ނޯބެލް އިނާމަށް ނަތަންޔާހޫ، ޓްރަމްޕްގެ ނަން ހުށަހަޅުއްވައިފި 

ނޯބެލް ސުލްޙައިގެ އިނާމަށް އެމެރިކާގެ ރައީސް ޑޮނަލްޑް ޓްރަމްޕްގެ ނަން ހުށަހަޅުއްވާފަައިވާ ކަމަށް، އިސްރާއީލްްގެ ބޮޑު ވަޒީރު ބެންޖަމުން ނަތަންޔާހޫ ވިދާޅުވެއްޖެ އެވެ. 

މިކަން ނަތަންޔާހޫ ހާމަ ކުރެއްވީ މިހާރު އޭނާ އެމެރިކާ އަށް ކުރައްވާ ރަސްމީ ދަތުރުފުޅުގައި، އެމެރިކާގެ ރިޔާސީ ގަނޑުވަރު ވައިޓްހައުސްގައި ޓްރަމްޕާ އެކު ބޭއްވި ފަރިއްކޮޅެއްގެ ތެރޭގަ އެވެ.

އެގޮތުން ނަތަންޔާހޫ ވިދާޅުވީ ޓްރަމްޕް ގެންދަވަނީ މިހާރު ވެސް ސުލްޙައިގެ ގިނަ މަސައްކަތްތަކެއް ކުރަމުން ކަމަށެވެ. އެގޮތުން އެއް ޤައުމުން އަނެއް ޤައުމަށް، އަދި އެއް ސަރަހައްދުން އަނެއް ސަރަހައްދަށް ސުލްޙަވެރިކަން ޤާއިމު ކުރުމަށް ބާރު އަޅުއްވަމުން ކަމަށް ވެސް ނަތަންޔާހޫ ވިދާޅުވި އެެވެ. 

އެހެން ވިދާޅުވުމަށް ފަހު ނަތަންޔާހޫ ވަނީ، ނޯބެލް އިނާމުގެ ކޮމެޓީ އަށް އޭނާ ފޮނުއްވި ސިޓީ ވެސް ޓްރަމްޕަށް ރައްދު ކުރައްވައިފަ އެވެ. މީގެ ކުރިން ވެސް ޓްރަމްޕް އަށް ތާއީދު ކުރައްވާ ފަރާތްތަކާއި، އޭނާގެ ޕާޓީ އަށް ނިސްބަތްވާ މެމްބަރުން ވެސް ވަނީ ނޯބެލް އިނާމަށް ޓްރަމްޕްގެ ނަން ހުށަހަޅުއްވައިފަ އެވެ. 

ޓްރަމްޕް އަށް މި އިނާމު ނުލިބޭތީ އޭނާގެ ވަފާތެރި ސަޕޯޓަރުން އަދި އޭނާ ވެސް ވަނީ މީގެ ކުރިން ވެސް އިނާމު ކޮމެޓީ އަށް ނުރުހުން ފާޅު ކޮށްފަ އެވެ. އެގޮތުން އިންޑިއާ އާއި ޕާކިސްތާންގެ މައްސަަލަ އާއި، ސާބިއާ އާއި ކޮސޯވޯގެ ދެމެދުގައި އުފެދުނު މައްސަލައިގެ މެދުވެރިއެއްގެ ގޮތުގައި ޓްރަމްޕް އަދާ ކުރެއްވި ދައުރަށް އިނާމު ލިބެން ވާނެ ކަމަށް ޓްރަމްޕް އަދި އެ ފަރާތްތަކުން ޤަބޫލު ކުރެ އެވެ. 

މީގެ އިތުރުން މިޞްރާއި، އިތިއޯޕިއާގެ ދެ މެދުގައި ސުލްޙަވެރިކަން ޤާއިމު ކުރުމާއި، އިސްރާއީލާއި ޤަރަބި ޤައުމު ތަކުގެ މެދުގައި އޮތް ގުޅުން ރަނގަޅު ކުރުމާއި، ސުލްޙަވެރިކަން ހޯދުމަށް ކުރެއްވި މަސައްކަތުގެ ކްރެޑިޓް ލިބެން ވާނެ ކަމަށް ޤަބޫލު ކުރައްވާ ކަމަށް ޓްރަމްޕް މީގެ ކުރިން ވެސް ވިދާޅުވެފައިވެ އެވެ. 

މިދިޔަ އަހަރު އޮތް އެމެރިކާގެ ރިޔާސީ އިންތިޚާބުގެ ތެރޭގައި ޓްރަމްޕް ވަނީ، ވެރިކަމަށް ވަޑައިގެންނެވުމާ އެކު އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ އާއި، ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ހުއްޓުވާނެ ކަމަށް ވިދާޅުވެފަ އެވެ. ނަމަވެސް ވެރިކަަމަށް ވަޑައިގެންނެވި ފަހުން، އަދި ވެސް އެ ދެ ހަނގުރާމަ ދަނީ ކުރިއަށެވެ.

މިވަގުތު ޓްރަމްޕް ވަނީ ޣައްޒާ ހަނގުރާމަ ހުއްޓުވުމަށް އެއްބަސްވުމެއް ވެސް ހުށަހަޅުއްވައިފަ އެވެ. އަދި އެ އެއްބަސްވުން ޤަބޫލު ކުރުމަށް އޭނާ ވަނީ އިސްރާއީލް އަދި ހަމާސް ޖަމާއަތަށް ވެސް ގޮވާލައްވައިފަ އެވެ. އަދި ޓްރަމްޕް ހުށަހަޅުއްވާފައިވާ އެއްބަސްވުމަށް ވުރެ ވަކިން ރަނގަޅު އެހެން އެއްބަސްވުމެއް ނޯންނާނެ ކަމަށް ވެސް ވިދާޅުވި އެވެ.

ނޯބެލް ސުލްޙައިގެ އިނާމަށް ޓްރަމްޕްގެ ނަން ނަތަންޔާހޫ ހުށަހަޅުއްވާފައިވާއިރު، ޓްރަމްޕާއި ނަތަންޔާހޫ އަކީ ގާތް ގުޅުމެއް އޮންނަ ދެ ބޭފުޅުންނެވެ. މިހާރު ނަތަންޔާހޫ އެމެރިކާ އަށް ކުރައްވާ ދަތުރުފުޅަކީ، އެމެރިކާގެ ރައީސް ކަމުގެ ދެ ވަނަ ދައުރަކަށް ޓްރަމްޕް ވަޑައިގެންނެވި ފަހުން ކުރައްވާ ތިން ވަނަ ދަތުރުފުޅެވެ.