ފެބްރުއަރީ މަހު ހަވާލުކުރި ފައިނު އެއަރޕޯޓުގެ އަމަލީ މަސައްކަތުގެ ހިލަމެއް ނެތް!
ފައިނު އެއަރޕޯޓަކީ އެރަށުގެ ގިނަ މީހުން ދެކޮޅު ޕްރޮޖެކްޓަކަށް ވާއިރު ރަށުގައި އެއާރޕޯޓު އަޅާނެ ޖާގަވެސް ނެތް
ރައީސް މުޢިއްޒު ފައިނު ކައުންސިލާއި ބައްދަލުކުރެއްވުން (ފައިލް ފޮޓޯ)
މި އަހަރުގެ ފެބްރުއަރީ މަހު ފައިނު އެއަރޕޯޓު އެޅުމުގެ މަސައްކަތް އެމްޓީސީ އާއި އެކު އެއްބަސްވުމުގައި ސޮއި ކޮށްފައިވާއިރު މިހާތަނަށް އެއްވެސް އަމަލީ މަސައްކަތެއް ފެށިފައި ނުވާކަން ހާމަވެއްޖެ އެވެ.
އެމްޓީސީސީއާ އެކު ސޮއިކުރި އެއްބަސްވުމާ ގުޅޭ ގޮތުން އެމްއޭސީއެލް އިން އޭރު ބުނީ ސޮއިކުރީ އެއާޕޯޓުގެ މަސައްކަތް ފެށުމުގެ ކުރިން ހަދަންޖެހޭ އެސެސްމެންޓުތައް ކުރިއަށް ގެންދިޔުމުގެ އެއްބަސްވުމުގައި ކަމަށެވެ. އެހެން ނަމަވެސް އެ ރަށު ކައުންސިލުން ވިދާޅުވި ގޮތުގައި އެއަރޕޯޓު މަސައްކަތާއި ގުޅޭ އެއްވެސް އަޕްޑޭޓެއް ކައުންސިލަށް ލިބިފައި ނުވާ ކަމަށެވެ.
ފައިނުގައި އެއަރޕޯޓު އެޅުމަކީ ރައީސް މުޢިއްޒުގެ ރިޔާސީ ވައުދުފުޅެކެވެ. އަދި 2025 ވަނަ އަހަރު އިއްވެވި ރިޔާސީ ބަޔާނުގައި ވެސް ރައީސް ވިދާޅުވީ، ސަރަހައްދީ އެއާޕޯޓުތައް އެޅުމުގެ ގިނަ މަޝްރޫއުތަކެއް މި އަހަރު ކުރިއަށް ދާނެކަމަށެވެ. އެގޮތުން، ފައިނު އަދި އަލިފުށީގައި އެޅުމަށް ހަމަޖެހިފައިވާ އެއަރޕޯޓުގެ ވެސް މަސައްކަތް އެކި މަރުހަލާތަކުގައި މި އަހަރުގެ ތެރޭގައި ކުރިއަށް ދާނެކަމަށް ވިދާޅުވިއެވެ.
ނަން ހާމަ ނުކުރުމަށް އެދި މައުލޫމާތު ހިއްސާ ކުރި މީހަކު ބުނީ، އެ ދާއިރާގެ މެންބަރު އަދި ޕީއެންސީ ޕީޖީ ލީޑަރު އިބްރާހިމް ފަލާހު އެންމެ ފަހުން އެރަށަށް ދިޔަ ދަތުރުގައި ކުރިއަށް އޮތް 60 ދުވަހުގެ ތެރޭގައި މަސައްކަތް ކުރަން ފަށާނެ ކަމަށާއި މަސައްކަތައް ބޭނުންވާ ތަކެތި ރަށަށް އަރުވާނެ ވާހަކަ ވިދާޅުވި ކަމަށެވެ. ނަމަވެސް އެ ވިދާޅުވި 60 ދުވަސް ނިމިގެން ދިޔައިރުވެސް އެއަރޕޯޓުގެ މަސައްކަތައް ބޭނުންވާ ސާމާނު އެރަށަށް ނުގެންދާ ކަމަށާއި އަދި މަސައްކަތުގެ އެއްވެސް މަސައްކަތެއް ފަށާފައިވެސް ނުވާ ކަމަށެވެ.
އޭގެ އިތުރުން އެއަރޕޯޓު އަޅާނެ ވާހަކަ ވިދާޅުވެފައިވާތީ އެރަށުގައި ދިރިއުޅެން ބަންޑާރަ ގޯތި ބޭނުންވާ އެތައް ބަޔަކަށް އެ ފުރުސަތު ވަނީ ގެއްލިފައެވެ. ކައުންސިލް މައުލޫމާތު ދިން ގޮތުގައި މިހާރުވެސް ބަންޑާރަ ގޯއްޗަށް އެދި ބައެއް މީހުން ކައުންސިލަށް ސިޓީ ލާފައިވެ އެވެ. އަދި އެއަރޕޯޓު އަޅަން ވިދާޅުވެފައިވާތީ އަދި ސަރުކާރުންވެސް އެކަން ވަރަށް އަވަށް ފަށާނެ ވާހަކަ ދަންނަވާފައިވާތީ އެރަށުގައި ޒަމާނުއްސުރެ ކުރުމުން އައި މޫސުމީ ދަނޑުވެރިކަމަށްވެސް ދޫކުރާނެ ބިމެއް ނެތް ކަމަށް މި ނޫހަށް މައުލޫމާތުދިން މީހަކު ބުންޏެވެ. އޭގެ އިތުރުން ރަށުގައި ވިޔާފާރި ކުރުމަށްވެސް ނުވަތަ އިޖްތިމާއީ ކަމެއް ކުރުމަށްވިޔަސް އެއަރޕޯޓު އަޅާނެ ވާހަކަ ހުދު ރައީސް ވެސް ވިދާޅުވެފައިވާތީ ކުލީ ބިމެއް ދޫކުރެވެން ވެސް މިހާރު ނެތްކަން އޭނާ ފާހަގަ ކުރިއެވެ.
މިކަމާގުޅިގެން އިނގުރައިދޫ ދާއިރާގެ މެންބަރު އިބްރާހިމް ފަލާހު އަށް ގުޅުމުން ވިދާޅުވީ މިވަގުތު ބިޒީ ކަމަށާއި ފަހުން ހަބަރެއް ވާނެ ކަމަށެވެ. ނަމަވެސް އެއަރޕޯޓުގެ އެއްވެސް އަޕްޑޭޓެއް ލިބޭގޮތް ވަނީ ނުވެފަ އެވެ.
ފައިނު އެއަރޕޯޓަކީ އެރަށުގެ ގިނަ މީހުން ދެކޮޅު ޕްރޮޖެކްޓަކަށް ވާއިރު ރަށުގައި އެއާރޕޯޓު އަޅާނެ ޖާގަވެސް ނެތެވެ. މި ނޫހާއި ވާހަކަ ދެއްކި އިތުރު މީހަކު ބުނީ ފައިނުގައި އެއާރޕޯޓު އަޅަން ތާއީދު ކުރަނީ ޕީއެންސީގެ މަދު ބައެއް ކަމަށާއި އެމީހުންގެ ދަރިންވެސް އެއަރޕޯޓާއި ދެކޮޅު ކަމަށެވެ.
"އަސްލު ވަރަށް އެއަރޕޯޓު އެޅުމާ ދެކޮޅު އެކަމު ދެން ބައްޕަމެން މަންމަމެން އެއަރޕޯޓުއަޅަން ބޭނުންވާތީ އެކަމާ ދެކޮޅު ހަދަން ނުކެރިފަ މިހުންނަނީ. އެއަރޕޯޓަށްވުރެ އަސްލު ދިރިއުޅެން ގެވަޅެއް ބޭނުންވޭ މިހާރުވެސް ގިނަ ކުދިން އެއުޅެނީ ދިރިއުޅެން ގެވަޅެއް ނުލިބިގެން. ދެން މިބުނާހެން ފާޅުގައި އެއަރޕޯޓައި ދެކޮޅުކަން ބުނަން ނުކެރެނީ މިހެން ކަންކަން ހުރީމަ" މި ނޫހައި ވާހަކަ ދެއްކި ފައިނު މީހަކު ބުންޏެވެ.
މީގެ ކުރިން ރާއްޖެ އެމްވީ އާއި ވާހަކަ ދައްކަވަމުން ފައިނު ކައުންސިލްގެ ރައީސް އަޙްމަދު ރިޝްފާނު ވިދާޅުވީ، އެއާޕޯޓުގެ ސާވޭ ޓީމުން އެއަރޕޯޓުގެ ކޮންސެޕްޓެއް ތައްޔާރުކޮށް ކައުންސިލާ ހިއްސާކޮށްފައިވާ ކަމަށެވެ. އެހެން ނަމަވެސް އެ ކުރެހުމުގައި ވާގޮތުން އެއާޕޯޓު އަޅަން ރަށުގެ އިހުތިސާސުން ވަކިކުރާ ބަޔަށް މިހާރު މީހުން ދިރިއުޅޭ ގޯތިތަކާއި ދިރިއުޅެން ދޫކޮށްފައިވާ 21 ގޯތި އަރާ ކަމަށް އޭނާ ވިދާޅުވިއެވެ.
ރިޝްފާން ވިދާޅުވީ، ރައްޔިތުންގެ ހިޔާލާ އެއްގޮތަށް ކުރެހުމަށް ބަދަލު ގެނެވޭތޯ މަސައްކަތްކުރާނެ ކަމަށް ސާވޭ ޓީމުން ބުނި ނަމަވެސް އެއަރޕޯޓު އިތުރަށް ފުއްޓަރު ފަރާތަށް ޖެއްސުމަކީ އެންމެ ރަނގަޅު ގޮތް ނޫން ކަމަށް އެ ޓީމުން ބުނި ކަމަށެވެ.
އޭގެ އިތުރުން ރަށުގެ އިރުމަތީ ފަރާތުން ނަގަންޖެހޭ ގެވަޅުތައް ރަށުގެ ހުޅަނގު ފަޅިން ގޯތި ދޫކުރަން ހުރި ބިންތަކަށް ބަދަލުކުރަންޖެހޭކަން ފާހަގަކުރައްވައި އޭނާ ވިދާޅުވީ، ހުޅަނގު ފަރާތުން އާރްއޯ ޕްލާންޓާއި ލޭންޑް ޔޫސް ޕްލޭންގައިވާ މިސްކިތާއި އަދި އިރުމަތީ ފަޅިން ނަގަންޖެހޭ ބިންތަކަށް ޖާގަ ދިނުމުން މިހާރު ގޯތި ދޫކުރަން ހުރި ބިންތަކުން ގޯތި ދޫކުރަން ދަތިވާނެ ކަމަށެވެ.
