އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ނިމުމަކަށް ގެނައުމަށްޓަކައި، އެމެރިކާގެ ރައީސް ޑޮނަލްޑް ޓްރަމްޕް ހުށަހަޅާފައިވާ ހުށަހެޅުން ދިރާސާ ކުރަމުން އަންނަ ކަމަށް، ހަމާސް ޖަމާއަތުން ބުނެފި އެވެ.

ބުދަ ދުވަހު ހަމާސް އިން އާންމު ކުރި ބަޔާނެއްގައި ބުނެފައި ވަނީ، އެމެރިކާގެ ރައީސް ޓްރަމްޕްގެ ފަރާތުން ހުށަހަޅުއްވާފައިވާ ފަހުގެ ހުށަހެޅުންތައް ދިރާސާ ކުރަމުން އަންނަ ކަމަށެވެ. ނަމަވެސް، ހަނގުރާމަ ހުއްޓާލުމަށް ވެވޭ އެއްބަސްވުމުގެ ތެރެއިން، ޣައްޒާގައި ޙަރަކާތްތެރި ވަމުން އަންނަ އިސްރާއީލްގެ ހުރިހާ ސިފައިން ނެރުމަކީ ޝަރުތެއް ކަމަށް ވަނީ ފާހަގަ ކޮށްފަ އެވެ. 

ހަނގުރާމަ ހުއްޓާލުމުގެ އެއްބަސްވުމާ ގުޅޭ ގޮތުން ދާދި ފަހުން ޓްރަމްޕް ވިދާޅުވެފައި ވަނީ، އިސްރާއީލާ އެކު ދިގު މަޝްވަރާތަކެއް ކުރެވިފައިވާ ކަމަށާއި، އެ މަޝްވަރާތަކުގެ ނަތީޖާ ރަނގަޅު ކަމަށެވެ. އަދި 60 ދުވަހުގެ މުއްދަތަކަށް ހަނގުރާމަ ހުއްޓާލުމަށް އިސްރާއީލް އިން އެއްބަސްވެފައިވާ ކަމަށް ވެސް ޓްރަމްޕް ވިދާޅުވެފައިވެ އެވެ. 

މިޞްރާއި ޤަތަރުން މެދުވެރިވެގެން ހުށަހަޅާފައިވާ އެއްބަސްވުނ ދިރާސާ ކުރަމުން އަންނަ ކަމަށް ހަމާސް އިން ހާމަކޮށްފައިވާއިރު، ޓްރަމްޕް ވިދާޅުވެފައި ވަނީ އެ ހުށަހެޅުމެއް ވުރެ ވަކިން ފުރިހަމަ އެހެން ހުށަހެޅުމެއް ދެން ނުލިބޭނެ ކަމަށެވެ. އެއްބަސްވުން ފައިނަލް ކުރުމުގެ ކުރިން ހަމާސްގެ މަޤުސަދަކީ، އިސްރާއީލްގެ ހަނގުރާމަ ނިމުމަކަށް ގެެނެސް، އިސްރާއީލްގެ ސިފައިން ޣައްޒާ އިން ފޭބުމެވެ. 

ޣައްޒާގެ ރައްޔިތުންގެ ތެރެއިން ގިނަ ބަޔަކު މިވަގުތު ވެސް އުންމީދު ކުރަމުން އަންނަނީ، އިސްރާއީލްގެ އަނިޔާވެރި އަމަލުތައް ހުއްޓޭނެ ގޮތެއް ހޯދުމެވެ. އަދި އެންމެ ކުޑަ މިނުން، ވަގުތީ ގޮތުން ވިޔަސް ހަނގުރާމަ ހުއްޓާލުމަށް އެ ރައްޔިތުން ތިބީ އިންތިހާ އަށް ބޭނުންވެފަ އެވެ. 

އެހެން ނަމަވެސް، މަސްރަހު ދިރާސާ ކުރާ ގިނަ ފަރާތްތަކުން އުފައްދަމުން އަންނަ ސުވާލަކީ، ހަނގުރާމަ ހުއްޓާލުމަށް ބާރު އަޅުއްވައި އެމެރިކާގެ ރައީސް ޓްރަމްޕް ވިދާޅުވަމުން އަންނަ ބަސްތަކުން ދެމެހެއްޓެނިވި ސުލްހަވެރިކަމެއް ގެނެވިދާނެތޯ އެވެ. މީޑިއާ ތަކުގައި ބުނެފައިވާ ގޮތުން ޓްރަމްޕްގެ ހުށަހެޅުމާ ގުޅިގެން އިސްރާއީލްގެ ސަރުކާރުގެ ތެރޭގައި ވެސް ވަނީ ދެބަސްވުންތަކެއް އުފެދިފަ އެވެ. 

މިވަގުތު ވެސް ހަމާސް ޖަމާއަތުގެ ބެލުމުގެ ދަށުގައި އިސްރާއީލްގެ 50 ރަހީނުން ތިބި ކަމަށް ވަނީ ހާމަކޮށްފަ އެވެ. އޭގެ ތެރެއިން މިވަގުތު ދިރި ތިބިި ކަމަށް ލަފާކޮށްފައި ވަނީ 20 މީހުންނެވެ. އިސްރާއީލްގެ ސިޔާސީ ލީޑަރުން ޤަބޫލު ކުރާ ގޮތުގައި، ހަނގުރާމަ ހުއްޓާލުމުގެ އެއްބަސްވުމަކަށް އާދެވިއްޖެ ނަމަ، އެ ރަހީނުން ދޫކޮށްލުމުގެ ފުރުސަތު ބޮޑުވާނެ އެވެ.