ހަނގުރާމަ ހުއްޓާލުމުގެ އެއްބަސްވުމާ މެދު އިސްރާއީލްގެ ކެބިނެޓުގައި ޚިޔާލު ތަފާތުވުން އުފެދިއްޖެ
އިސްރާއީލްގެ ނެޝަނަލް ސެކިއުރިޓީ މިނިސްޓަރު އިތަމަރް ބެން-ގްވީރް އަދި ފިނޭންސް މިނިސްޓަރު ބެޒަލެލް ސްމޮޓްރިޗް ވަނީ އެ ހުށަހެޅުން ބަލައި ގަންނަން ދެކޮޅު ހަދާ ކަމަށް ހާމަކޮށްފައި.
އިސްރާއީލްގެ ވަޒީރުންގެ މަޖިލީހުގެ ބައްދަލުވުމެއްގައި ބޮަޑު ވަޒީރު ބެންޖަމިން ނަތަންޔާހޫ އަދި ބައެއް ވަޒީރުން
އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ހުއްޓާލުމަށް ހުށަހަޅާފައިވާ އެއްބަސްވުމަށް އަމަލު ކުރުމާ މެދު، އިސްރާއީލްގެ ކެބިނެޓުގައި ޚިޔާލު ތަފާތުވުން އުފެދިފައިވާ ކަމަށް ރިޕޯޓު ކޮށްފި އެވެ.
ޣައްޒާ ހަނގުރާމަ ހުއްޓާލުމުގެ އެއްބަސްވުން ހުށަހަޅާފައި ވަނީ އެމެރިކާގެ ރައީސް ޑޮނަލްޑް ޓްރަމްޕް އެވެ. ޓްރަމްޕް ވަނީ އެ ހުށަހެޅުން ބަަލައިގަނެ، ހަނގުރާމަ ހުއްޓާލުމުގެ އެއްބަަސްވުން ތަންފީޒު ކުރުމަށް ވެސް ގޮވާލައްވައިފަ އެވެ. އަދި މިހާރު ހުށަހަޅާފައި އޮތް އެއްބަސްވުމަށް ވުރެ ރަނގަޅު އެހެން އެއްބަސްވުމެއް ނޯންނާނެ ކަމަށް ވެސް އޭނާ ވަނީ ވިދާޅުވެފަ އެވެ.
މީޑިއާ ތަކުގައި ބުނެފައިވާ ގޮތުން ޓްރަމްޕްގެ ހުށަހެޅުމާ ގުޅޭ ގޮތުން އިސްރާއީލްގެ ކެބިނެޓުގައި ވަނީ ޚިޔާލު ތަފާތުވުން އުފެދިފަ އެވެ. އެގޮތުން އިސްރާއީލްގެ ޚާރިޖީ ވަޒީރު ގިޑިއަން ސާރ ވިދާޅުވެފައި ވަނީ، ޓްރަމްޕްގެ ފަރާތުން ހުށަހަޅާފައިވާ އެއްބަސްވުމަށް އިސްރާއީލްގެ ކެބިނެޓުގެ އިތުރުން، އެ ޤައުމުގެ ރައްޔިތުންގެ ވެސް ބޮޑު ތާއީދެއް ލިބިފައިވާ ކަމަށެވެ.
މީގެ އިތުރުން ޓްރަމްޕްގެ އެ ހުށަހެޅުމަށް އިސްރާއީލްގެ އިދިކޮޅު ލީޑަރު ޔައުރު ލަޕިޑް ވެސް ތާއީދު ކޮށްފައިވާ ކަމަށް ވަނީ ރިޕޯޓު ކޮށްފަ އެވެ. އަދި އެ ހުށަހެޅުމުގެ ސަބަބުން އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އަށް ރައްކާތެރިކަމުގެ އެހީތެރިކަން ދެއްވާނެ ކަމަށް ލަޕިޑް ވިދާޅުވެފައިވާ ކަމަށް ވެސް ވަނީ ރިޕޯޓު ކޮށްފަ އެވެ.
އެހެން ނަމަވެސް، އިސްރާއީލްގެ ކެބިނެޓުގެ ބައެއް ވަޒީރުން ވަނީ އެ ހުށަހެޅުމާ ދެކޮޅު ހައްދަވައިފަ އެވެ. އެގޮތުން އިސްރާއީލްގެ ނެޝަނަލް ސެކިއުރިޓީ މިނިސްޓަރު އިތަމަރް ބެން-ގްވީރް އަދި ފިނޭންސް މިނިސްޓަރު ބެޒަލެލް ސްމޮޓްރިޗް ވަނީ އެ ހުށަހެޅުން ބަލައި ގަންނަން ދެކޮޅު ހަދާ ކަމަށް ހާމަކޮށްފައި ކަމަށް މީޑިއާ ތަކުގައި ވަނީ ރިޕޯޓު ކޮށްފަ އެވެ.
އިސްރާއީލްގެ ކެބިނެޓުގެ މި ދެ ވަޒީރުން އެ ހުށަހެޅުމާ ދެކޮޅު ހެދުމުގެ ސަބަބުން، ހަމާސް އިން ރަހީނު ކޮށްފައިވާ އިސްރާއީލްގެ ރައްޔިތުންގެ އާއިލާ ތަކުން ވަނީ އެކަމާ ކަންބޮޑުވުން ފާޅު ކޮށްފަ އެވެ. އަދި އެއީ ލަދުގަންނަން ޖެހޭނެ ކަމެއް ކަމަށް އެ އާއިލާ ތަކުން ވަނީ ފާހަގަ ވެސް ކޮށްފަ އެވެ.
މީޑިއާ ތަކުގައި ބުނެފައިވާ ގޮތުން ހަނގުރާމަ ހުއްޓާލުމަށް ހުށަހަޅާފައިވާ އެއްބަސްވުމުގެ މުސްތަޤުބަލު ބިނާ ވެގެން ދާނީ އިސްރާއީލްގެ ސިޔާސީ ލީޑަރުންގެ މެދުގައި އެއްބަސްވުމަކަށް އާދެވޭ މިންވަރެއްގެ މައްޗަށެވެ.
