މަޝްވާރަތައް ފެށުމުގެ ކުރިން ސަލާމަތީ ޔަގީންކަން ބޭނުންވާ ކަމަށް އަރާގްޗީ ވިދާޅުވެއްޖެ

އެމެރިކާ އާއި އީރާނާ ދެމެދު ކުރިއަށް ގެންދަމުން އައި މަޝްވަރާތައް އަލުން ފެށުމުގެ ކުރިން، ސަލާމަތީ ޔަގީންކަން ބޭނުންވާ ކަމަށް އީރާންގެ ޚާރިޖީ ވަޒީރު އައްބާސް އަރާގްޗީ ވިދާޅުވެއްޖެ އެވެ.

މިއަހަރުގެ އޭޕްރީލް މަހުގެ ތެރޭގައި ވަނީ، އީރާނާއި އެމެރިކާއާ ދެމެެދު ނިއުކްލިއާ ޕްރޮގްރާމާ ގުޅޭ މަޝްވަރާތައް ފަށައިފަ އެވެ. އެ މަޝްވަރާތަކުގައި ވަނީ ފަސް ބައްދަލުވުމެއް ބާއްވައިފަ އެވެ. އެންމެ ފަހުންް އިޓަލީގެ ވެރި ރަށް ރޯމްގައި ކުރިއަށް ދިޔަ ބައްދަލުވުން ނިންމާލީ، ހަ ވަނަަ ބައްދަލުވުމަކަށް ދެ ޤައުމުން ވެސް އެއްބަސްވެގެންނެވެ.

ނަމަވެސް، އިސްރާއީލް އިން އީރާނަށް ދިން ހަމަލާގެ ސަބަބުން ފެށުނު ހަނގުރާމައާ ގުޅިގެން ހަ ވަނަ ބުރުގެ ބައްދަލުވުން ވަނީ ފަސްކޮށްފަ އެވެ. އިސްރާއީލާއި އީރާނާ ދެމެދު ކުރިއަށް ދިޔަ ހަނގުރާމައިގެ ތެރެއަށް ވަދެ، އެމެރިކާ އިން ވެސް އީރާނަށް ހަމަލާ ދިނެވެ. އޭގެ ފަހުން ހަނގުރާމަ ހުއްޓާލުމުގެ އެއްބަސްވުމެއް ޤާއިމު ކޮށްފައިވާއިރު، މިހާރު އަލުން މަޝްވަރާތައް ފެށުމަށް މަސައްކަތް ކުރަމުން އަންނަ ކަމަށް މީޑިއާ ތަކުގައި ވަނީ ރިޕޯޓު ކޮށްފަ އެވެ.

ސީބީއެސް އީވްނިން ނިއުސް އަށް ދެއްކި އިންޓަވިޔުއެއްގައި އަރާގްޗީ ވިދާޅުވެފައި ވަނީ އެމެރިކާއާ އެކު އަވަހަށް މަޝްވަރާތައް ފެށުމުގެ ފުރުސަތު ވަރަށް ކުޑަ ކަމަށެވެ. އަދި އިތުރު ހަމަލާ ތަކުން ރައްކާތެރިކަން ބޭނުންވާ ކަމަށާއި، ސަލާމަތީ ޔަގީންކަން ވެސް ބޭނުންވާ ކަމަށް އޭނާ ވިދާޅުވި އެވެ. 

ދާދި ފަހުން އެމެރިކާގެ ރައީސް ޑޮނަލްޑް ޓްރަމްޕް ވެސް ވަނީ، މި ހަފުތާގެ ތެރޭގައި އަލުން މަޝްވަރާތައް ފެށިދާނެ ކަމަށް ވިދާޅުވެފަ އެވެ. އަރާގްޗީ ދެއްވި އިންޓަވިއުގައި ވަނީ އެކަމާ ގުޅޭ ގޮތުން ވެސް ވާހަަކަ ދައްކަވައިފަ އެވެ. އެގޮތުން އީރާން އިން އަލުން މަޝްވަރާތަކުގައި ބައިވެރިވުމަށް ނިންމުމުގެ ކުރިން، އިތުރު އަސްކަރީ ހަމަލާއެއް ނުދޭނެ ކަމުގެ ޔަގީންކަން އެމެރިކާގެ ފަރާތުން ބޭނުންވާ ކަމަށް ވެސް އަރާގްޗީ ވަނީ ވިދާޅުވެފަ އެވެ. 

އދ ގެ އިންޓަނޭޝަނަލް އެޓޮމިކް އެނާޖީ އެޖެންސީ (އައިއޭއީއޭ)ގެ ވެރިޔާ، ރަފައެލް ގްރޮސީ ވިދާޅުވެފައި ވަނީ އެއް މަސް ދުވަހުގެ ތެރޭގައި، ނުވަތަ އެއަށް ވުރެ އަވަސް މުއްދަތެއްގައި ވެސް އީރާނަށް ޔުރޭނިއަން ފައްކާ ކުރުމުގެ ޤާބިލުކަން ލިބިގެންވާ ކަމަށެވެ. އެކަމާ ގުޅޭ ގޮތުން އަރާގްޗީ ވިދާޅުވީ، އީރާނަށް ބޮން އެެޅި ނަމަވެސް، ސައިންސާއި ޓެކްނޮލިޖީ ނައްތާ ނުލެވޭނެ ކަމަށެވެ. 

އެމެރިކާ އިން އީރާނަށް އަމާޒުކޮށް ދިން ހަމަލާގައި ވަނީ، އީރާންގެ ނިއުކްލިއާ ތިން މަރުކަޒަކަށް ހަމަލާ ދީފަ އެވެ. އަދި އޭގެ ފަހުން އެެމެރިކާގެ ރައީސް ޓްރަމްޕް ވިދާޅުވަމުން ގެންދަވަނީ، އީރާންގެ ނިއުކްލިއާ ޕްރޮގްރާމް ނައްތާލެވިފައިވާ ކަމަށާއި، އެ ޕްރޮގްރާމް އަހަރުތަކެއް ފަހަތަށް ގޮސްފައިވާ ކަމަށެވެ. ނަމަވެސް، އީރާން އިން ވަނީ އެ ވާހަކަތައް ދޮގު ކޮށްފަ އެވެ.