މި ސަރުކާރުގައި ނުލިބި ހުރި ފައިސާގެ އަދަދު 3.5 ބިލިއަން ރުފިޔާއަށް ވަނީ އިތުރުވެފައި: އަމީރު

ރާއްޖެ ދުނިޔެ ކުޅިވަރު ވިޔަފާރި/އިގްތިސާދު ސިއްހަތު ރިޕޯޓު ލައިފް ސްޓައިލް ލުއިޚަބަރު ވާހަކަ ފޮޓޯ

ކ. މާލެ

10 ޖުލައި 2025 | ބުރާސްފަތި 14:25

ނޫސްވެރިންގެ ބައްދަލުވުމެއްގައި ކުރީގެ ފިނޭންސް މިނިސްޓަރު އިބްރާހިމް އަމީރު ވާހަކަދައްކަވަނީ

އެމްޑީޕީ

މި ސަރުކާރުގައި ނުލިބޭ ފައިސާ

މި ސަރުކާރުގައި ނުލިބި ހުރި ފައިސާގެ އަދަދު 3.5 ބިލިއަން ރުފިޔާއަށް ވަނީ އިތުރުވެފައި: އަމީރު

2024 ވަނަ އަހަރު ނުލިބި ހުރި ފައިސާ ހޯދުނީ އޭގެ ކުރީ އަހަރަށްވުރެ ވެސް މަދުން

ސަރުކާރުން ދަނީ ހަރަދު ބޮޑުވާނެ ސިޔާސަތުތައް ތަންފީޒު ކުރަމުން

ބަޖެޓަށް ވުރެ އިތުރަށް ސަބްސިޑީތަކަށް ހަރަދުކުރާނެ

އަމްނާ އިމާދު

2,816

ނުލިބި ހުރި ފައިސާ ހޯދަން އައި ރައީސް ޑރ.މުހައްމަދު މުއިއްޒުގެ ސަރުކާރުގައި ނުލިބި ހުރި ފައިސާގެ އަދަދު 3.5 ބިލިއަން ރުފިޔާއަށް އިތުރުވެފައިވާ ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.

ރާއްޖޭގެ މާލީ ހާލަތުގެ ކަންބޮޑުވުންތަކާ ގުޅޭގޮތުން މިމަހުގެ 7 ވަނަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި އަމީރު ވިދާޅުވީ މި ސަރުކާރު އައި ފަހުން ނުލިބި ހުރި ފައިސާގެ އަދަދު 3.5 ބިލިއަން ރުފިޔާއަށް އިތުރުވެފައިވާ ކަމަށާއި، އެއީ 43 ޕަސެންޓް ގެ އިތުރުވުމެއް ކަމަށެވެ. އަދި 2024 ވަނަ އަހަރު ނުލިބި ހުރި ފައިސާ ހޯދުނީ އޭގެ ކުރީ އަހަރަށްވުރެ ވެސް މަދުން ކަމަށް އަމީރު ވިދާޅުވިއެވެ.

އަމީރު ވިދާޅުވީ ސަރުކާރުން ވިޔަފާރިތަކަށް ދައްކަންޖެހޭ ފައިސާ ނުދައްކާނަމަ ނުލިބި ހުރި ފައިސާ ކުރިއަށް އޮތްތަނުގައި ވެސް ވަނީ އިތުރު ކަމަށާއި، އިގްތިސާދު ދަށްވުމުގެ ނަތީޖާއަކީ ޓެކްސް ދެއްކުމުގެ ގާބިލްކަން ވިޔަފާރިތަކުގެ ކިބައިން ނެތުން ކަމަށެވެ.

ޓެކްސް ނުދައްކާ މިންވަރު އިތުރު އެބަވޭ ސަރުކާރުން ކޮންޓްރެކްޓަރުންނަށް ރާއްޖޭގެ ވިޔަފާރިތަކަށް ފައިސާ ދޫނުކުރާތީވެ، ރާއްޖޭގެ ވިޔަފާރިތަކަށް ޓެކްސް ދައްކަން އެބަ އުދަނގޫވޭ. ދެން އަޅުގަނޑުމެންނަށް ފެނިގެންދިޔަ ޕީއެސްއެމުން ވެސް އަދި ސަރުކާރުގެ މީޑިއާތަކުން ވަރަށް ބޮޑަށް 2024 ވަނަ އަހަރު 3.67 ބިލިއަން ރުފިޔާ ނުލިބި ހުރި ފައިސާ ހޯދި ވާހަކަ. ދެން އަޅުގަނޑުމެން ބަލާލިއިރުގައި 2023 ވަނަ އަހަރު އަޅުގަނޑުމެން އޭރު ހޯދާފައިވޭ 3.92 ބިލިއަން ރުފިޔާ. އެހެންވީމަ މި ބޭފުޅުންނަށް އެވާހަކަ ދެއްކެން ނެތް ކަމަށް އަޅުގަނޑު ގަބޫލުކުރަނީ. އަޅުގަނޑުމެން ސަރުކާރު ބަދަލުވެގެން އައިރު 2023 ވަނަ އަހަރު ނިމިގެން ދިޔައިރު މީރާއަށް ނުލިބި ހުރި ފައިސާގެ ގޮތުގައި މިދައްކަނީ ގާތްގަނޑަކަށް 7.92 ބިލިއަން ރުފިޔާ. މިހާރު 2025 ވަނަ އަހަރުގެ މާޗް މަސް ނިމުނުއިރު ފުރަތަމަ ކުއާޓަރު ނިމުނުއިރު ގާތްގަނޑަކަށް 11.3 ބިލިއަން ރުފިޔާއަށް އަރައިފި. އެހެންވީމަ މިއީ ގާތްގަނޑަކަށް 3.5 ބިލިއަން ރުފިޔާގެ އިތުރުވުމެއް. ނުލިބި ހުރި ފައިސާ އިތުރު ވެއްޖެ. 43 ޕަސެންޓް އިތުރުވުމެއް.

ކުރީގެ ފިނޭންސް މިނިސްޓަރު އިބްރާހިމް އަމީރު

ރައީސް މުއިއްޒު ވެރިކަމަށް ވަޑައިގަންނަވާ ނުލިބި ހުރި ފައިސާ ހޯދައި، ދަރަނީގެ މައްސަލަ ހައްލު ކުރާނެ ކަމަށް ތަކުރާރުކޮށް ވިދާޅުވި ނަމަވެސް މިކަން ދަނީ ފެއިލްވަމުން ކަމަށް އަމީރު ވިދާޅުވިއެވެ.

މީގެ އިތުރުން އަމީރު ވިދާޅުވީ ސަރުކާރުން ދަނީ ހަރަދު ބޮޑުވާނެ ސިޔާސަތުތައް ތަންފީޒު ކުރަމުން ކަމަށެވެ.

ހަރަދު ކުޑަކުރުމުގެ ފިޔަވަޅުތަކުން 7.7 ބިލިއަން ރުފިޔާ ސަލާމަތްވާނެ ކަމަށް ލަފާކުރި ނަމަވެސް މިހާރު ވެސް މަގުން ކައްސަލާފައިވާ ކަމަށާއި، ބަޖެޓަށް ވުރެ އިތުރަށް ސަބްސިޑީތަކަށް ހަރަދުކުރާނެ ކަމަށް އަމީރު ވިދާޅުވިއެވެ.