އަހަރުގެ ފަހު ދައުރު ނިންމާ މަޖިލިސް ޗުއްޓީ އަށް، މި ދައުރުގައި 28 ޖަލްސާ ބޭއްވި އިރު ތަޅުމުގައި ހޭދަކުރީ 64 ގަޑިއިރު
މި ދައުރުގައި 28 ޖަލްސާ ބޭއްވި އިރު 15 ބިލެއް ފާސްކޮށްފައިވޭ
މުޅި މަޖިލީހުގެ ކޮމިޓީ ބައްދަލުވުމެއްގެ ތެރެއިން
މި ހިނގާ 2025 ވަނަ އަހަރުގެ ތިން ވަނަ ދައުރު ނިންމާ، ރައްޔިތުންގެ މަޖިލީސް ޗުއްޓީ އަށް ގޮސްފި އެވެ.
ބުދަ ދުވަހު ބާއްވާފައި ވަނީ މި އަހަރުގެ ފަހު ދައުރުގެ 28 ވަނަ ޖަލްސާ އެވެ. ބުދަ ދުވަހުގެ ޖަލްސާގައި ވަނީ 8 ކަމަކަށް ވޯޓަށް އަހާފަ އެވެ.
މި ޖަލްސާގައި ވަނީ މުހިއްމު ބައެއް ބިލުތައް ފާސް ކޮށްފަ އެވެ. އެގޮތުން މަސްތުވާތަކެތި އެތެރެކުރާ މީހުންނަށް މަރު ގެ އަދަބު ދެވޭގޮތަށް މަސްތުވާތަކެތީ ގެ ގާނޫނަށް ހުށަހެޅި އިސްލާހުގެ ބިލާއި، ޒަކާތު ބިލު ވެސް ވަނީ ފާސް ކޮށްފަ އެވެ.
އޭގެ އިތުރުން ސަރުކާރު ހިއްސާވާ ކުންފުނިތަކަށް ޓޫރިސްޓް ރިސޯޓެއް ނުވަތަ އިންޓަގްރޭޓެޑް ޓޫރިސްޓް ރިސޯޓެއް ތަރައްގީ ކުރުމަށް ރަށް، ބިން ނުވަތަ ފަޅު ދޫކުރެވޭ ގޮތަށް ހުށަހެޅި އިސްލާހުގެ ބިލު ވެސް ބުދަ ދުވަހުގެ ޖަލްސާގައި ވަނީ ފާސް ކޮށްފަ އެވެ.
އެޖެންޑާގައި ހުރި ކަންކަން ނިންމާ ވޯޓަށް އެހުމަށް ފަހު ރިޔާސަތުގައި އިންނަވާ މަޖިލީހުގެ ރައީސް އަބްދުއްރަހީމް އަބްދުﷲ ވަނީ މަޖިލިސް ޗުއްޓީ އަށް ދާ ކަން އިއުލާނު ކުރައްވާފަ އެވެ.
މި ދައުރުގައި ކުރި މަސައްކަތްތަކުގެ ތަފްސީލު ހިއްސާ ކުރައްވާ އަބްދުއްރަހީމް ވިދާޅުވީ މި ދައުރުގައި 28 ޖަލްސާ ބޭއްވި އިރު، ތަޅުމުގައި ގާތްގަނޑަކަށް 64 ގަޑިއިރު މެންބަރުން ހޭދަކުރެއްވި ކަމަށެވެ.
އަބްދުއްރަހީމް ވިދާޅުވީ މި ދައުރުގައި 15 ބިލެއް ފާސް ކޮށްފައިވާ ކަމަށެވެ. އަދި 29 ސުވާލު ވަޒީރުންނާ ކުރެވުނު ކަމަށާ ސަރުކާރުން ހުށަހެޅި 16 މައްސަލައިގެ އިތުރުން ރައީސްގެ މޭޒުން ހުށަހެޅި 9 މައްސަލައެއް ނިންމާފައިވާ ކަމަށެވެ.
ކޮމިޓީ މަސައްކަތްތަކުގެ ތަފްސީލު ހާމަކުރައްވާ އަބްދުއްރަހީމް ވިދާޅުވީ 142 ކޮމިޓީ ބައްދަލުވުން މި ދައުރުގައި ބޭއްވި ކަމަށެވެ. އަދި ކޮމިޓީ ބައްދަލުވުންތަކުގައި 120 ގަޑިއިރު މެންބަރުން ހޭދަ ކުރެއްވި ކަމަށެވެ.
ބުދަ ދުވަހު މި ދައުރުގެ ފަހު ޖަލްސާ ބޭއްވި އިރު މަޖިލީހުގެ ގަވާއިދު ބުނާގޮތުން މި ދައުރު ހިނގާނީ ނިމުނު ނޮވެމްބަރު މަހުގެ ނިޔަލަށެވެ. ނަމަވެސް މުހިއްމު މަސައްކަތްތަކެއް ނުނިމި ހުރި ކަމަށް ބުނެ މި އަހަރުގެ ފަހު ދައުރު ވަނީ ދަންމާލާފަ އެވެ.
ޗުއްޓީ އަށް ފަހު ދެން މަޖިލީހުގެ މަސައްކަތް ފަށާނީ އަންނަ އަހަރުގެ ފުރަތަމަ ދައުރުގަ އެވެ. ގަވާއިދުގައިވާ ގޮތުން އަންނަ އަހަރުގެ ފުރަތަމަ ދައުރު ފެށޭނީ ފެބްރުއަރީ މަހުގެ 1 ވަނަ ދުވަހުގަ އެވެ.
