ގެދޮރުވެރިޔާ" ސްކީމުގެ ފްލެޓްތައް ދިނުން ލަސްވާތީ ހުށަހެޅި ކުއްލި މައްސަލަ އަށް ފުރުސަތެއް ނުދިން
މި ކަމަކީ ވަރަށް ގިނަ ރައްޔިތުންގެ ދިރިއުޅުމާ ގުޅިފައިވާ ނުހަނު މުހިންމު ކަމެއް ކަމަށް ކުއްލި މައްސަލައިގައި ބުނެފައިވޭ
މެންބަރު މުހައްމަދު އިބްރާހިމް (ކުޑޫ) ހުށަހެޅި ކުއްލި މައްސަލަ ވަނީ ބޭރުކޮށްލާފައި
އެމްޑީޕީގެ ސަރުކާރުން ފަށާފައިވާ "ގެދޮރުވެރިޔާ" ސްކީމުގެ ދަށުން ފުރަތަމަ އިމާރާތްކޮށްފައިވާ 4000 ފްލެޓް ނުދީ ލަސްވާތީ ހުށަހެޅި ކުއްލި މައްސަލަ ހުށަހަޅަން ފުރުސަތު ނުދިނުމަށް މަޖިލީހުގެ ރިޔާސަތުން ނިންމައިފިއެވެ.
ގަލޮޅު އުތުރު ދާއިރާގެ މެމްބަރު މުޙައްމަދު އިބްރާހިމް (ކުޑޫ) ހުށަހެޅުއްވި އެ ކުއްލި މައްސަލަ އަކީ 4000 ފްލެޓް ލިބޭނެ ފަރާތްތައް ކަނޑައަޅައިފައިވީ ނަމަވެސް، އެ ފަރާތްތަކާ ފްލެޓް ހަވާލުކުރުން ލަސްކުރަމުންދާ މައްސަލައާމެދު ރައްޔިތުންގެ މަޖިލީހުގައި ބަހުސްކުރުމަށް ޓަކައި ހުށަހެޅި ކުއްލި މައްސަލައެކެވެ.
ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ އެ ކުއްލި މައްސަލަ އަކީ ވޭތުވެދިޔަ ހަތް ދުވަހުގެ ތެރޭގައި ދިމާވި ކަމެއް ނޫން ކަމަށެވެ. އަދި އެކަމަކީ އެއީ ކުއްލިއަކަށް ދިމާވި ކަމެއް ވެސް ނޫން ކަމަށް އަބްދުއްރަހީމް ވިދާޅުވިއެވެ. އެހެންކަމުން އެއީ ކުއްލި މައްސަލަ އެއް ކަމަށް ބަލައި ނުގަތުމަށް އަބްދުއްރަހީމް ވަނީ ނިންމަވާފައެވެ.
ކުޑޫ ހުށަހެޅުއްވި ކުއްލި މައްސަލައިގައި ވިދާޅުވެފައި ވަނީ ދައުލަތުގެ ތަނަވަސްކަމާއި، ކުޅަދާނަކަން ހުރި މިންވަރަކަށް ޤާނޫނު ޙައްޤުތައް ރައްޔިތުންނަށް ހޯދޭނޭ މަގު ތަނަވަސްކޮށްދިނުމަށް ދައުލަތުން މަސައްކަތް ކުރާންވާނެކަމަށް ބަޔާންކޮށްފައިވާ ކަމަށެވެ. އަދި ހިޔާވަހިކަން ލިބުމުގެ ޙައްޤާއި، ދިރިއުޅޭނޭ ސާފު އަދި ޞިއްޙަތަށް ރަނގަޅު މާޙައުލެއް ލިބުމުގެ ޙައްޤު ޤާނޫނު އަސާސީން ކަށަވަރުކޮށްދީފައިވާ ކަމަށެވެ.
އެ ފްލެތްތައް ހަވާލުކުރުން އިތުރަށް ލަސްކުރަމުންދާނަމަ، އެ އާއިލާތަކުގެ ދިރިއުޅުމުގެ ހާލަތު ރަނގަޅުވުމުގެ ބަދަލުގައި، ދުވަހެއް ދުވަހަށް ނިކަމެތިވަމުން ދިޔުމުގެ ނަތީޖާއެއްގެ ގޮތުން، އިޖުތިމާއީ މައްސަލަތައް އިތުރުވަމުންދާ ކަމަށް އޭނާ ވިދާޅުވިއެވެ.
މިފަދަ ކަންކަމާއި މެދު ޖަވާބުދާރީ ކުރުވުމަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 70 ވަނަ މާއްދާގެ (ށ) ގެ (3) ވަނަ ނަންބަރުގައި ބަޔާންކޮށްފައިވާ ދުސްތޫރީ ވާޖިބެއް ކަމަށް އެ މައްސަލައިގައިވެއެވެ.
އެ މައްސަލައިގައިވާ ކަންކަމަކީ ރައްޔިތުންގެ ކަންބޮޑުވުން ނުހަނު ބޮޑަށް އޮތް ކަމެއް ކަމަށް ވެފައި، މުޖުތަމައުގެ އާއްމު މަސްލަހަތާ ސީދާ ގުޅިފައިވާ ކަމެއް ކަމަށް ވެސް އޭނާ ވިދާޅުވިއެވެ.
އެހެންކަމަށް ވާއިރު މާލޭ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލަ ހައްލުކުރުމަށް ޓަކައި، އެމްޑީޕީގެ ސަރުކާރުން ފެށި "ގެދޮރުވެރިން" ޕްރޮގްރާމުގެ ތެރެއިން، ފްލެޓް ދޫކުރުމަށް ހިންގި "ގެދޮރުވެރިޔާ" ސްކީމުގެ ދަށުން، އެންމެ ފުރަތަމަ އިމާރާތްކުރާ 4000 ފްލެޓްގެ މަސައްކަތް ފަހި ދިރިއުޅުން ކޯޕަރޭޝަން (އެފްޑީސީ) އާއި ހަވާލުކޮށްފައިވާ ކަމަށް އެ މައްސަލައިގައި ވަނީ ބުނެފައެވެ.
އެ ފްލެޓްތައް ލިބޭނެ ފަރާތްތައް ކަނޑައަޅައި، އެ ލިސްޓުތައް ދިވެހިސަރުކާރުގެ ގެޒެޓުގައި އިއުލާނުކޮށް، ފްލެޓް ކަނޑައެޅުމުގެ އެއްބަސްވުމުގައި ސަރުކާރުން އެ ފަރާތްތަކާއެކު ސޮއިކޮށްފައިވާ ކަމަށް ވެސް އޭނާ ވަނީ ފާހަގަކުރައްވާފައެވެ.
އެ ފްލެޓްތައް ލިބޭނެ ފަރާތްތައް ކުރީގެ ސަރުކާރުން ކަނޑައަޅައިފައިވަނީ ގޯސްކޮށް ކަމަށާއި، އެ ފޯމުތައް އަލުން އިވެލުއޭޓްކުރަމުން ގެންދާ ކަމަށް ބުނެ އެތައް ދުވަހެއް ލަސްކޮށްފަިއވާ ކަަމށް ވެސް އޭނާ ވިދާޅުވިއެވެ. އެ 4000 ފްލެޓް ދޫކުރުމުގައި ބަލާނީ ކުރީގެ ސަރުކާރުން، 2023 ނޮވެންބަރު 15 ގައި އާންމު ކުރި ލިސްޓަށް ކަމަށް، ފާއިތުވި މޭ މަހުގެ 25 ގައި، މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ޑޮކްޓަރ ޢަބްދުﷲ މުއްޠަލިބް ވަނީ ވިދާޅުވެފައެވެ.
މީގެ އިތުރުން ކުރީގެ ސަރުކާރުން މި ކަމުގައި ގޯހެއް ހަދައިފައި ނެތްކަން މިހާރުގެ ސަރުކާރުންވެސް ޤަބޫލުކުރާކަން، މިކަމުގެ ސަބަބުން ރައްޔިތުންނަށް ހާމަވެގެން ގޮސްފައިވާ ކަމަށް މެމްބަރު ވަނީ އެ ކުއްލި މައްސަލައިގައި ވިދާޅުވެފައެވެ.
އިތުރަށް އޭނާ ވިދާޅުވީ، ޑރ. މުހައްމަދު މުއިއްޒު ރިޔާސީ އިންތިހާބުގެ ކެމްޕެއިން ކުރައްވަމުން، ބޯހިޔާވަހިކަމާ ގުޅޭގޮތުން ވަޢުދުވެ ވަޑައިގަންނަވަމުން، "ކުރީސަރުކާރުން އެއްވެސް ރައްޔިތަކަށް ދޭން ކަނޑައަޅާފައިވާ ފްލެޓެއް އަތު ނުލާނެކަމަށާއި ކުރީސަރުކާރުން ކަނޑައަޅައި، ދޭން ނިންމާފައިވާ ފްލެޓްތައް އެ ފުލެޓެއް ދިންތަނަކުން ދިންގޮތަކަށް އެއަށްވުރެން ފުރިހަމައަށް އެފަރާތްތަކަށް ދޭނެކަމަށް" ތަކުރާރުކޮށް ރައީސް މުއިއްޒު ވިދާޅުވެފައިވާ ކަަމަށެވެ.
އެެހެންނަމަވެސް ފްލެތައް ހަވާލުކުރުމުގެ އެއްވެސް މަސައްކަތެއް މިއަދާ ހަމައަށްވެސް ސަރުކާރުން ކުރިއަށް ގެންގޮސްފައިނުވާތީ، އެ ފްލެޓްތައް ލިބޭ ފަރާތްތަކުން އިންތިހާއަށް ކަންބޮޑުވުން ފާޅުކުރަމުންދާކަން އެ މައްސަލައިގައި ފާހަގަކޮށްފައިވެއެވެ.
މި ކަމަކީ ވަރަށް ގިނަ ރައްޔިތުންގެ ދިރިއުޅުމާ ގުޅިފައިވާ ނުހަނު މުހިންމު ކަމެއް ކަމަށް ވާއިރު ބޯހިޔާވަހިކަމުގެ ދަތިކަމަކީ، ޒުވާނުން މަސްތުވާތަކެތި ބޭނުންކުރަން ފެށުމާއި، ކުށުގެ މާހައުލަށް ލެނބިގެން ދިޔުމާއި އަދި އެހެނިހެން ވެސް އިޖުތިމާއި އެތަކެއް މައްސަލަތަކެއްގެ އެންމެ ބޮޑު އަސްލުކަމުގައި ވެސް އެ މައްސަލައިގައި ބަޔާންކޮށްފައިވެއެވެ.
