަ ކޮށްފައި ވަނީ އޭނާގެ އަތްތިލައިގެ ބޭރުފުށުގެ ހަންގަނޑުގައި މައްސަލަ އެއް ހުރި ކަމުގެ ނިޝާންތަކެއް ފެންނަ ފޮޓޯ ތަކެއް އާންމުވުމާ ގުޅިގެން ނޫސްވެރިން ކުރި ސުވާލުތަކަށް ޖަވާބު ދިނުމުގެ ގޮތުންނެވެ.

އެމެރިކާގެ ރައީސް ޑޮނަލްޑް ޓްރަމްޕަށް ވަނީ ނާރުތަކުގެ ދާއިމީ އާލާސްކަންފުޅެއް ޖެހިފައި ކަމަށް ބުރާސްފަތި ދުވަހު ވައިޓް ހައުސް އިން ވަނީ ޔަގީން ކޮށްދީފައެވެ. މިކަން ވައިޓް ހައުސް އިން ހާމަ ކުރި އިރު، ފާއިތުވި ދުވަސްތަކުގައި ރައީސްގެ އަތްތިލައިގެ ބޭރު ފަރާތުގައި ލޭ ގަނޑުވުމުގެ ނިޝާންތަކެއް ފެންނަން ހުރި ފޮޓޯތަކަކާ ގުޅިގެން ގިނަ ބަޔަކު ދިޔައީ އެކަމާ ބެހޭ ގޮތުން އެކި ވާހަކަތައް ދައްކަމުންނެވެ.

ވައިޓް ހައުސްގެ ޕްރެސް ސެކްރެޓަރީ ކެރޮލައިން ލެވިޓް ބުނެފައިވާ ގޮތުގައި ފަހަކަށް އައިސް ޓްރަމްޕްގެ ފައިންޕުޅު ދުޅަވުމުގެ އަލާމާތްތަކެއް ފެނުމާ ގުޅިގެން ޓްރަމްޕް ވަނީ ނަރުތަކާ ގުޅޭ ޓެސްޓުތައް ހިމެނޭ "ފުރިހަމަ މެޑިކަލް ޗެކަޕެއް" ހައްދަވާފައެވެ.

ލެވިޓް ބުނެފައިވާ ގޮތުގައި ޓްރަމްޕްގެ އަތްތިލައިގައި ފެންނަ ލޭގަނޑުވުމުގެ ނިޝާންތަކަކީ ގަވައިދުން އެސްޕިރިން ބޭނުންކުރައްވަމުން ގެންދަވަނިކޮށް "ގިނައިން ސަލާން ކުރައްވަން ޖެހިވަޑައިގަތުމުގެ ސަބަބުން ހަންގަނޑަށް ލިބިފައިވާ ގެއްލުންތަކެއް" ކަމަށެވެ. އަދި އެސްޕިރިން ބޭނުން ކުރައްވަނީ "ހިތުގެ ބަލިތަކުން ރައްކާތެރި ވުމަށް ޢާންމުކޮށް ބޭނުންކުރާ ފަރުވާއެއްގެ ގޮތުން" ކަމަށް އޭނާ ބުނެފައިވެއެވެ.

79 އަހަރުގެ ޓްރަމްޕް ވަނީ އޭނާގެ ދުޅަހެޔޮ ޞިއްޙަތާ ބެހޭ ގިނަގުނަ ވާހަކަތަކެއް ދައްކަވާފައެވެ. އެ ގޮތުން އެއްފަހަރު އޭނާ އަމިއްލަފުޅަށް ސިފަ ކުރައްވަމުން ވިދާޅުވީ އޭނާ އަކީ "މިހާތަނަށް އެމެރިކާ ދުށް އެންމެ ދުޅަހެޔޮ ޞިއްޙަތެއްގައި ހުރި ރައީސް" ކަމުގައެވެ.

ރައީސް އަށް ޖެހިފައިވާ ނާރުތަކުގެ ބަލީގެ ނަމަކީ "ކްރޯނިކް ވީނަސް އިންސަފިޝަންސީ" އެވެ. މި ބައްޔަކީ ފައިގެ ނާރުތަކުން ހިތައް ލޭ ފޮނުވުމުގައި މައްސަލަ ޖެހުމުގެ ސަބަބުން ފައިގެ ތިރީކޮޅުގައި ލޭ ޖަމާވެ، ފައި ދުޅަވާ ބައްޔެކެވެ.

ކްރޯނިކް ވީނަސް އިންސަފިޝަންސީ އަކީ ސިއްހީ މާހިރުން ބުނާ ގޮތުގައި ނާރުތަކާއި ވޭލްވްތައް މަސައްކަތް ނުކުރުމުގެ ސަބަބުން ފައިގެ ތިރިއަށް ލޭ ޖަމާވާ ގޮތް މެދުވެރިވުމެވެ.

ލެވިޓް ބުނެފައިވާ ގޮތުގައި، ޓްރަމްޕް ހެއްދެވި ޓެސްޓް ތަކުން "ލޭ ގަނޑުވުމުގެ ނުވަތަ ނާރުތަކުގެ ބައްޔެއްގެ އެއްވެސް ނިޝާނެއް" ފެނިފައެއް ނުވެއެވެ. އަދި ޓެސްޓުތަކުގެ ހުރިހާ ނަތީޖާ ތަކެއް ވެސް ހުރީ "ޢާންމު މިންގަނޑުތަކުގެ ތެރޭގައި" ކަމަށް އޭނާ ބުނެފައިވެއެވެ.

ނޫސްވެރިންނާ ހިއްސާ ކުރެވުނު ވައިޓް ހައުސްގެ ޑޮކްޓަރު ޝޯން ބާބަބެއްލާގެ ނޯޓެއްގައި ބުނެފައިވާ ގޮތުގައި މި ބައްޔަކީ "ނުރައްކާތެރި ނޫން އަދި ޢާންމު" ބައްޔެކެވެ. ޚާއްޞަކޮށް 70 އަހަރުން މަތީގެ މީހުންގެ މެދުގައި މި ބަލި އާންމު ކަމަށް އޭނާ ބުނެފައިވެއެވެ.

އިތުރު ޓެސްޓުތަކުން ދައްކާ ގޮތުގައި ޓްރަމްޕްގެ "ހިތުގެ މައްސަލައެއް، ކުޑަކަމުދާ ނިޒާމުގެ މައްސަލައެއް، ނުވަތަ މުޅި ހަށިގަނޑަށް ބައްޔެއް ފެތުރިފައިވާ ކަމުގެ އެއްވެސް ނިޝާނެއް" ފެނިފައެއް ނުވެއެވެ. މިކަން ބާބަބެއްލާ އޭނާގެ ނޯޓުގައި ބަޔާން ކޮށްފައި ވެއެވެ.

ޖުމްލަ ގޮތެއްގައި، ޓްރަމްޕް ހުންނެވީ "ވަރަށް ރަނގަޅު ޞިއްޙަތެއްގައި" ކަމަށް ޑޮކްޓަރު ލިޔެފައިވެއެވެ.

ޖުލައި 13 ވަނަ ދުވަހު ނިއު ޖާރސީ ގައި ބޭއްވުނު ފީފާ ކްލަބް ވޯލްޑް ކަޕްގެ ފައިނަލް މެޗުގައި ޓްރަމްޕްގެ ފައިންޕުޅު ދުޅަވެވެފައިވާ ތަން ނަގާފައިވާ ފޮޓޯތަކުން ފާހަގަ ވެއެވެ. އަދި މި ހަފްތާގެ ކުރީކޮޅު ވައިޓް ހައުސް ގައި ބަޙްރެއިންގެ ބޮޑުވަޒީރު ސަލްމާން ބިން ޙަމަދު ބިން ޢީސާ އާލް ޚަލީފާ އާ ޓްރަމްޕް ބައްދަލު ކުރެއްވި އިރު ނެގުނު ފޮޓޯތަކުގައި ޓްރަމްޕްގެ އަތްތިލައިގައި ހަމުގެ މައްސަލަ އެއް ހުރި ކަމުގެ ނިޝާންތަކެއް ފެންނަން ހުއްޓެވެ.

މީގެ ކުރިން ފެބްރުއަރީ މަހު ފްރާންސްގެ ރައީސް އެމެނުއެލް މެކްރޯން އާ ބައްދަލު ކުރެއްވި އިރު ނެގުނު ފޮޓޯއެއްގައިވެސް ރައީސްގެ އަތްޕުޅުގައި ހަމުގެ މައްސަލަ ހުރި ކަމުގެ ނިޝާނެއް ފެންނަން ހުއްޓެވެ.

ޓްރަމްޕް ގެ ފައިންޕުޅު ދުޅަވެފައިވާ ތަނާއި ލޭ ގަނޑުވުމުގެ ނިޝާންތައް ފެނުމާ ގުޅިގެން އިންޓަރނެޓް ގައި ގިނަގުނަ ޝައްކުތަކާއި ވަހުމު ތައް ފެތުރިފައިވެއެވެ. އަދި ރައީސް އަށް ވަނީ ޢާންމުކޮށް ހާމަކޮށްފައި ނުވާ އާލާސްކަންފުޅެއް ޖެހިފައި ކަމަށް ބައެއް މީހުން ލަފާކޮށްފައިއެވެ.

އޭޕްރީލް މަހު ހެދި އަހަރީ މެޑިކަލް ޗެކަޕަކަށްފަހު، ވައިޓްހައުސް ގެ ޑޮކްޓަރު ލިޔެފައިވަނީ ޓްރަމްޕް "ވިސްނުމުގެ ގޮތުންނާއި ޖިސްމާނީ ގޮތުން ދުޅަހެޔޮ ޞިއްޙަތެއްގައި" ހުންނެވި ކަމަށެވެ.

ޓްރަމްޕް ދެވަނަ ދައުރަށް ހުވާކުރެއްވީ ޖެނުއަރީ މަހު އޭނާގެ އުމުރުން 78 އަހަރާއި 7 މަސް ވެފައިވަނިކޮށެވެ. މިއީ އެމެރިކާގެ ރައީސްކަމުގެ މަޤާމަށް ހުވާކުރެއްވި އެންމެ ދޮށީ އުމުރުގެ ރައީސެވެ.