ޕްރިމިއާ ލީގުގައި މެންޗެސްޓާ ސިޓީ ޕޮއިންޓް ތާވަލުގެ ހަތަރު ވަނައަށް ވައްޓާލުމަށްފަހު ޗެލްސީން ލީގުގައި އަނެއްކާވެސް ލީޑު ފުޅާކޮށްފި އެވެ.

ބުދަ ދުވަހުގެ ރޭ ކުޅުނު މެޗުން ސިޓީއާ ވާދަކޮށް ޗެލްސީން މެޗު ކާމިޔާބުކުރީ 1-2 ގެ ނަތީޖާއަކުންނެވެ.

ޗެލްސީ ދަނޑުގައި ކުޅުނު މި މެޗުގައި ފުރަތަމަ ލަނޑު ޖަހާ ލީޑު ނެގީވެސް އެޓީމުންނެވެ. މި ލަނޑު 10 ވަނަ މިނެޓުގައި އެޓީމަށް ކާމިޔާބުކޮށް ދިނީ އެޑެން ހަޒާޑް އެވެ.

މި ލަނޑަށްފަހުވެސް ޗެލްސީން ދިޔައީ ސިޓީގެ ގޯލަށް ނުރައްކާކުރަމުންނެވެ. އެހެންނަމަވެސް ސިޓީން ވަނީ އެޓީމުގެ ކުޅުން ރަނގަޅުކޮށް 26 ވަނަ މިނެޓުގައި ސާޖިއޯ އަގުއެރޯގެ ލަނޑުން މެޗުގެ ނަތީޖާ ހަމަހަމަކޮށްފައެވެ.

މި ނަތީޖާއާއެކު ސިޓީން ރަނގަޅަށް ކުޅެމުން ދަނިކޮށް 35 ވަނަ މިނެޓުގައި ހަޒާޑް ވަނީ އިތުރު ލަނޑެއް ކާމިޔާބުކޮށް އެޓީމަށް އަނބުރާ ލީޑު ހޯދައިދީފައެވެ. މި ލަނޑު އޭނާ ކާމިޔާބުކުރީ ޗެލްސީއަށް ލިބުނު ޕެނަލްޓީއަކުންނެވެ. މި ޕެނަލްޓީ ސިޓީގެ ކީޕަރު ދިފާއުކުރި ނަމަވެސް ރީބައުންޑުން ހަޒާޑް ވަނީ ލަނޑު ޖަހާފައެވެ.

މި ނަތީޖާއާއެކު ފުރަތަމަ ހާފް ނިމުނީ 1-2 ގެ ނަތީޖާއިން ސިޓީގެ މައްޗަށް ޗެލްސީ ކުރީގައި އޮވެގެންނެވެ.

ދެވަނަ ހާފް ފެށިގެން ސިޓީން ވަނީ އެޓީމުގެ ކުޅުން ރަނގަޅުކޮށްފައެވެ. އެގޮތުން އެޓީމުން ވަނީ ޗެލްސީގެ ހާފަށް ބާރުބޮޑުކޮށް ލަނޑު ޖެހުމަށް ގިނަ ފުރުސަތުތައް ތަނަވަސްކޮށްފައެވެ.

އެހެންނަމަވެސް މެޗުގެ ފަހު 10 ވަރަކަށް މިނެޓު ތެރޭގައި ޗެލްސީން ވަނީ މެޗުގެ ކޮންޓްރޯލް އަނބުރާ ހޯދާ ސިޓީގެ ގޯލަށް ނުރައްކާކޮށްފައެވެ. އެހެންނަމަވެސް މެޗު ނިމިގެންދިޔައީ ދެޓީމުންކުރެ ޓީމަކަށް އިތުރަށް ލަނޑެއް ކާމިޔާބުނުކުރެވިއެވެ.

މި ނަތީޖާއާއެކު ޗެލްސީ އޮތީ ކުޅުނު 30 މެޗުން ލިބުނު 72 ޕޮއިންޓާއެކު ޕޮއިންޓް ތާވަލުގެ އެއްވަނައިގަ އެވެ. މެޗުން ބަލިވި ސިޓީ އޮތީ ކުޅުނު 30 މެޗުން ލިބުނު 58 ޕޮއިންޓާއެކު ޕޮއިންޓް ތާވަލުގެ ހަތަރުވަނައިގަ އެވެ.