މޮޓޯ ޖީޕީ: ޑޮވީޒިއޯސޯ ލީޑު ފުޅާކޮށްފި

މޮޓޯ ޖީޕީގެ އިނގިރޭސި ގްރޭންޑް ޕްރީ ޑުކާޓީގެ އަންދްރޭ ޑޮވީޒިއޯސޯ ކާމިޔާބު ކޮށްފިއެވެ

އިނގިރޭސިވިލާތުގެ ސިލްވާސްޓޯން ރޭސިން ސާކިޓުގައި ކުރިޔަށް ދިޔަ އިނގިރޭސި ގްރޭންޑް ޕްރީ ޑޮވީޒިއޯސޯ ކާމިޔާބު ކޮށްފައިވަނީ މަވެރިކް ވިނާލޭސް އަދި ވެލެންޓީނޯ ރޮސީ ފަހަތަށް ޖައްސާލުމަށްފަހުއެވެ.

ޑޮވީޒިއޯސޯ ރޭސް ނިންމާފައިވަނީ 40 މިނުޓު 45 ސިކުންތުންނެވެ. އަދި ވިނާލޭސް ރޭސް ނިންމާފައިވަނީ އޭގެ ސިކުންތެއް ފަހުންނެވެ. ރޮސީވެސް ރޭސް ނިންމާފައިވަނީ ގާތްގަނޑަކަށް ހަމަ ވިނާލޭސްއާއި އެއްކޮށެވެ. ރޭހުގެ ބާކީ ތިން ލެޕުއޮތްއިރުވެސް ކުރީގައި އޮތީ ރޮސީއެވެ. އެހެން ނަމަވެސް ރޭހުގެ 17 ވަނަ ލެޕުގައި ޑޮވީޒިއޯސޯއާ ވިނާލޭސް ވަނީ ރޮސީ ފަހަތަށް ޖައްސާލުމަށްފަހު ކުރިޔަށް ޖެހިލާފައެވެ.

ރޭސް ނިންމާލުމަށްފަހު ވާހަކަ ދައްކަމުން ޑޮވީޒިއޯސޯ ބުނެފައިވަނީ ހުރިހާ ޑްރައިވަރުންގެ ފަރާތުންވެސް ވާދަވެރި ރޭހެއް ފެނިގެންދިޔަ ކަމަށާއި ރޭހުގެ ނަތިޖާ ނެރެވުނީ ފަހު ދެ ލެޕުގައި ކުރި ހިތްވަރުން ކަމަށެވެ. ސިލްވާސްޓޯންގައި ތިންވަނައަށް ދިޔަ ރޮސީ ބުނީ އުއްމީދު ކުރީވެސް ޕޯޑިއަމުން ނިންމާލުން ކަމަށާއި އެކަން ހާސިލްވުމުން ވަރަށް އުފާވާ ކަމަށެވެ.

މި ރޭހަށް ފަހު މޮޓޯ ޖީޕީ ޑްރައިވަރުންގެ ރޭންކިންގައި ޑޮވީޒިއޯސޯއަށް ލިބިފައިވާ ލީޑު އޭނާ ވަނީ އިތުރަށް ފުޅާކޮށްފައެވެ. އެގޮތުން 183 ޕޮއިންޓާއެކު އެއްވަނައިގައި އޭނާ އޮތްއިރު 174 ޕޮއިންޓާއެކު ދެވަނައިގައި އޮތީ ހޮންޑާގެ މާކް މާކުއޭޒްއެވެ. 170 ޕޮއިންޓާއެކު ޔަމަހާގެ މަވެރިކް ވިނާލޭސް ތިންވަނައިގައި އޮތްއިރު އޭނާގެ ފަހަތުން ހަތަރު ވަނައިގަ އޮތީ ހަމަ ޔަމަހާގެ ވެލެންޓީނޯ ރޮސީއެވެ.

ކޮންސްޓްރަކްޓާސް ޗެމްޕިއަންޝިޕުގައި 231 ޕޮއިންޓާއެކު ޔަމަހާ އޮތްއިރު ދެވަނައިގައި 224 ޕޮއިންޓާއެކު އޮތީ ހޮންޑާއެވެ. އަދި 212 ޕޮއިންޓާއެކު ތިންވަނައިގައި އޮތީ ޑުކާޓީއެވެ.

މިދިޔަ އަހަރުގެ މޮޓޯޖީޕީ ޗެމްޕިއަންޝިޕް ކާމިޔާބުކުރީ ހޮންޑާގެ މާކް މާކުއޭޒްއެވެ