އަލްޖަޒީރާ އަށް ޣައްޒާގެ ހޮސްޕިޓަލްތަކުގެ މަސްދަރުތަކުން މަޢުލޫމާތު ދީފައިވާ ގޮތުގައި، ބުދަ ދުވަހު ފަތިހުން ފެށިގެން ޣައްޒާ ގައި އިސްރާއީލުގެ ހަމަލާތަކުން މަރުވި ފަލަސްޠީނު މީހުންގެ އަދަދު 43 އަށް އަރައިފިއެވެ.

ފާއިތު ފަސް ހަފްތާގެ ތެރޭގައި ގާތްގަނޑަކަށް 600 ފަލަސްޠީނު މީހުން މަރުވެފައިވާއިރު، މީގެ ތެރެއިން 250 މީހުން މަރުވެފައި ވަނީ ވޭތުވެ ދިޔަ 48 ގަޑިއިރުގެ ތެރޭގައެވެ.

ވަފާ ނިއުސް އެޖެންސީން ރިޕޯޓު ކޮށްފައިވާ ގޮތުގައި، އިސްރާއީލުން ހިސޯރު ކޮށްފައިވާ ވެސްޓް ބޭންކުގެ ބެތްލެހެމް ގައި އިސްރާއީލުން ހިންގި ރެއިޑްތަކުގައި 14 ފަލަސްޠީނު މީހުން ހައްޔަރު ކޮށްފައި ވެއެވެ. އޭގެ އިތުރުން މި ސަރަހައްދުގައި 100 އަށް ވުރެ ގިނަ ގެ ތަޅާލުމަށް އިސްރާއީލު ސަރުކާރުން ނިންމުމާ ގުޅިގެން އިސްރާއީލު ސިފައިންގެ އަމުރަކުން ގާތްގަނޑަކަށް 400 ފަލަސްތީން ޢާއިލާ ގެދޮރުން ނުކުންނަށް މަޖުބޫރު ވާނެއެވެ.

އިސްރާއީލުގެ މީޑިއާތަކުން ރިޕޯޓުކޮށްފައިވާ ގޮތުގައި، އިސްރާއީލުގެ ޖަސްޓިސް މިނިސްޓަރ ޔަރިވް ލެވިން ވިދާޅުވެފައިވަނީ މިއީ އިސްރާއީލުން ހިސޯރު ކޮށްފައިވާ ވެސްޓް ބޭންކު އިސްރާއީލުގެ ބިމާ އެއް ކޮށްލުމަށް ލިބިފައިވާ "ތާރީޚީ ފުރުޞަތެއް" ކަމަށެވެ.

އަނެއް ކޮޅުން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައި ވަނީ ޣައްޒާ ގައި 60 ދުވަހުގެ މުއްދަތައް ހަނގުރާމަ ހުއްޓާލުމަށް "ބޭނުންވާ ޝަރުޠުތަކަށް" އިސްރާއީލުން އެއްބަސްވެފައިވާ ކަމަށާއި، މި ހުށަހެޅުން ޤަބޫލު ކުރުމަށް ހަމާސް އަށް ގޮވާލައްވާ ކަމަށެވެ.

އަނެއްކޮޅުން އުތުރު ޣައްޒާގެ އެންމެ ބޮޑު މެޑިކަލް ސެންޓަރު ކަމުގައިވާ އަލް-ޝިފާގެ އޮފިޝަލުން ބުނެފައިވަނީ އިސްރާއީލުގެ ބްލޮކޭޑްގެ ސަބަބުން ހޮސްޕިޓަލުން ތެޔޮ ހުސްވުމާ ގުޅިގެން އެތައް ސަތޭކަ ބަލިމީހުން "މަރާ ކުރިމަތި ލަމުންދާ" ކަމަށެވެ.

ޣައްޒާގެ ހެލްތު މިނިސްޓްރީން ބުނެފައިވާ ގޮތުގައި، ޣައްޒާ ގައި އިސްރާއީލުން ކުރަމުންދާ ހަނގުރާމައިގައި މަދުވެގެން 56,647 މީހުން މަރުވެ، 134,105 މީހުންނަށް ޒަޚަމްވެފައި ވެއެވެ.