ތ.ވިލުފުށީގައި އޮތް ތެޔޮ ބޯޓެއްގައި ހިނގި އަލިފާނުގެ ހާދިސާގައި އަނިޔާވި އެކަކު އިތުރު ފަރުވާ އަށް މާލެ ގެނެސްފިއެވެ.

މީސްމީޑިއާގައި ދައުރުވަމުންދާ ވީޑިއޯ އިން ފެންނަ މަންޒަރުތަކުން އެނގޭ ގޮތުން މި ބޯޓުގައި ވަނީ ވަރަށް ބޮޑަށް ރޯވެފައެވެ. އަލިފާން ނިއްވާލީ ކަމާއި ބެހޭ ފަރާތްތަކާއި އާއްމުންނާއި އެކުގައި ކުރި މަސަްކަތުންނެވެ.

މި ހާދިސާ އާއި ގުޅޭ ގޮތުން ފުލުހުންނާއި ސުވާލުކުރުމުން ފުލުހުން ރާއްޖެ އެމްވީ އަށް ބުނެފައި ވަނީ މި ހާދިސާގެ މައުލޫމާތު ފުލުހުންނަށް ރިޕޯޓްކޮށްފައި ވަނީ އަންގާރަ ދުވަހުގެ ހެނދުނު 09:15 ހާއިރު ކަމަށެވެ.

މީގެ އިތުރުން މިހާދިސާގައި ދެ މީހަކަށް އަނިޔާ ލިބިފައިވާ ކަމަށާއި އޭނާ އަށް ވިލުފުށީ ސިއްހީ މަރުކަޒުގައި ފަރުވާ ދީފައިވާ ކަމަށް ވެސް ފުލުހުން ވަނީ ބުނެފައެވެ. އަނިޔާވެފައި ވަނީ ދިވެއްސަކަށާއި ބިދޭސީއަކަށެވެ.

ރާއްޖެ އެމްވީ އަށް މައުލޫމާތު ދެމުން ކައުންސިލުން ބުނީ އަނިޔާވި ދިވެހި މީހާ އަކީ ރޯވި ބޯޓުގެ ވެރި މީހާ ކަމަށެވެ. އޭނާ މާލެ އަށް ފޮނުވާލީ މެންދުރު ފަހުގެ ވަގުތެއްގައި ކަމަށް ވެސް ކައުންސިލުން ވަނީ ބުނެފައެވެ. އޭނާގެ ހަޑިގަނޑުގެ ބޮޑު ބައެއް ފިހިފައިވާ ކަމަށް މައުލޫމާތު ލިބިފައިވެއެވެ.

މި ހާދިސާ އާއި ގުޅިގެން އެމްއެންޑީއެފުން ބުނީ ތ.ވިލިފުށީ ފަޅުތެރޭގައި އޮތް ތެޔޮބޯޓެއްގައި އަލިފާން ރޯވެގެން، އެމްއެންޑީއެފް ސެންޓްރަލް އޭރިއާ ކޮމާންޑްގެ ފަޔަރ ކޮމްޕޯނަންޓްގެ ސިފައިން ދަނީ އަލިފާން ނިއްވުމުގައި ހަރަކާތްތެރިވަމުން ކަމަށެވެ. އެމްއެންޑީއެފުން ބުނީ އެ ހާދިސާގެ މައުލޫމާތު މި ހާދިސާގެ މަޢުލޫމާތު ލިބިފައިވަނީ އަންގާރަ ދުވަހު 09:41ގައި ކަމަށެވެ.