އިސްރާއީލްގެ ހަމަލާގައި އިންޑޮނޭޝިއާ ހޮސްޕިޓަލްގެ ޑައިރެކްޓަރު ޝަހީދު ކޮށްލައިފި
3 ޖުލައި 2025 | ބުރާސްފަތި 07:05ބުދަ ދުވަހު އިސްރާއީލް އިން ދިން މި ހަމަލާގައި އިންޑޮނޭޝިއާ ހޮސްޕިޓަލްގެ ޑިރެކްޓަރުގެ އިތުރުން، އޭނާގެ އަނބިކަނބަލުންނާއި، ދަރިންނާއި އަދި ދޮން ދަރިން ވެސް ވަނީ ޝަހީދު ކޮށްލާފައެވެ.
އުތުރު ޣައްޒާ ސްޓްރިޕްގެ އިންޑޮނޭޝިއާ ހޮސްޕިޓަލުގެ ޑިރެކްޓަރު ޑޮކްޓަރު މަރުވާން އަލް ސުލްތާން ޝަހީދު ކޮށްލާފައިވާއިރު، ގިނަ ބަޔަކު އެއްވެ ހިތާމަ ފާޅު ކުރަނީ
އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގައި ދިން ހަމަލާއެއްގައި، ޣައްޒާގެ އުތުރުގައި ހުންނަ މުހިންމު ހޮސްޕިޓަލެއް ކަމަށްވާ، އިންޑޮނޭޝިއާ ހޮސްޕިޓަލްގެ ޑިރެކްޓަރު ޑޮކްޓަރު މަރުވާން އަލް ސުލްޠާން ޝަހީދު ކޮށްލައިފި އެވެ.
ބުދަ ދުވަހު އިސްރާއީލް އިން ދިން މި ހަމަލާގައި އިންޑޮނޭޝިއާ ހޮސްޕިޓަލްގެ ޑިރެކްޓަރުގެ އިތުރުން، އޭނާގެ އަނބިކަނބަލުންނާއި، ދަރިންނާއި އަދި ދޮން ދަރިން ވެސް ވަނީ ޝަހީދު ކޮށްލައިފަ އެވެ. އޭއެފްޕީ އަށް އެ މައުލޫމާތު ދީފައި ވަނީ ޑިރެކްޓަރުގެ އާއިލީ މެމްބަރެއް ކަަމަށްވާ އަޙުމަދު އަލް ސުލްޠާން އެވެ.
އޭނާ ހާމަކޮށްފައިވާ ގޮތުގައި އިންޑޮނޭޝިއާ ހޮސްޕިޓަލްގެ ޑިރެކްޓަރާއި، އޭނާގެ އަނބިކަނބަލުންގެ އިތުރުން، ދަރިންނާއި ދޮންދަރިން ޝަހީދުކޮށްލާފައި ވަނިކޮށް ފެނުނީ، ޣައްޒާ ސިޓީގައި ހުރި އެޕާޓްމަންޓެއްގެ ތެރެއިންނެވެ.
އިސްރާއީލް އިން ޝަހީދު ކޮށްލާފައިވާ ޑިރެކްޓަރު މަރުވާން އަލް ސުލްޠާން ގެންދެވުނީ އަލް ޝިފާ ހޮސްޕިޓަލް އަށެވެ. ޑިރެކްޓަރުގެ ހަށިގަނޑު އަލް ޝިފާ ހޮސްޕިޓަލަށް ގެންދިޔުމާ އެކު، އެ ހޮސްޕިޓަލްގެ ޑިރެކްޓަރު މުޙައްމަދު އަބޫ ސަލްމިއްޔާ ވިދާޅުވެފައި ވަނީ، ޑޮކްޓަރު މަރުވާންގެ ހަށިގަނޑު އޮތީ މޫނު މަތިން ވެސް ނޭނގޭ ވަރަށް ޒަޚަމުވެފައި ކަމަށެވެ.
ފަލަސްޠީނުގެ މިނިވަން ކަމަށް މަސައްކަތް ކުރަމުން އަންނަ ހަމާސް ޖަމާއަތާއި، ޞިއްހީ ވުޒާރާ އިން ވަނީ އިސްރާއީލްގެ މި އަނިޔާވެރި އަމަލު ހަރުކަށި އިބާރާތުން ކުށްވެރި ކުރާ ކަމަށް ބުނެފަ އެވެ. އަދި ޣައްޒާގެ ޞިއްހީ ދާއިރާގައި މަސައްކަތް ކުރަމުން އަންނަ ފަރާތްތަކަށް އަމާޒުކޮށްް ދެމުން އަންނަ ހަމަލާތައް ކުށްވެރި ކުރާ ކަަމަށް ވެސް ބުންޏެވެ.
ޚާއްސަކޮށް އިސްރާއީލް އިން ޝަހީދު ކޮށްލާފައިވާ ޑޮކްޓަރު މަރުވާން އަކީ ގިނަ އަހަރުތަކެއް ވަންދެން ޞިއްޙީ ދާއިރާގައި މަސައްކަތް ކޮށްފައިވާ ފަރާތެއް ކަމަށް ވެސް ވަނީ ފާހަގަ ކޮށްފަ އެވެ. އަދި އެ އާއިލާ އަށް ލިބުނު ހިތާމަގައި އެންމެ ފުރިހަމަ އަށް ބައިވެރިވާ ކަމަށް ވެސް ހާމަކޮށްފައިވެ އެވެ.
އެކަމާ ގުޅިގެން އިސްރާއީލްގެ އަސްކަރިއްޔާ އިން އޭއެފްޕީ އަށް މައުލޫމާތު ދެމުން ބުނެފައި ވަނީ، އިސްރާއީލް އިން ދިން ހަމަލާގައި އާންމު ރައްޔިތުންނަށް ގެއްލުން ލިބިފައިވާ ކަމަށް ކޮށްފައިވާ ތުހުމަތު ތަހުގީގު ކުރަމުން އަންނަ ކަމަށެވެ. މީގެ އިތުރުން، ބުދަ ދުވަހު ހަމާސް ޖަމާއަތަށް ނިސްބަތްވާ ޓެރަރިސްޓަކަށް އަމާޒުކޮށް ހަމަލާ ދީފައިވާނެ ކަމަށް ވެސް ބުނެފައިވެ އެވެ.
